ಮಳೆಯಿಲ್ಲದೆ ಬಾಡುತ್ತಿದೆ ರಾಗಿ ಪೈರು

ಜಿಲ್ಲೆಯಲ್ಲಿ ಮಳೆಯಾಶ್ರಿತ ಪ್ರದೇಶ ಹೆಚ್ಚಿರುವ ಕಾರಣ ರಾಗಿ ಪ್ರಮುಖ ಬೆಳೆಯಾಗಿದೆ. ಪ್ರತಿ ವರ್ಷ ಜೂನ್ ಮೊದಲ ಅಥವಾ 2ನೇ ವಾರದಿಂದಲೇ ರಾಗಿ ಬಿತ್ತನೆ ಪ್ರಾರಂಭವಾಗುತ್ತದೆ. ಆದರೆ, ಈ ಬಾರಿ ಮುಂಗಾರು ಕೈಕೊಟ್ಟಿದ್ದರಿಂದ ಆಗಸ್ಟ್ ಮೊದಲ ವಾರದಿಂದ 3ನೇ ವಾರದವರೆಗೆ ರೈತರು ಅಲ್ಪಾವಧಿಯಲ್ಲಿ ಬೆಳೆಯುವ ಎಂ.ಎಲ್-322, ಕೆ.ಎಂ.ಆರ್-316, ಜಿಪಿಯು-28 ತಳಿಯ ರಾಗಿ ಬಿತ್ತನೆ ಮಾಡಿದ್ದಾರೆ. ಆಗಸ್ಟ್ ಕೊನೇ ವಾರದಿಂದ ಈವರೆಗೂ ಶೇ.33 ಮಳೆ ಕೊರತೆಯಾಗಿದೆ. ಇದೀಗ, ಒಂದಷ್ಟು ರೈತರ ಹೊಲದಲ್ಲಿ ರಾಗಿ ಬೆಳೆದು ಕುಂಟೆ ಹೊಡೆಯುವ ಹಂತಕ್ಕೆ ಬಂದಿದ್ದು, ಮಳೆ ಇಲ್ಲದೆ ಪೈರು ಬಾಡುತ್ತಿದ್ದರೆ, ಮತ್ತೆ ಕೆಲವು ಹೊಲಗಳಲ್ಲಿ ಬಿತ್ತಿದ ರಾಗಿ ಮೊಳಕೆಯೂ ಒಡೆದಿಲ್ಲ.

ಮೂಟೆಗಟ್ಟಲೇ ರಾಗಿ ಬೆಳೆದು ಖುಷಿ ಕಾಣುತ್ತಿದ್ದ ರೈತರಿಗೆ ಮಳೆ ಕೊರತೆ ನಿರಾಸೆಯತ್ತ ಮುಖ ಮಾಡಿಸುವ ಜತೆಗೆ ಮೇವಿಗೂ ತತ್ವಾರ ಪಡುವಂತಾಗಿದೆ. ಮಳೆ ಹೀಗೆ ಕೈಕೊಟ್ಟರೆ ಬಿತ್ತನೆ ಮಾಡಿದ ರಾಗಿ ಹೊಲಗಳು ಬರಡಾಗುತ್ತವೆ ಎಂಬ ಚಿಂತೆ ಕಾಡುತ್ತಿದೆ ಎನ್ನುತ್ತಾರೆ ಮೊಟ್ಟೆದೊಡ್ಡಿ ರೈತ ಮಹೇಶ್.

ಬಿತ್ತನೆ ಪ್ರದೇಶ: ಕೃಷಿ ಇಲಾಖೆ ಅಂದಾಜಿನ ಪ್ರಕಾರ ಜಿಲ್ಲೆಯಲ್ಲಿ ಎಲ್ಲ ಬೆಳೆಗಳು ಸೇರಿ ಸುಮಾರು 80,758 ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ಗುರಿ ಹೊಂದಲಾಗಿದ್ದು, ಪ್ರಸ್ತುತ 68 ಸಾವಿರ ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆಯಾಗಿದೆ. ರಾಗಿ 50 ಸಾವಿರ ಹೆಕ್ಟೇರ್ ಪ್ರದೇಶದಲ್ಲಿ ಗುರಿ ಹೊಂದಲಾಗಿದ್ದು, ಪ್ರಸ್ತುತ 47138 ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆಯಾಗಿದೆ. ಪ್ರತಿ ವರ್ಷ ಆಗಸ್ಟ್, ಸೆಪ್ಟೆಂಬರ್‌ನಲ್ಲಿ ಯೂರಿಯಾ ರಸಗೊಬ್ಬರಕ್ಕಾಗಿ ರೈತರು ಸರತಿ ಸಾಲಿನಲ್ಲಿ ನಿಲ್ಲುವ ದೃಶ್ಯ ಸಾಮಾನ್ಯವಾಗಿತ್ತು. ಆದರೆ, ಈ ಬಾರಿ ಜಿಲ್ಲೆಯಲ್ಲಿ ಗೊಬ್ಬರ ದಾಸ್ತಾನು ಇದ್ದರೂ, ಮಳೆ ಕಾರಣದಿಂದ ರೈತರು ಯೂರಿಯಾ ಅಂಗಡಿಗಳತ್ತ ಮುಖ ಮಾಡದಂತಾಗಿದೆ. ಇನ್ನು ಆಗಸ್ಟ್ ಮೂರನೇ ವಾರದವರೆಗೂ ರಾಗಿ ಬಿತ್ತನೆ ಮಾಡಿದ್ದಾರೆ ಎನ್ನುತ್ತಾರೆ ಕೃಷಿ ಅಧಿಕಾರಿಗಳು.