ಅಂಡರ್​ಪಾಸ್​ ನಿರ್ಮಾಣಕ್ಕೆ ಪರ-ವಿರೋಧ

ಈ ಜಾಗದಲ್ಲಿ ಅಂಡರ್​ಪಾಸ್​ ನಿರ್ಮಿಸಿದರೆ ಸಾರ್ವಜನಿಕರಿಗೆ ಸಮಸ್ಯೆಯಾಗುತ್ತದೆ. ಕೂಡಲೇ ಯೋಜನೆ ಕೈಬಿಡಬೇಕು ಎಂಬುದು ಆರ್​.ಕೆ.ಗೇಟ್​ ಹಾಗೂ ಲಾಯದ ಬೀದಿಯ ನಿವಾಸಿಗಳ ವಾದವಾಗಿದ್ದು, ಪ್ರತಿಭಟನೆ ಸಹ ನಡೆಸಿದ್ದಾರೆ. ಇನ್ನೊಂದೆಡೆ, ನಮ್ಮ ಸಮುದಾಯದ ಕಬ್ರಸ್ಥಾನ್​(ಸ್ಮಶಾನ)ಗೆ ಹೋಗಲು ಅವಕಾಶ ಮಾಡಿಕೊಡಬೇಕು ಎಂದು ಮುಸ್ಲಿಮರು ಆಗ್ರಹಿಸಿದ್ದಾರೆ.

ಏನಿದು ಯೋಜನೆ?: ತಿಟ್ಟಮಾರನಹಳ್ಳಿ ರೈಲ್ವೆ ಮೇಲ್ಸೇತುವೆ ನಿರ್ಮಾಣಕ್ಕೂ ಮುನ್ನ ಈ ಆರ್​.ಕೆ.ಗೇಟ್​ ಮೂಲಕವೇ ಈ ಭಾಗದ ವಾಹನ ಸವಾರರು ಸಂಚರಿಸುತ್ತಿದ್ದರು. ಆದರೆ, ಮೇಲ್ಸೇತುವೆ ನಿರ್ಮಾಣದ ಬಳಿಕ ಇಲ್ಲಿನ ರಸ್ತೆಯನ್ನು ಬಂದ್​ ಮಾಡಲಾಗಿದ್ದು, ಸದ್ಯ ಇಲ್ಲಿಂದ ಯಾವುದೇ ಗ್ರಾಮಗಳಿಗೆ ವಾಹನಗಳು ಸಂಚರಿಸುತ್ತಿಲ್ಲ. ಆದರೆ, ಕೋಟೆ ಭಾಗದ ಮುಸ್ಲಿಂ ಸಮುದಾಯದ ಕಬ್ರಸ್ಥಾನ್​ ಈ ಹಳೆ ರಸ್ತೆಯಲ್ಲಿರುವುದರಿಂದ ರೈಲ್ವೆ ಹಳಿ ದಾಟಿಕೊಂಡು ಕಬ್ರಸ್ಥಾನ್​ಗೆ ಹೋಗಬೇಕಿದೆ. ಇದೀಗ, ಆರ್​.ಕೆ.ಗೇಟ್​ಅನ್ನು ಸಂಪೂರ್ಣವಾಗಿ ಬಂದ್​ ಮಾಡಲು ಮುಂದಾಗಿರುವ ರೈಲ್ವೆ ಇಲಾಖೆ, ಇಲ್ಲಿನ ಮುಸ್ಲಿಂ ಸ್ಮಶಾನಕ್ಕೆ ಹೋಗಲು ಅನುಕೂಲ ಮಾಡಿಕೊಡಲು ರೈಲ್ವೆ ಅಂಡರ್​ಪಾಸ್​ ನಿರ್ಮಾಣಕ್ಕೆ ಮುಂದಾಗಿದ್ದು, ಇದಕ್ಕೆ ಪರ ಹಾಗೂ ವಿರೋಧ ಕೇಳಿಬಂದಿದೆ.

ನಿವೃತ್ತ ಉಪ ಪ್ರಾಂಶುಪಾಲ ಚ.ಶಿ.ವೆಂಕಟೇಗೌಡ ಮಾತನಾಡಿ, ರೈಲ್ವೆ ಸಚಿವ ಸೋಮಣ್ಣ ಹಾಗೂ ಸಂಸದ ಡಾ. ಸಿ.ಎನ್​.ಮಂಜುನಾಥ್​ ಈ ಯೋಜನೆಯನ್ನು ಕೂಡಲೇ ರದ್ದು ಮಾಡಬೇಕು. ಇಲ್ಲವೇ ಉಗ್ರ ಪ್ರತಿಭಟನೆ ಮಾಡುತ್ತೇವೆ ಎಂದು ಎಚ್ಚರಿಕೆ ನೀಡಿದರು. ಇವರ ಮಾತಿಗೆ ಕುವೆಂಪು ಕಾಲೇಜಿನ ನಿವೃತ್ತ ಪ್ರಾಂಶುಪಾಲ ರಮೇಶ್​, ನಗರಸಭಾ ಮಾಜಿ ಸದಸ್ಯ ಮಧು, ಮುಖಂಡರಾದ ಉಮೆಶ್​ ಶ್ಯಾಂಸುಂದರ್​, ಪೊಲೀಸ್​ ನಾಗಣ್ಣ, ಕೇಬಲ್​ ರವಿ, ನಾಗೇಶ್​, ಮನು, ಲೋಕೇಶ್​ ಹಾಗೂ ಹಲವರು ಧ್ವನಿಗೂಡಿಸಿದರು.

ಈ ಜಾಗದಲ್ಲಿ ಅಂಡರ್​ ಪಾಸ್​ ಅವೈಜ್ಞಾನಿಕ ಮತ್ತು ಅನಗತ್ಯವೂ ಆಗಿರುವುದರಿಂದ ಇಲ್ಲಿನ ಸ್ಥಳಿಯ ನಿವಾಸಿಗಳು ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ. ಈ ಗೇಟ್​ನಿಂದ ಮುಂದೆ ಯಾವುದೇ ಗ್ರಾಮಗಳಿಗೂ ಸಂಪರ್ಕವಿಲ್ಲ. ಕೇವಲ ಸ್ಮಶಾನಕ್ಕೆ ದಾರಿ ಮಾಡಲು ಕೋಟ್ಯಂತರ ರೂ. ಖರ್ಚು ಮಾಡಿ ಅಂಡರ್​ ಪಾಸ್​ ಮಾಡಲಾಗುತ್ತಿದೆ ಎಂಬುದು ಇವರ ಆರೋಪ. ಈ ಸ್ಮಶಾನಕ್ಕೆ ಬರಲು ತಿಟ್ಟಮಾರನಹಳ್ಳಿ ರೈಲ್ವೆ ಮೇಲ್ಸೇತುವೆ ಪಕ್ಕದಲ್ಲೆ ಹಳೆ ದೊಡ್ಡ ರಸ್ತೆ ಇದೆ. ಆ ಮಾರ್ಗದಲ್ಲಿ ಅವರು ಸ್ಮಶಾನಕ್ಕೆ ಬರಬಹುದು. ಇಲಾಖೆ ಹಳೆ ರಸ್ತೆಯನ್ನೇ ಅಭಿವೃದ್ಧಿ ಮಾಡಿಕೊಡಲಿ.

ಇನ್ನೊಂದೆಡೆ ಆರ್​.ಕೆ.ಗೇಟ್​ ಬಳಿ ಇರುವ ಮುಸ್ಲಿಂ ಸಮುದಾಯದ ಕಬ್ರಸ್ಥಾನ್​ಗೆ ಪರ್ಯಾಯ ರಸ್ತೆ ನಿರ್ಮಿಸಿಕೊಟ್ಟರೆ, ರೈಲ್ವೆ ಅಂಡರ್​ಪಾಸ್​ ನಿರ್ಮಾಣದ ವಿಚಾರದಲ್ಲಿ ನಮ್ಮಯಾವುದೇ ತಕಾರಾರು ಇಲ್ಲ ಎಂದು ನಗರಸಭೆ ಮಾಜಿ ಅಧ್ಯ ವಾಸಿಲ್​ ಅಲಿಖಾನ್​ ಸ್ಪಷ್ಟಪಡಿಸಿದ್ದಾರೆ. ಈ ವಿಚಾರಕ್ಕೆ ಸಂಬಂಧಿಸಿದಂತೆ ನಗರದಲ್ಲಿ ಕೋಟೆಯ ಅಸ್ಲಂ ಬೀಡಿ ಬಾಬು ನಿವಾಸದಲ್ಲಿ ಕರೆದಿದ್ದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಇಲ್ಲಿನ ಸ್ಥಳಿಯ ನಿವಾಸಿಗಳಿಗೆ ಯಾವುದೇ ತೊಂದರೆಯಾಗದಂತೆ ಕೆಳಗೆ ಇಳಿದು ನಡೆದುಕೊಂಡು ಹೋಗುವ ರೀತಿಯಲ್ಲಿ ಅಂಡರ್​ಪಾಸ್​ ನಿರ್ಮಿಸಲು ಅಧಿಕಾರಿಗಳು ಸರ್ವೇ ಮಾಡಿಕೊಂಡು ಹೋಗಿದ್ದಾರೆ. ಅಧಿಕಾರಿಗಳ ಸರ್ವೇಯಂತೆ ನಮಗೆ ಅಂಡರ್​ಪಾಸ್​ ನಿರ್ಮಿಸಿಕೊಟ್ಟರೆ ಸಾಕು.., ಇಲ್ಲದಿದ್ದರೆ ಸ್ಮಶಾನಕ್ಕೆ ಬರಲು ಪರ್ಯಾಯ ರಸ್ತೆಯನ್ನಾದರೂ ನಿರ್ಮಿಸಿಕೊಟ್ಟರೆ ನಮ್ಮ ಸಮುದಾಯದಿಂದ ಯಾವುದೇ ತಕರಾರು ಇಲ್ಲ ಎಂದರು.

ಬಹಳ ವರ್ಷಗಳಿಂದ ನಾವು ಹಾಗೂ ಹಿಂದೂ ಸಮುದಾಯದವರು ಅಣ್ಣ&ತಮ್ಮಂದಿರಂತೆ ಬಾಳುತ್ತಿದ್ದೇವೆ. ರೈಲ್ವೆ ಅಂಡರ್​ಪಾಸ್​ ವಿಚಾರದಲ್ಲಿ ನಮ್ಮ ಯಾವುದೇ ತಕರಾರು ಇಲ್ಲ. ಶವ ಸಂಸ್ಕಾರದ ಸಂದರ್ಭದಲ್ಲಿ ಸ್ಮಶಾನಕ್ಕೆ ತೆರಳುವ ರಸ್ತೆಯನ್ನಾದರೂ, ಇಲ್ಲವಾದರೆ ಇಲ್ಲಿರುವ ನಿವಾಸಿಗಳಿಗೆ ಯಾರಿಗೂ ತೊಂದರೆಯಾಗದಂತೆ ಕೆಳಗೆ ಇಳಿದು ನಡೆದುಕೊಂಡು ಹೋಗುವ ರೀತಿಯಲ್ಲಾದರೂ ಅಂಡರ್​ಪಾಸ್​ಅನ್ನು ನಿರ್ಮಿಸಿಕೊಡಲು ಸಹಕಾರ ನೀಡಬೇಕು ಎಂದು ಮನವಿ ಮಾಡಿದರು.

ಕೋಟೆಯ ಜಾಮೀಯ ಮಸೀದಿ ಅಧ್ಯ ಅಬ್ದುಲ್​ ಖದೀರ್​, ಮದೀನಾ ಮಸೀದಿಯ ಅಧ್ಯ ಎಜಾಜ್​, ನಗರಸಭೆ ಮಾಜಿ ಅಧ್ಯ ಸೊಯಬ್​, ಅಸ್ಲಂ ಬೀಡಿ ಬಾಬು ಇದ್ದರು.