ಗುಡಿಸಲಿಗೆ ಬೆಂಕಿ ಹಚ್ಚಿ ತಾಯಿ, ಮಗನ ಮೇಲೆ ಹಲ್ಲೆ

ತಾಮಸಂದ್ರದ ಸರ್ವೇ ನಂ.80ರ ಗೋಮಾಳದ ಜಾಗದಲ್ಲಿ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡದ ಫಲಾನುಭವಿಗಳಿಗೆ ಸರ್ಕಾರದಿಂದ ಜಮೀನು ಮಂಜೂರಾಗಿತ್ತು. ಅದರಂತೆ ಸಿದ್ದಗಂಗಮ್ಮ ತಮಗೆ ಮಂಜೂರಾಗಿದ್ದ 1 ಎಕರೆ 21 ಗುಂಟೆ ಜಮೀನಿನಲ್ಲಿ ಗುಡಿಸಲು ನಿರ್ಮಿಸಿಕೊಂಡು ಪುತ್ರ ಸತೀಶ್​ ಜತೆ ವಾಸವಾಗಿದ್ದರು.

ಮಂಗಳವಾರ ಬೆಳಗ್ಗೆ ಗ್ರಾಮದ ತಿಮ್ಮಪ್ಪ, ಮಹದೇವಮ್ಮ ಹಾಗೂ ಅವರ ಮಕ್ಕಳಾದ ಕೃಷ್ಣ ಮತ್ತು ವೆಂಕಟೇಶ್​ ಎಂಬುವವರು ಜಮೀನಿನ ಬಳಿ ಬಂದು ಏಕಾಏಕಿ ದೌರ್ಜನ್ಯ ಎಸಗಿದ್ದಾರೆ. ಆರೋಪಿಗಳು ನಡೆಸಿದ ಭೀಕರ ಹಲ್ಲೆಯಿಂದಾಗಿ ಸಿದ್ದಗಂಗಮ್ಮ ಅವರ ಪುತ್ರ ಸತೀಶ್​ ಅವರ ಕೈಬೆರಳು ತುಂಡಾಗಿದೆ. ಮಗನನ್ನು ಕಾಪಾಡಲು ಹೋದ ಸಿದ್ದಗಂಗಮ್ಮ ಮೇಲೂ ತೀವ್ರವಾಗಿ ಹಲ್ಲೆ ನಡೆಸಲಾಗಿದೆ.

ಹಲ್ಲೆಯಷ್ಟೇ ಅಲ್ಲದೆ, ಸಿದ್ದಗಂಗಮ್ಮ ವಾಸವಿದ್ದ ಗುಡಿಸಲಿಗೆ ಆರೋಪಿಗಳು ಬೆಂಕಿ ಹಚ್ಚಿದ್ದಾರೆ. ಪರಿಣಾಮ ಮನೆಯಲ್ಲಿದ್ದ ದವಸ&ಧಾನ್ಯಗಳು ಹಾಗೂ ಗೃಹೋಪಯೋಗಿ ವಸ್ತುಗಳು ಸಂಪೂರ್ಣವಾಗಿ ಸುಟ್ಟು ಕರಕಲಾಗಿವೆ. ಗಾಯಾಳು ಸತೀಶ್​ ಅವರನ್ನು ಕನಕಪುರ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ.

ಸಿದ್ದಗಂಗಮ್ಮ ನೀಡಿದ ದೂರಿನ ಮೇರೆಗೆ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.