ಅಂಗವಿಕಲೆಗೆ ಕಿರುಕುಳ ನೀಡಿದವನ ಬಂಧನ

ಬೆಂಗಳೂರು ಕಾಮಾ ಪಾಳ್ಯ ಬಾರ್​ ಒಂದರಲ್ಲಿ ಕೆಲಸ ಮಾಡುವ ರಮೇಶ್​(32) ಬಂಧಿತ. ಈತ ಮೂರು ತಿಂಗಳಿಂದ ಫೋಟೋ, ವಿಡಿಯೋಗಳನ್ನು ಕಳುಹಿಸುತ್ತಿದ್ದ, ಪದೇಪದೆ ವಿಡಿಯೋ ಕರೆ ಮಾಡಿ ಕಿರುಕುಳ ನೀಡುತ್ತಿದ್ದಾನೆ ಎಂದು ಯುವತಿ ಗ್ರಾಮಾಂತರ ಠಾಣೆಯಲ್ಲಿ ದೂರು ದಾಖಲಿಸಿದ್ದರು.

ಇದಕ್ಕೂ ಮುನ್ನ ಮಂಡ್ಯ ಜಿಲ್ಲೆ ಕುರುಬರದೊಡ್ಡಿಯ ಮಂಜುನಾಥ್​ ಎಂಬಾತ ಸ್ನೇಹ ಬೆಳೆಸಿ, ಮನೆ ನಿರ್ಮಾಣಕ್ಕೆ ಎಂದು ಹಂತಹಂತವಾಗಿ 3.50 ಲಕ್ಷ ರೂ ಸಾಲ ಪಡೆದು ವಂಚಿಸಿದ್ದಾನೆ, ಹಣ ವಾಪಾಸ್​ ಕೇಳಿದಾಗ ಮಂಜುನಾಥ್​ ಮಾನಸಿಕ ಹಿಂಸೆ ನೀಡುತ್ತಿದ್ದ. ನಂತರ ಆತನ ಸ್ನೇಹಿತ ರಮೇಶ್​ಗೆ ನನ್ನ ದೂರವಾಣಿ ಸಂಖ್ಯೆ ನೀಡಿದ್ದ. ಬಳಿಕ ಆತನೂ ಅಶ್ಲೀಲ ವಿಡಿಯೋ ಕಳುಹಿಸುವುದಲ್ಲದೇ ಅವಾಚ್ಯವಾಗಿ ಕಿರುಕುಳ ನೀಡುತ್ತಿದ್ದಾನೆ ಎಂದು ನೊಂದ ಯುವತಿ ದೂರು ನೀಡಿದ್ದರು.

ರಮೇಶ್​ ಬೆಂಗಳೂರು ಕಾಮಾಪಾಳ್ಯದಲ್ಲಿ ಇರುವ ಖಚಿತ ಮಾಹಿತಿ ಆಧರಿಸಿ ಗ್ರಾಮಾಂತರ ಠಾಣಾ ಸಬ್​ ಇನ್​ಸ್ಪೆಕ್ಟರ್​ ಆಕಾಶ್​ ಮತ್ತು ಸಿಬ್ಬಂದಿ ಆರೋಪಿಯನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.