ಶಾಸಕರೇ ನೋಡಿ... ಕಾಂಪೌಂಡ್​ ಕುಸಿಯುತ್ತಿದೆ!

ಪಟ್ಟಣದ ಹೃದಯಭಾಗದಲ್ಲಿರುವ ಜಿಜಿಎಂಎಸ್​ ಶಾಲೆಯ ಕಾಂಪೌಂಡ್​ ಶಿಥಿಲಗೊಂಡು, ರಸ್ತೆಗೆ ವಾಲಿದೆ. ಅದಕ್ಕೆ ಆಸರೆಯಾಗಿ ಮರಗಳು ನಿಂತಿದ್ದು, ಮರಗಳಿಲ್ಲದಿದ್ದರೆ ಗೋಡೆ ಎಂದೋ ಬೀಳುತ್ತಿತ್ತು. ಇನ್ನು ಮರಗಳ ಕೆಲ ಬೇರುಗಳು ಗೋಡೆಯನ್ನು ಬುಡಮೇಲು ಮಾಡುತ್ತಿದ್ದರೂ ಅಧಿಕಾರಿಗಳು ಮಾತ್ರ ಕಣ್ಮುಚ್ಚಿ ಕುಳಿತಿದ್ದಾರೆ. ಶಿಥಿಲ ಗೋಡೆಯನ್ನು ತೆರವುಗೊಳಿಸಿ, ಹೊಸದಾಗಿ ನಿರ್ಮಾಣಕ್ಕೆ ಇಲಾಖೆ ಕ್ರಮವಹಿಸುತ್ತಿಲ್ಲ. ಕಾಂಪೌಂಡ್​ ಬಿದ್ದು ಯಾರಾದರೂ ಹೆಣವಾದ ಮೇಲೆ ಅನುದಾನ ಬಿಡುಗಡೆ ಮಾಡುವ ಲೆಕ್ಕಾಚಾರದಲ್ಲಿ ಅಧಿಕಾರಿಗಳು ಇದ್ದಂತಿದೆ ಎಂದು ಮಕ್ಕಳ ಪಾಲಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಬೆಂಗಳೂರಿನ ಬೌರಿಂಗ್​ ಆಸ್ಪತ್ರೆ ಗೋಡೆ ಕುಸಿದು ಅಮಾಯಕರು ಬಲಿಯಾದ ಕಹಿ ನೆನಪು ಇನ್ನೂ ಮಾಸಿಲ್ಲ. ರಾಜಧಾನಿಗೆ ಸಮೀಪದಲ್ಲೇ ಇರುವ ಮಾಗಡಿ ಪಟ್ಟಣದ ಈ ರಸ್ತೆಯಲ್ಲಿ ನಿತ್ಯ ಸಾವಿರಾರು ನಾಗರಿಕರು ಸಂಚರಿಸುತ್ತಾರೆ. ಈಗ ರಸ್ತೆಯ ಪಕ್ಕದಲ್ಲೇ ಕಾಂಪೌಂಡ್​ ಅಪಾಯಕಾರಿಯಾಗಿ ಬಾಗಿದ್ದು, ಅಪ್ಪಿತಪ್ಪಿ ಉರುಳಿದರೆ ಅನಾಹುತ ಖಚಿತ. ಅನಾಹುತ ನಡೆದ ಮೇಲೆ ಬಂದು ಕಣ್ಣೀರು ಹಾಕುವ ಬದಲು, ಈ ಕೂಡಲೇ ಗೋಡೆ ತೆರವುಗೊಳಿಸಬೇಕು ಎಂದು ಪಟ್ಟಣವಾಸಿಗಳು ಆಗ್ರಹಿಸಿದ್ದಾರೆ.

ಮಕ್ಕಳನ್ನು ಹೇಗೆ ಕಳುಹಿಸೋಣ?

ಸರ್ಕಾರಿ ಶಾಲೆಗೆ ಮಕ್ಕಳನ್ನು ಸೇರಿಸಿ, ಶಾಲೆ ಉಳಿಸಿ ಎಂದು ಬೀದಿಗೆ ಇಳಿದು ಜಾಗೃತಿ ಮೂಡಿಸುವ ಅಧಿಕಾರಿಗಳು, ಮತ್ತೊಂದೆಡೆ ಮಕ್ಕಳ ಜೀವಕ್ಕೆ ಸಂಚಕಾರ ತರುವ ಶಿಥಿಲ ಕಟ್ಟಡಗಳನ್ನು ಹಾಗೆಯೇ ಬಿಟ್ಟಿರುವುದು ದ್ವಂದ್ವ ನೀತಿಯಾಗಿ ಕಾಣುತ್ತಿದೆ. ಶಾಲೆಯ ಗೋಡೆ ಬೀಳುವ ಸ್ಥಿತಿಯಲ್ಲಿದ್ದರೆ ಪಾಲಕರು ಯಾವ ಧೈರ್ಯದ ಮೇಲೆ ಮಕ್ಕಳನ್ನು ಶಾಲೆಗೆ ಕಳುಹಿಸುತ್ತಾರೆ? ದಾಖಲಾತಿ ಕುಸಿಯುತ್ತಿದೆ ಎಂದು ಕೂಗಾಡುವ ಮೊದಲು, ಶಾಲೆಯ ಪರಿಸರವನ್ನು ಸುರತವಾಗಿಸಿ ಎಂದು ಜನ ತಿಳಿಹೇಳುತ್ತಿದ್ದಾರೆ.

ಶಾಸಕ ಎಚ್​.ಸಿ.ಬಾಲಕೃಷ್ಣಗೆ ಪಟ್ಟಣ ಮಧ್ಯಭಾಗದಲ್ಲಿರುವ ಈ ಅಪಾಯ ಕಾಣುಸುತ್ತಿಲ್ಲವೇ?. ಅಧಿಕಾರಿಗಳು ಕುರುಡರಾಗಿದ್ದರೂ, ಜನಪ್ರತಿನಿಧಿಗಳಾದರೂ ಎಚ್ಚೆತ್ತುಕೊಳ್ಳಬೇಕಲ್ಲವೇ?. ಬೇಸಿಗೆ ರಜೆ ಮುಗಿದು, ತರಗತಿಗಳು ಪುನರಾರಂಭಕ್ಕೂ ಮುನ್ನ ತಡೆಗೋಡೆಯನ್ನು ಕೆಡವಿ, ಹೊಸ ಗೋಡೆ ನಿರ್ಮಿಸಬೇಕು. ಇಲ್ಲದಿದ್ದರೆ ಮಕ್ಕಳನ್ನು ಶಾಲೆಗೆ ಕಳುಹಿಸದೆ ಪ್ರತಿಭಟನೆ ಹಮ್ಮಿಕೊಳ್ಳುತ್ತೇವೆ ಎಂದು ಪಾಲಕರು ಎಚ್ಚರಿಕೆ ನೀಡಿದ್ದಾರೆ.

"

ಶಾಲೆಯಲ್ಲಿ ಬಹುತೇಕ ವಿದ್ಯಾರ್ಥಿಗಳು ರೈತರು ಹಾಗೂ ತೀರ ಬಡವರ ಮಕ್ಕಳೇ ವಿದ್ಯಾಭ್ಯಾಸ ಮಾಡುತ್ತಿದ್ದಾರೆ. ಮಕ್ಕಳಿಗೆ ಸುರಕ್ಷತೆ ಇಲ್ಲದಿದ್ದರೆ ಹೇಗೆ?. ತುರ್ತಾಗಿ ಕಾಂಪೌಡ್​ ತೆರವುಗೊಳಿಸಬೇಕು. ಇದು ಸಾಧ್ಯವಿಲ್ಲ ಎಂದು ಶಿಕ್ಷಣ ಇಲಾಖೆ ತಿಳಿಸಿದರೆ ಖುದ್ದಾಗಿ ರೈತಸಂವೇ ತೆರವುಗೊಳಿಸಿ ಹೊಸ ಕಾಂಪೌಡ್​ ನಿರ್ಮಿಸುತ್ತದೆ.

— > ಹೋಸಪಾಳ್ಯ ಲೋಕೇಶ್​ ತಾಲೂಕು ರೈತ ಸಂದ ಅಧ್ಯಕ್ಷ