ಗ್ಯಾಸ್​ ರೀಫಿಲ್ಲಿಂಗ್​ ದಂಧೆಕೋರರಿಗೆ ಖಾಕಿ ಶಾಕ್​

ಖಚಿತ ಮಾಹಿತಿ ಮೇರೆಗೆ ಪಿಎಸ್​ಐ ದೇವರಾಜು ಹಾಗೂ ಸಿಬ್ಬಂದಿ ದಾಳಿ ಮಾಡಿದ್ದು, ದಂಧೆಯಲ್ಲಿದ್ದ ನಾಲ್ವರ ಪೈಕಿ ಮೂವರು ತಪ್ಪಿಸಿಕೊಂಡಿದ್ದು, ಬೆಂಗಳೂರಿನ ನಾಗಸಂದ್ರದ ಮಹದೇವ ಎಂಬಾತನನ್ನು ಬಂಧಿಸಲಾಗಿದೆ.

ಬೆಂಗಳೂರಿನ ಪೀಣ್ಯದಿಂದ ಗೃಹ ಬಳಕೆ ಗ್ಯಾಸ್​ ಸಿಲಿಂಡರ್​ಗಳನ್ನು ತಂದು 4 ಕೆಜಿಯ ಚಿಕ್ಕ ಸಿಲಿಂಡರ್​ಗಳಿಗೆ ತುಂಬಲಾಗುತಿತ್ತು. ಬಿಡದಿ ಕೈಗಾರಿಕಾ ಪ್ರದೇಶದಲ್ಲಿ ಕಟ್ಟಡ ನಿರ್ಮಾಣ ಹಾಗೂ ಕಾರ್ಖಾನೆಗಳ ಕಟ್ಟಡ ನಿರ್ಮಾಣಕ್ಕೆ ಹೊರ ರಾಜ್ಯಗಳಿಂದ ಬಂದಿರುವ ಕೂಲಿ ಕಾರ್ಮಿಕರು ಈ ಸಿಲಿಂಡರ್​ಗಳನ್ನು ಬಳಕೆ ಮಾಡುತ್ತಿದ್ದರು ಎನ್ನಲಾಗಿದೆ.

ಬಂಧಿತನನನ್ನು ವಿಚಾರಣೆ ಮಾಡಿದಾಗ ಬೆಂಗಳೂರು ಮೂಲದ ಚೇತನ್​ ಎಂಬಾತ ದಂಧೆ ಮಾಡಿಸುತ್ತಿದ್ದ ಎಂದು ತಿಳಿದುಬಂದಿದೆ.

ಪೊಲೀಸರ ದಾಳಿ ವೇಳೆ ಹಲವು ಸಿಲಿಂಡರ್​ಗಳು ಪತ್ತೆಯಾಗಿದ್ದವು. 4 ಕೆಜಿ ತೂಕದ 76 ಭರ್ತಿ ಸಿಲಿಂಡರ್​, 4 ಕೆಜಿಯ 132 ಖಾಲಿ ಸಿಲಿಂಡರ್​, 14 ಕೆಜಿಯ ವಿವಿಧ ಕಂಪನಿಗಳ 33 ತುಂಬಿದ ಸಿಲಿಂಡರ್​ಗಳು , 22 ಖಾಲಿ ಸಿಲಿಂಡರ್​ಗಳು, 19 ಕೆಜಿಯ 20 ಸಿಲಿಂಡರ್​ಗಳು ಹಾಗೂ ರೀಫಿಲ್ಲಿಂಗ್​ ಮಾಡಲು ಬಳಸುವ ಪೈಪ್​, ಪಿನ್​ಗಳು, 2 ತೂಕದ ಯಂತ್ರಗಳು ಹಾಗೂ ಇವುಗಳನ್ನು ಸಾಗಣೆ ಮಾಡಲು ಬಳಕೆ ಮಾಡುತ್ತಿದ್ದ ಎರಡು ಗೂಡ್ಸ್​ ವಾಹನಗಳನ್ನು ವಶಕ್ಕೆ ಪಡೆಯಲಾಗಿದೆ. ಬಿಡದಿ ಠಾಣೆಯಲ್ಲಿ ಶನಿವಾರ ಪ್ರಕರಣ ದಾಖಲಾಗಿದೆ.