ಆನೆ ಹಾವಳಿ ತಡೆಗೆ ಶೀಘ್ರವೇ ಕ್ರಮ

ಕಾಡಾನೆಗಳ ನಿರಂತರ ದಾಳಿಯಿಂದ ಆಕ್ರೋಶಗೊಂಡ ರೈತರು ಗುರುವಾರ ಮುಂಜಾನೆಯಿಂದಲೇ ತಾಲೂಕಿನ ಬಿ.ವಿ.ಹಳ್ಳಿ ಬಳಿ ಸಾತನೂರು ಹೆದ್ದಾರಿ ತಡೆದು ಧರಣಿ ಕುಳಿತಿದ್ದರು. ಕಾಡಾನೆ ಉಪಟಳ ನಿಯಂತ್ರಿಸುವಲ್ಲಿ ಅರಣ್ಯ ಇಲಾಖೆ ವಿಲವಾಗಿದ್ದು, ಅರಣ್ಯ ಸಚಿವರು ಸ್ಥಳಕ್ಕೆ ಬರಲೇಬೇಕು ಎಂದು ಪಟ್ಟು ಹಿಡಿದರು. ಅಧಿಕಾರಿಗಳ ಮನವೊಲಿಕೆಗೂ ಜಗ್ಗದ ರೈತರು ಶನಿವಾರವೂ ಪ್ರತಿಭಟನೆಯನ್ನು ಮುಂದುವರಿಸಿದ್ದರು. ರೈತರ ಹೋರಾಟಕ್ಕೆ ಜೆಡಿಎಸ್ ಯುವ ಘಟಕದ ಅಧ್ಯಕ್ಷ ನಿಖಿಲ್ ಕುಮಾರಸ್ವಾಮಿ ಸಾಥ್ ನೀಡಿದರು.

ಈ ವೇಳೆ ಮತ್ತೆ ಪ್ರತಿಭಟನಾನಿರತ ರೈತರ ಜತೆ ದೂರವಾಣಿ ಮೂಲಕ ಮಾತನಾಡಿದ ಎಚ್.ಡಿ.ಕುಮಾರಸ್ವಾಮಿ, ರೈತರು ಬೀದಿಗೆ ಬಂದು ಕೂರುವುದು ನಮಗೆ ಇಷ್ಟವಿಲ್ಲ. ಶೀಘ್ರದಲ್ಲೇ ಕೇಂದ್ರ ಅರಣ್ಯ ಸಚಿವರನ್ನು ಎರಡು ದಿನ ಸಮಯ ಕೇಳಿ ರಾಜ್ಯಕ್ಕೆ ಕರೆತಂದು, ರಾಜ್ಯದ ಸಮಸ್ಯೆಗಳ ಬಗ್ಗೆ ಚರ್ಚಿಸುತ್ತೇನೆ. ಜತೆಗೆ ತಕ್ಷಣಕ್ಕೆ ತಾತ್ಕಾಲಿಕ ಕ್ರಮ ಕೈಗೊಳ್ಳುವಂತೆ ಅರಣ್ಯ ಇಲಾಖೆಗೆ ಸೂಚಿಸಿದ್ದೇನೆ. ರೈತರು ಇಂತಹ ಸುಡು ಬಿಸಿಲಿನಲ್ಲಿ ರಸ್ತೆಯಲ್ಲಿ ಕುಳಿತು ಪ್ರತಿಭಟನೆ ಮುಂದುವರಿಸುವುದು ಬೇಡ. ದಯಮಾಡಿ ಪ್ರತಿಭಟನೆ ಕೈಬಿಡಿ ಎಂದು ಮನವಿ ಮಾಡಿದರು. ಸಚಿವರ ಮನವಿ ಹಿನ್ನೆಲೆಯಲ್ಲಿ ರೈತರು ಪ್ರತಿಭಟನೆ ಹಿಂಪಡೆದರು.

ಕಾಡಾನೆಗಳ ದಾಳಿಯಿಂದ ರೊಚ್ಚಿಗೆದ್ದು, ಪಕ್ಷಾತೀತವಾಗಿ ಈ ಭಾಗದ ರೈತರು ನಡೆಸುತ್ತಿರುವ ಹೋರಾಟದಲ್ಲಿ ಜೆಡಿಎಸ್ ಯುವ ಘಟಕದ ಅಧ್ಯಕ್ಷ ನಿಖಿಲ್ ಕುಮಾರಸ್ವಾಮಿ ಸೇರಿದಂತೆ ಜೆಡಿಎಸ್ ಮುಖಂಡರು ಭಾಗವಹಿಸಿ, ಹಲವು ಗಂಟೆಗಳ ಕಾಲ ರಸ್ತೆಯಲ್ಲಿ ಕುಳಿತು ಸಾಥ್ ನೀಡಿದರು.

ಈ ವೇಳೆ ಮಾತನಾಡಿದ ನಿಖಿಲ್ ಕುಮಾರಸ್ವಾಮಿ, ಕಾಡಾನೆ ದಾಳಿಯಿಂದ ಬೇಸತ್ತ ರೈತರು ಬಿಸಿಲನ್ನೂ ಲೆಕ್ಕಿಸದೆ ನಿರಂತರ ಹೋರಾಟ ಮಾಡುತ್ತಿದ್ದಾರೆ. ರೈತರು ಬದುಕು ಉಳಿಸಿಕೊಳ್ಳಲು ರಸ್ತೆಗೆ ಬರಬೇಕಾ?. ಸ್ವತಃ ಡಿಸಿಎಂ ಅವರೇ ಜಿಲ್ಲೆಯನ್ನು ಪ್ರತಿನಿಧಿಸುತ್ತಿದ್ದರೂ ಯಾವುದೇ ಪ್ರಯೋಜನ ಆಗಿಲ್ಲ. ಕಳೆದ ಹಲವು ವರ್ಷಗಳಿಂದ ಇಲ್ಲಿ ಕಾಡಾನೆ ಸಮಸ್ಯೆ ಇದೆ. ಇದಕ್ಕೆ ಪರಿಹಾರ ಇಲ್ಲವೇ?. ಕಾಡಾನೆ ಹಾವಳಿ ತಡೆಗಟ್ಟುವ ರೈಲ್ವೆ ಬ್ಯಾರಿಕೇಡ್ ಅಳವಡಿಕೆಗೆ 1 ಕಿಮೀಗೆ 1 ಕೋಟಿ ರೂ. ತಗುಲುತ್ತದೆ. ಜಿಲ್ಲೆಯಲ್ಲಿ ಒಟ್ಟು 120 ಕಿಮೀ ರೈಲ್ವೆ ಬ್ಯಾರಿಕೇಡ್ ಆಗಬೇಕು. ಆದರೆ, ಸರ್ಕಾರ ಕಳೆದ ಬಜೆಟ್‌ನಲ್ಲಿ ಇಡೀ ರಾಜ್ಯಕ್ಕೆ ಕೇವಲ 260 ಕೋಟಿ ರೂ. ಮೀಸಲಿಟ್ಟಿದೆ. ಸರ್ಕಾರ ಇನ್ಯಾವ ರೀತಿಯಲ್ಲಿ ಕಾಡಾನೆ ಹಾವಳಿ ತಡೆಯಲು ಸಾಧ್ಯ?. ರೈಲ್ವೆ ಬ್ಯಾರಿಕೇಡ್ ಅಳವಡಿಸಲು 10ರಿಂದ 15 ವರ್ಷ ತೆಗೆದುಕೊಂಡರೆ ರೈತರ ಪರಿಸ್ಥಿತಿ ಏನು? ಸರ್ಕಾರಕ್ಕೆ ಕಿಂಚಿತ್ತಾದರೂ ಮಾನವೀಯತೆ ಇದ್ದರೆ ರೈತರ ಸಮಸ್ಯೆಗೆ ಸ್ಪಂದಿಸಲಿ. ಕಾಡಾನೆ ಹಾವಳಿ ಇಡೀ ರಾಜ್ಯದ ಸಮಸ್ಯೆ. ಈ ಬಗ್ಗೆ ರಾಜ್ಯ ಸರ್ಕಾರ ಏನಾದರೂ ಯೋಚಿಸಿದೆಯೇ ಎಂದು ರಾಜ್ಯ ಸರ್ಕಾರ ವಿರುದ್ಧ ಕಿಡಿಕಾರಿದರು.

ಮುಖಂಡರಾದ ಹಾಪ್‌ಕಾಮ್ಸ್ ದೇವರಾಜು, ಡಿಎಂಕೆ ಕುಮಾರ್, ವಡ್ಡರಹಳ್ಳಿ ರಾಜಣ್ಣ, ನಿಡಗೋಡಿ ಬಾಬು, ಅಮಳ್ಳಿದೊಡ್ಡಿ ಮಹೇಶ್, ಭಾನುಪ್ರಸಾದ್, ಗಿರೀಶ್ ಬಾಬು, ರೈತಸಂಘದ ಅಣಿಗೆರೆ ಮಲ್ಲಯ್ಯ, ಸಿ.ಪುಟ್ಟಸ್ವಾಮಿ, ರಮೇಶ್, ಮಂಗಳಮ್ಮ, ರಮ್ಯಾ, ಪದ್ಮಾ, ಪಂಕಜಾ, ದೊಡ್ಡೇಗೌಡ, ಬಾಲೇಶ್, ಕೆಂಗಲ್ ಮೂರ್ತಿ ಸಿದ್ದರಾಮು, ಶಾನುಭೋಗನಹಳ್ಳಿ ರವಿ ಹಾಗೂ ಇತರರಿದ್ದರು.

ಜನಿವಾರ ತೆಗೆಸಿದ್ದು ಖಂಡನೀಯ: ಸಿಇಟಿ ಪರೀಕ್ಷೆಯಲ್ಲಿ ವಿದ್ಯಾರ್ಥಿಗಳಿಗೆ ಜನಿವಾರ ತೆಗೆಸಿದ ವಿಚಾರಕ್ಕೆ ಪ್ರತಿಕ್ರಿಯಿಸಿದ ನಿಖಿಲ್, ಇಂತಹ ಘಟನೆಗಳು ವಿಷಾದನೀಯ. ಕಳೆದ ವರ್ಷವೂ ಇದೇ ರೀತಿಯ ಘಟನೆ ನಡೆದಿತ್ತು. ಈಗಲೂ ಅಂತಹದ್ದೇ ಘಟನೆ ಮರುಕಳಿಸಿರುವುದು ನಾಚಿಕೆಗೇಡಿನ ಸಂಗತಿ. ಐವರು ವಿದ್ಯಾರ್ಥಿಗಳ ಜನಿವಾರ ತೆಗೆಸಿರೋದು ಖಂಡನೀಯ. ವಿದ್ಯಾರ್ಥಿಗಳಲ್ಲಿ ಯಾರೂ ಒಡಕು ಮೂಡಿಸಬಾರದು ಎಂದು ಸರ್ಕಾರಕ್ಕೆ ತಿವಿದರು.

24 ಸಿಪಿಟಿ ನಿಖಿಲ್