ಡಿಕೆಶಿ ಸಿಎಂ ಆಗೋದು ಗ್ಯಾರಂಟಿ - ಇಕ್ಬಾಲ್ ಪುನರುಚ್ಚಾರ

ರಾಮನಗರ: ಡಿ.ಕೆ.ಶಿವಕುಮಾರ್​ ಅವರು ಜನವರಿ 6 ಇಲ್ಲವೇ 9ಕ್ಕೆ ಮುಖ್ಯಮಂತ್ರಿ ಹುದ್ದೆಗೆ ಏರುವುದು ಶೇ.200ರಷ್ಟು ಖಚಿತ ಎಂದು ರಾಮನಗರ ಶಾಸಕ ಎಚ್​.ಎ.ಇಕ್ಬಾಲ್​ ಹುಸೇನ್​ ಪುನರುಚ್ಚರಿಸಿದ್ದಾರೆ.

ನಗರದಲ್ಲಿ ಸೋಮವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಡಿ.ಕೆ.ಶಿವಕುಮಾರ್​ ಅವರು ಮುಖ್ಯಮಂತ್ರಿ ಆಗುತ್ತಾರೆ ಎನ್ನುವ ವಿಚಾರ ನನ್ನ ಬಾಯಿಂದ ಬಂದದ್ದಲ್ಲ, ನಾವು ನಂಬಿರುವ ಶರಣರ ಬಾಯಿಂದ ಬಂದಿರುವುದು. ಅವರಿಂದ ಮಾಹಿತಿ ಪಡೆದುಕೊಂಡು ನಾನು ಹೇಳಿಕೆ ನೀಡಿದ್ದೇನೆ. ಇದೇ ವಿಶ್ವಾಸ ಇಂದಿಗೂ ಇದ್ದು, ಇದರಿಂದ ಹಿಂದೆ ಸರಿಯುವ ಪ್ರಶ್ನೆಯೇ ಇಲ್ಲ. ಶಿವಕುಮಾರ್​ ಜ.6ಇಲ್ಲವೇ 9ಕ್ಕೆ ಸಿಎಂ ಆಗುವುದು ಖಚಿತ.

ಇಕ್ಬಾಲ್​ ಹುಸೇನ್​ ಮಾತನ್ನು ನಂಬದಂತೆ ಸ್ವತಃ ಡಿ.ಕೆ.ಶಿವಕುಮಾರ್​ ಅವರೇ ಹೇಳಿಕೆ ನೀಡಿದ್ದಾರಲ್ಲ ಎನ್ನುವ ಪ್ರಶ್ನೆಗೆ ಉತ್ತರಿಸಿದ ಶಾಸಕರು, ಅವರು ಏನೇ ಹೇಳಲಿ, ಅವರು ನಮ್ಮ ನಾಯಕರು, ಅವರಿಗೆ ಅವರದ್ಧೇ ಆದ ಒತ್ತಡ ಇದೆ. ಅವರನ್ನು ಬಿಟ್ಟುಕೊಡುವ ಪ್ರಶ್ನೆಯೇ ಇಲ್ಲ. ಈ ವಿಚಾರದಲ್ಲಿ ಹಿಂದೆ ಸರಿಯುವ ಪ್ರಶ್ನೆಯೂ ಇಲ್ಲ. ಈ ಮಾತಿಗೆ ಇಂದಿಗೂ ಬದ್ಧ ಎಂದರು.

ಸಿಎಂ ಆಗಲು ಹೈ ಕಮಾಂಡ್​ ಅವಕಾಶ ನೀಡಲಿದೆಯೇ ಎನ್ನುವ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಇಕ್ಬಾಲ್​ ಹುಸೇನ್​, ಈಗಾಗಲೇ ಒಪ್ಪಂದ ಆಗಿದೆ ಎಂದು ನಮ್ಮ ನಾಯಕರೇ ಹೇಳಿಕೆ ನೀಡಿದ್ದಾರೆ. ಒಪ್ಪಂದ ಆಗಿದ್ದರೆ ಮಾತ್ರ ನಮ್ಮ ನಾಯಕರು ಹೇಳೋಕೆ ಸಾಧ್ಯ. ಒಪ್ಪಂದ ಆಗದಿದ್ದರೆ ಇಲ್ಲ ಎಂದೇ ಹೇಳುತ್ತಿದ್ದರು ಎಂದರು.