ಮಾಗಡಿಯಿಂದ 3 ಕಿಮೀ ಅಂತರದಲ್ಲಿರುವ ಈ ಚಂದೂರಾಯನಹಳ್ಳಿಯಲ್ಲಿ ಚಂದೂರಾಯ ಎಂಬುವರು ಆಳ್ವಿಕೆ ನಡೆಸುತ್ತಿದ್ದ ಕಾರಣ ಗ್ರಾಮಕ್ಕೆ ಈ ಹೆಸರು ಬಂದಿದೆ ಎನ್ನಲಾಗುತ್ತದೆ. ಇಲ್ಲಿ 150ಕ್ಕೂ ಹೆಚ್ಚು ಮನೆಗಳಿವೆ. ಪರಿಶಿಷ್ಟ ಜಾತಿ, ಪಂಗಡ, ವೀರಶೈವ, ಭಜಂತ್ರಿ, ಯಾದವ, ಒಕ್ಕಲಿಗ, ಮರಾಠಿ, ಭೋವಿ... ಹೀಗೆ ಹಲವು ಸಮುದಾಯಗಳು ಸೇರಿ 500ಕ್ಕೂ ಹೆಚ್ಚು ಜನಸಂಖ್ಯೆ, ಈ ಪೈಕಿ 420ಕ್ಕೂ ಅಧಿಕ ಮಂದಿ ಮತದಾನ ಹಕ್ಕು ಹೊಂದಿದ್ದಾರೆ. ಗ್ರಾಮದ ಬಹುತೇಕರು ಕೃಷಿಕರೇ ಆಗಿದ್ದು, ಶಿಕ್ಷಕ, ಆರೋಗ್ಯ ಇಲಾಖೆ ಸೇರಿ ವಿವಿಧ ಇಲಾಖೆಗಳಲ್ಲಿ 30ಕ್ಕೂ ಅಧಿಕ ಮಂದಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಇತರರು ಪಶುಸಂಗೋಪನೆ, ಹೂವು, ಹಣ್ಣು, ತೆಂಗು, ಅಡಕೆ, ಮಾವಿನಂತಹ ವಾಣಿಜ್ಯ ಬೆಳೆ ಬೆಳೆದು ಆದಾಯ ಕಂಡುಕೊಂಡಿದ್ದಾರೆ.
