ನಾಡಪ್ರಭುಗಳ ನೆಚ್ಚಿನ ತಾಣ ಅಚ್ಚಲು ದುರ್ಗ

ರಾಮನಗರ ತಾಲೂಕು ಕೈಲಾಂಚ ಹೋಬಳಿಯ ಹುಣಸನಹಳ್ಳಿ ಗ್ರಾಪಂ ವ್ಯಾಪ್ತಿಯ ಅಚ್ಚಲು ಗ್ರಾಮ ತನ್ನದೇ ಪ್ರಕೃತಿ ಶ್ರೀಮಂತಿಕೆ ಹೊಂದಿದೆ. ಸುಮಾರು 3 ಸಾವಿರ ಹೆಕ್ಟೇರ್​ ವಿಸ್ತಾರ ಹೊಂದಿದ ಗ್ರಾಮ ಜಿಲ್ಲಾ ಕೇಂದ್ರದಿಂದ 3 ಕಿಮೀ ಅಂತರದಲ್ಲಿದೆ. 250ಕ್ಕೂ ಹೆಚ್ಚು ಕುಟುಂಬಗಳಿದ್ದು, ಅಂದಾಜು 1200 ಜನಸಂಖ್ಯೆ ಇದೆ.

ಇಲ್ಲಿನ ಬೆಟ್ಟದಲ್ಲಿ ಪಾಳೇಗಾರರು ಆಡಳಿತ ನಡೆಸಿದ್ದರು, ಮಾಗಡಿ ಕೆಂಪೇಗೌಡರು ಬೇಸಿಗೆ ದಿನ ಕಳೆಯಲು ಇಲ್ಲಿಗೆ ಬರುತ್ತಿದ್ದರು ಎಂಬ ಮಾತಿದೆ.

ಗ್ರಾಮ ಉತ್ತಮ ರಸ್ತೆ ಸಂಪರ್ಕ ಹೊಂದಿದ್ದು, ಕನಕಪುರ&ರಾಮನಗರ ರಾಜ್ಯ ಹೆದ್ದಾರಿಗೆ ಅಂಟಿಕೊಂಡಿದೆ. ಕಾಂಕ್ರೀಟ್​ ಮನೆ, ಸಿಸಿ ರಸ್ತೆ, ವೈಜ್ಞಾನಿಕ ಚರಂಡಿ ವ್ಯವಸ್ಥೆ ಇದೆ. ಅರ್ಕಾವತಿ ನದಿ ಗ್ರಾಮದ ಕೆಳ ಭಾಗದಲ್ಲಿರುವ ಕಾರಣ ನದಿ ಅಕ್ಕಪಕ್ಕದ ಜಮೀನಿಗಷ್ಟೇ ನೀರಾವರಿ ಸೌಲಭ್ಯ ಇದ್ದು, ಮಿಕ್ಕೆಲ್ಲ ಮಳೆಯಾಶ್ರಿತ ಕೃಷಿ ಪ್ರದೇಶವೇ ಹೆಚ್ಚು. ಮಾವು, ರೇಷ್ಮೆ, ತೆಂಗು ಗ್ರಾಮದ ರೈತರ ಪ್ರಮುಖ ವಾಣಿಜ್ಯ ಬೆಳೆಗಳಾಗಿದ್ದು, ಭತ್ತ, ರಾಗಿ ಪ್ರಮುಖ ಬೆಳೆಗಳಾಗಿವೆ.

ಗ್ರಾಮದಲ್ಲಿ 650 ಮತದಾರರಿದ್ದು, 1 ರಿಂದ 5ನೇ ತರಗತಿ ಸರ್ಕಾರಿ ಪ್ರಾಥಮಿಕ ಶಾಲೆ, ಅಂಗನವಾಡಿ, ಡೇರಿ ಇದೆ. ಅರ್ಕಾವತಿ ನದಿಯಿಂದಾಗಿ ಅಂತರ್ಜಲ ಉತ್ತಮವಾಗಿದ್ದು, ನದಿ ಅಂಚಿನ ಜಮೀನುಗಳ ಹೆಚ್ಚಿನ ರೈತರು ಕೃಷಿಯೊಂದಿಗೆ ಹೈನುಗಾರಿಕೆಯತ್ತಲೂ ಮುಖ ಮಾಡಿದ್ದಾರೆ.

ಕನಕಪುರ ರಾಮನಗರ ರಸ್ತೆಯ ಗ್ರಾಮಕ್ಕೆ ಹೊಂದಿಕೊಂಡಂತೆ ಸನಿಹದಲ್ಲೇ ಪ್ರತಿಷ್ಠಿತ ಎರಡು ಕಾರ್ಖಾನೆಗಳಿದ್ದು, ಗ್ರಾಮ ಸೇರಿದಂತೆ ಜಿಲ್ಲೆಯ ನೂರಾರು ಯುವಕರಿಗೆ ಉದ್ಯೋಗ ಸಿಕ್ಕಿದೆ.

ಗ್ರಾಮದ ಪಕ್ಕದಲ್ಲೇ ಎತ್ತರದ ಬೆಟ್ಟವಿದ್ದು, ಸುಂದರ ಪ್ರಕೃತಿ ಸಿರಿ ಕೋಟೆ ಕೊತ್ತಲು ಹೊಂದಿದೆ. ಜಿಲ್ಲಾ ಪ್ರವಾಸಿ ತಾಣಗಳ ಪಟ್ಟಿಯಲ್ಲಿದ್ದರೂ ಪ್ರವಾಸಿತಾಣವಾಗಿಸುವಲ್ಲಿ ಆಡಳಿತ ಸೋತಿದೆ. ನೆಲಮಟ್ಟದಿಂದ ಒಂದು ಸಾವಿರ ಅಡಿಗೂ ಮಿಗಿಲಾದ ಎತ್ತರ ಹೊಂದಿರುವ ಬೆಟ್ಟ ಏಕಶಿಲೆಯಿಂದ ಕೂಡಿದೆ. ಚಾರಣಿಗರಿಗೆ ಉತ್ತಮ ಚಾರಣ ಸ್ಥಳವಾಗಿದೆ. ಬೆಟ್ಟದಲ್ಲಿ ರಾಜರು, ಪಾಳೆಗಾರರು ಆಳ್ವಿಕೆ ಮಾಡಿದ್ದರು, ಸೈನಿಕರು, ಜನವಸತಿ ಇತ್ತೆಂಬುದಕ್ಕೆ ಇಂದಿಗೂ ಬೆಟ್ಟದಲ್ಲಿರುವ ಕಲ್ಲಿನ ಕಟ್ಟಡದ ಕೋಟೆ, ಕಂಬಗಳು, ಅಳಿದುಳಿದ ಮನೆಗಳ ಗುರುತು, ಸುಡು ಬೇಸಿಗೆಯಲ್ಲೂ ತಂಪಾಗಿ ಇರುವ ಸಿಹಿ ನೀರಿನ ಕಲ್ಯಾಣಿ ಇದೆ. ಬಂಡೆ ಮೇಲೆ ಕೆತ್ತಿರುವ ಆಂಜನೇಯ ವಿಗ್ರಹ, ಸುತ್ತಮುತ್ತಲ ಗ್ರಾಮಗಳ ಅನೇಕ ಕುಟುಂಬಗಳು ಇಂದಿಗೂ ಮನೆ ದೇವರಾಗಿ ಪೂಜಿಸಲ್ಪಡತ್ತಿರುವ ಹೊನ್ನಾರುತ್ತಮ್ಮ ದೇವಾಲಯ, ಬೆಟ್ಟ ಹತ್ತಲು ಮೆಟ್ಟಿಲುಗಳನ್ನು ಆ ಕಾಲದಲ್ಲಿಯೇ ಮಾಡಿರುವುದನ್ನು ಕಾಣಬಹುದಾಗಿದೆ. ಇನ್ನು ದಾಖಲೆಗಳಲ್ಲಿ ಅಚ್ಚಲು ದುರ್ಗವೆಂದು ಕರೆಯುವ ಈ ಪ್ರದೇಶ ಹಿಂದೆ ಕೆಂಪೇಗೌಡರ ಆಳ್ವಿಕೆಗೆ ಒಳಪಟ್ಟಿತ್ತು. ಬೇಸಿಗೆಯಲ್ಲಿ ಗೌಡರು ಇದನ್ನು ಗುಪ್ತವಾದ ವಾಸಸ್ಥಳ ಮಾಡಿಕೊಂಡಿದ್ದರು. ಅಶ್ವದಳ, ಸೈನಿಕರ ಅಡಗು ತಾಣವಾಗಿ ಮಾಡಿಕೊಂಡು ಇಲ್ಲಿಂದಲೇ ಆಳ್ವಿಕೆ ನಡೆಸುತ್ತಿದ್ದರೆಂದು ಕೆಲ ಹಿರಿಯರು ಬೆಟ್ಟದ ಇತಿಹಾಸದ ಬಗ್ಗೆ ಬೆಳಕು ಚೆಲ್ಲುತ್ತಾರೆ. ಮತ್ತೆ ಕೆಲವರು ಪಾಳೇಗಾರರು ಆಡಳಿತ ನಡೆಸುತ್ತಿದ್ದರು. ಆದರೆ ಅವರು ಯಾರು ಎಂದು ತಿಳಿದಿಲ್ಲ ಎನ್ನುತ್ತಾರೆ.

ಗ್ರಾಮದ ಪಕ್ಕದ ಬಂಡೆ ಮೇಲೆ ಅಚ್ಚಲಮ್ಮನ ಪಾದವೆಂದು ಪೂಜಿಸಲಾಗುತ್ತದೆ. ಮಳೆ ಬರದ ಸನ್ನಿವೇಶದಲ್ಲಿ ಗ್ರಾಮಸ್ಥರೆಲ್ಲರೂ ಸೇರಿ ವಿಶೇಷ ಪೂಜೆ ನಡೆಸಿ ಪರ ಮಾಡಿದರೆ ಮಳೆ ಬರುತ್ತದೆ ಎಂಬುದು ನಂಬಿಕೆ.

ಗ್ರಾಮದಲ್ಲಿ ಈ ಹಿಂದೆ ಮುಸಲ್ಮಾನರು ಹೆಚ್ಚಾಗಿ ಇದ್ದರಂತೆ. ಆದರೆ ಸದ್ಯ ಅವರ ಒಂದು ಮನೆಯೂ ಗ್ರಾಮದಲ್ಲಿಲ್ಲ. ಎಲ್ಲರೂ ರಾಮನಗರಕ್ಕೆ ಬಹು ವರ್ಷಗಳ ಹಿಂದೆಯೇ ಸೇರಿದ್ದಾರೆೆ. ಸದ್ಯ ಕೆಲ ಪೂರ್ವಿಕರು ಸೇರಿದಂತೆ ಬೇರೆ ಬೇರೆ ಊರಿನಿಂದ ಬಂದು ಇಲ್ಲಿ ನೆಲೆ ಕಂಡುಕೊಂಡಿರುವವರು ಹೆಚ್ಚಿದ್ದಾರೆ. ಅಚ್ಚಲಮ್ಮ ಎಂಬ ದೇವರ ಹೆಸರಿನಿಂದ ಗ್ರಾಮ ನಿರ್ಮಾಣವಾಗಿದೆ ಎಂಬುದು ಹಿರಿಯರ ಮಾತು.

ಆಂಜನೇಯ, ಲ್ಮ, ಬೊಮ್ಮಲಿಂಗೇಶ್ವರ, ಅಚ್ಚಲಮ್ಮ, ಮಾರಮ್ಮ, ಬೆಟ್ಟದ ಆಂಜನೇಯ, ಹೊನ್ನಾರತಮ್ಮ ದೇವಾಲಯಗಳಿವೆ. ಆಯುಧಪೂಜೆ, ಯುಗಾಧಿ, ಗೌರಿ ಗಣೇಶ ಮತ್ತಿತರ ಸಂಧರ್ಭಗಳಲ್ಲಿ ಉತ್ಸವ, ವಿಶೇಷಪೂಜೆ, ಅನ್ನಸಂತರ್ಪಣೆ ಏರ್ಪಡಿಸಲಾಗುತ್ತದೆ.

"

"