ಬಾಗಲೂರು ಜಂಕ್ಷನ್​ನಲ್ಲಿ ಟ್ರಾಫಿಕ್​ ಟೆನ್ಶನ್​!

ವೆಂಕಟಾಚಲಪತಿ ಯಲಹಂಕ  

ಉದ್ಯಾನನಗರಿ ಎಂದರೆ ಮೆಚ್ಚಿಕೊಳ್ಳುವ ದಿನಗಳಿದ್ದವು, ಆದರೆ ಈಗ ಮೂಗು ಮುರಿಯುವವರೇ ಜಾಸ್ತಿ. ಗುಂಡಿ ಬಿದ್ದಿರುವ ರಸ್ತೆಗಳು, ವಾಹನಗಳ ಅಡ್ಡಾದಿಡ್ಡಿ ಓಡಾಟ ಹೀಗೆ ನಾನಾ ಸಮಸ್ಯೆಗಳ ನಡುವೆಯೇ ಜನರು ಜೀವನ ಸವೆಸಬೇಕಿದೆ. ಜನಸಂಖ್ಯೆ ಹೆಚ್ಚಳದಿಂದ ವಾಹನಗಳ ಸಂಖ್ಯೆಯೂ ಹೆಚ್ಚುತ್ತಿರುವುದರಿಂದ ಸಮಸ್ಯೆ ಹಿಡಿತ ತಪ್ಪಿ ಬೆಳೆಯುತ್ತಿದೆ. ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುವ ಬಳ್ಳಾರಿ ರಸ್ತೆಯ ಬಾಗಲೂರು ಜಂಕ್ಷನ್​  ಈ ಜಂಜಾಟದಿಂದ ನಿತ್ಯವೂ ನಲುಗುತ್ತಿದೆ.

ಬಾಗಲೂರು ಕ್ರಾಸ್​ ಮಾರ್ಗವಾಗಿ ದೇವನಹಳ್ಳಿ ಕಡೆ ಸಂಚರಿಸುವವರು ವಾಹನದಟ್ಟಣೆಯ ಕಿರಿಕಿರಿಯಿಂದ ತೊಳಲಾಡುವಂತಾಗಿದೆ. ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ಹೋಗಬೇಕಾದರೆ ಸವಾರರು ಕನಿಷ್ಠ 30 ನಿಮಿಷದಿಂದ ಗಂಟೆಯವರೆಗೂ ಟ್ರಾಫಿಕ್​ ಜಾಮ್​ನಲ್ಲಿ ಸಿಲುಕುತ್ತಿದ್ದಾರೆ. ಕೆಲ ಸಂದರ್ಭದಲ್ಲಿ ಆಂಬುಲೆನ್ಸ್​ಗಳು ಸಕಾಲದಲ್ಲಿ ಆಸ್ಪತ್ರೆಗೆ ತಲುಪಲಾಗುವುದಿಲ್ಲ!

ಮುಖ್ಯರಸ್ತೆಯ ಎರಡೂ ಬದಿಯ ಸರ್ವೀಸ್​ ರಸ್ತೆಗಳಲ್ಲೂ ವಾಹನದಟ್ಟಣೆ ಇರುತ್ತದೆ. ಈ ಮಾರ್ಗದಲ್ಲಿ ಖಾಸಗಿ ಕಂಪನಿಗಳು, ಶಾಲಾ&ಕಾಲೇಜುಗಳು, ವಾಣಿಜ್ಯ ಮಳಿಗೆಗಳಿದ್ದು, ಕಾರ್ಮಿಕರನ್ನು ಕರೆತರಲು ಕ್ಯಾಬ್​ಗಳು ಬರುತ್ತವೆ. ಜತೆಗೆ ಶಾಲಾ ವಾಹನಗಳು, ಖಾಸಗಿ ವಾಹನಗಳು ಏಕಕಾಲದಲ್ಲಿ ಸಂಚರಿಸುವುದರಿಂದ ದಟ್ಟಣೆಯು ನರಕಯಾತನೆಯಾಗಿದೆ. ಯಾರೊಬ್ಬರೂ ಸರಿಯಾದ ಸಮಯಕ್ಕೆ ನಿಗದಿತ ಸ್ಥಳವನ್ನು ತಲುಪುವ ಗ್ಯಾರಂಟಿ ಇಲ್ಲ. 

ಎಲಿವೇಟೆಡ್​ ರಸ್ತೆಯಲ್ಲಿ ಜಾರಿಯಲ್ಲಿದ್ದ ಏಖಮುಖ ಸಂಚಾರವನ್ನು ರದ್ದುಗೊಳಿಸಿರುವುದರಿಂದ ಸ್ಥಳಿಯರಿಂದ ಅಕ್ಷೇಪ ವ್ಯಕ್ತವಾಗಿದೆ. ಒಂದು ಬಾರಿ ವಾಹನಗಳ ದಟ್ಟಣೆ ಜಾಸ್ತಿ ಆಯಿತೆಂದರೆ ಅದನ್ನು ನಿಯಂತ್ರಿಸುವುದು ಸಂಚಾರ ಪೊಲೀಸರಿಗೆ ಸವಾಲಿನ ಕೆಲಸವಾಗಿದೆ. ರದ್ದುಗೊಳಿಸಿರುವ ಏಕಮುಖ ಸಂಚಾರವನ್ನು ಮತ್ತೆ ಜಾರಿಗೊಳಿಸಬೇಕು ಎಂಬುದು ಸಾರ್ವಜನಿಕರ ಒತ್ತಾಯವಾಗಿದೆ.

ಯಲಹಂಕದಿಂದ ಹುಣಸಮಾರನಹಳ್ಳಿಗೆ ಹೋಗಲು ಈ ಹಿಂದೆ ಕನಿಷ್ಠ 20 ನಿಮಿಷ ಸಾಕಾಗುತ್ತಿತ್ತು. ಆದರೆ ಈಗ 1ರಿಂದ ಒಂದೂವರೆ ತಾಸು ಬೇಕಾಗುತ್ತದೆ. ಎರಡೂ ಬದಿಯ ಸರ್ವೀಸ್​ ರಸ್ತೆಯಲ್ಲಿ ವಾಹನಗಳನ್ನು ನಿಲ್ಲಿಸುವುದರಿಂದ ಸಮಸ್ಯೆ ಉಲ್ಬಣಗೊಂಡಿದೆ. ಬಾಗಲೂರು ರಸ್ತೆಯಲ್ಲಿ ಸಿಗ್ನಲ್​ ದೀಪಗಳನ್ನು ಅಳವಡಿಸಿದ್ದರೂ ಸಂಚಾರಸಿಕ್ಕು ವೃದ್ಧಿಸುತ್ತಲೇ ಇದೆ. ವೈಜ್ಞಾನಿಕ ಕ್ರಮಗಳನ್ನು ಕೈಗೊಂಡರೆ ವಾಹನಗಳ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಡಬಹುದು ಎಂಬುದು ಸ್ಥಳಿಯ ಅಭಿಪ್ರಾಯ.

ಬಾಗಲೂರು ಜಂಕ್ಷನ್​ ಸಮೀಪ ವಾಹನಗಳ ದಟ್ಟಣೆ ಹೆಚ್ಚಾಗುತ್ತಿರುವುದು ಗಮನಕ್ಕೆ ಬಂದಿದ್ದು, ಹಿರಿಯ ಅಧಿಕಾರಿಗಳ ಜತೆ ಚರ್ಚಿಸಿ ಸಮಸ್ಯೆಯನ್ನು ಬಗೆಹರಿಸಲು ಕ್ರಮವಹಿಸಲಾಗುವುದು ಎಂದು ಯಲಹಂಕ ಸಂಚಾರ ಠಾಣೆ  ಇನ್​ಸ್ಪೆಕ್ಟರ್​ ಹೇಳಿದ್ದಾರೆ. 

ಕೋಟ್​:

ಸರ್ವೀಸ್​ ರಸ್ತೆಗಳಲ್ಲಿ ಪಾರ್ಕಿಂಗ್​ ಮಾಡುವುದರಿಂದ ವಾಹನಗಳು ಸರಾಗವಾಗಿ ಸಂಚರಿಸಲು ಅನಾನುಕೂಲವಾಗುತ್ತಿದೆ. ವಾಹನಗಳ ದಟ್ಟಣೆಯಿಂದ ನಿತ್ಯ ತೊಂದರೆಯಾಗುತ್ತಿದೆ.