ಜೇನು ಕೃಷಿ ವಿಸ್ತರಣೆಗೆ ಸರ್ಕಾರ ಸಬ್ಸಿಡಿ ನೀಡಲಿ

ಬೆಂಗಳೂರು ಕೃಷಿ ವಿಶ್ವವಿದ್ಯಾಲಯದ (ಯುಎಎಸ್-ಬಿ) ಜೇನು ಕೃಷಿ ವಿಭಾಗ ಜಿಕೆವಿಕೆಯಲ್ಲಿ ಬುಧವಾರ ಆಯೋಜಿಸಿದ್ದ ವಿಶ್ವ ಜೇನು ಕೃಷಿ ದಿನಾಚರಣೆ ಹಾಗೂ ಮಧುಮೇಳ ಉದ್ಘಾಟಿಸಿ ಅವರು ಮಾತನಾಡಿದರು.

ಅತಿ ಕಡಿಮೆ ವೆಚ್ಚದಲ್ಲಿ ಕೈಗೊಳ್ಳಬಹುದಾದ ಜೇನು ಕೃಷಿ ಪರಿಸರ ಸ್ನೇಹಿ ಕಸುಬಾಗಿದೆ. ಇದನ್ನು ಎಲ್ಲ ವಯೋಮಾನದವರು ಕೈಗೊಳ್ಳಬಹುದಾಗಿದ್ದು, ಗ್ರಾಮೀಣರು ಹಾಗೂ ರೈತರು ದೊಡ್ಡ ಮಟ್ಟದಲ್ಲಿ ಪಾಲ್ಗೊಳ್ಳಬಹುದಾಗಿದೆ. ಹೈನುಗಾರಿಕೆ ರೀತಿ ಜೇನು ಸಾಕಣೆಯಲ್ಲಿ ತೊಡಗುವವರಿಗೆ ಆರ್ಥಿಕ ನೆರವು ನೀಡಿದ್ದಲ್ಲಿ ಉದ್ಯಮದ ಸ್ವರೂಪ ಪಡೆದುಕೊಳ್ಳಲು ಸಾಧ್ಯವಿದೆ. ಗುಣಮಟ್ಟದ ಜೇನು ಖಾತ್ರಿಗೆ ಪ್ರಮಾಣಿಕೃತ ಸಂಸ್ಥೆ, ಉತ್ಪನ್ನಗಳ ಪರೀಕ್ಷೆಗೆ ಪ್ರಯೋಗಾಲಯ ಸ್ಥಾಪಿಸಿದರೆ ಗ್ರಾಹಕರಿಗೆ ಕಲಬೆರಿಕೆರಹಿತ ಜೇನು ನೀಡಬಹುದಾಗಿದೆ ಎಂದರು.

ಪ್ರಸ್ತುತ ವಿಶ್ವದಲ್ಲಿ ಚೀನಾ ದೇಶವು ಅತಿಹೆಚ್ಚು (ಶೇ.28) ಪ್ರಮಾಣದಲ್ಲಿ ಜೇನು ಉತ್ಪತ್ತಿ ಮಾಡುತ್ತಿದೆ. ನಂತರದಲ್ಲಿ ಟರ್ಕಿ (ಶೇ.6), ಇರಾನ್ (ಶೇ.4.5) ಇದ್ದು, ಭಾರತ ಶೇ.3ರ ಪಾಲು ಹೊಂದುವ ಮೂಲಕ 7ನೇ ಸ್ಥಾನದಲ್ಲಿದೆ. ದೇಶದಲ್ಲಿ ಹೆಚ್ಚಿನ ಸಂಖ್ಯೆಯ ಜೀವ ವೈವಿಧ್ಯ ತಾಣಗಳು ಹಾಗೂ ಕೃಷಿ ಪ್ರದೇಶ ಇರುವುದರಿಂದ ಜೇನು ಸಾಕಣೆಗೆ ಹೇರಳ ಅವಕಾಶವಿದ್ದು, ಇದನ್ನು ಸದ್ಬಳಕೆ ಮಾಡಿಕೊಳ್ಳಲು ಸರ್ಕಾರ ಹೊಸ ಯೋಜನೆಗಳನ್ನು ರೂಪಿಸಿ ಜಾರಿಗೊಳಿಸಬಹುದಾಗಿದೆ ಎಂದು ರಾಜಸಾಬ್ ಸರ್ಕಾರಕ್ಕೆ ಸಲಹೆ ನೀಡಿದರು.

ಯುಎಎಸ್-ಬಿ ಕುಲಪತಿ ಡಾ. ಎಸ್.ವಿ. ಸುರೇಶ್ ಮಾತನಾಡಿ, ಪ್ರಸ್ತುತ ರೈತರು ತಮ್ಮ ಆದಾಯ ಮೂಲವನ್ನು ವಿಸ್ತರಿಸಿಕೊಳ್ಳಲು ಸಮಗ್ರ ಕೃಷಿ ಪದ್ಧತಿಯನ್ನು ಅಳವಡಿಸಿಕೊಳ್ಳಬೇಕಿದೆ. ಈ ನಿಟ್ಟಿನಲ್ಲಿ ಜೇನು ಕೃಷಿಯನ್ನು ವೈಜ್ಞಾನಿಕವಾಗಿ ಕೈಗೊಂಡಲ್ಲಿ ಆರ್ಥಿಕವಾಗಿ ಸಬಲರಾಗಲು ಸಾಧ್ಯವಿದೆ. ಆದರೆ, ಹೆಚ್ಚು ಸಲು ತೆಗೆಯಬೇಕೆಂಬ ಭರದಲ್ಲಿ ಬೆಳೆಗಳಿಗೆ ನಿಗದಿಗಿಂತ ಅಧಿಕ ಪ್ರಮಾಣದ ಕೀಟನಾಶಕ ಸಿಂಪಡಿಸುತ್ತಿರುವುದು ಜೇನು ನೊಣಗಳ ಪರಾಗಸ್ಪರ್ಶ ಪ್ರಕ್ರಿಯೆಗೆ ಅಡ್ಡಿಯಾಗಿದೆ. ಇದನ್ನು ಗಮನಿಸಿಯಾದರೂ ಕೃಷಿಕರು ಕೀಟನಾಶಕಗಳ ಬಳಕೆಯನ್ನು ಕಡಿಮೆ ಮಾಡಬೇಕಿದೆ ಎಂದು ಕಿವಿಮಾತು ಹೇಳಿದರು.

ಕಾರ್ಯಕ್ರಮದಲ್ಲಿ ಅಖಿಲ ಭಾರತ ಸುಸಂಘಟಿತ ಜೇನುನೊಣ ಮತ್ತು ಪರಾಗಸ್ಪರ್ಶ ಸಂಶೋಧನಾ ಪ್ರಾಯೋಜನೆಯ ರಾಷ್ಟ್ರೀಯ ಸಂಯೋಜಕ ಡಾ. ಸಚಿನ್ ಸುರೋಶೆ, ಕೃಷಿ ವಿವಿಯ ಡೀನ್ ಡಾ. ಎನ್.ಬಿ. ಪ್ರಕಾಶ್, ಜೇನು ಕೃಷಿ ವಿಭಾಗದ ಮುಖ್ಯಸ್ಥ ಡಾ. ಕೆ.ಎಸ್. ಜಗದೀಶ್, ಸಹಾಯಕ ಪ್ರಾಧ್ಯಾಪಕಿ ಡಾ. ಬಿ.ವಿ. ಶ್ವೇತಾ ಹಾಗೂ ಇತರರು ಪಾಲ್ಗೊಂಡಿದ್ದರು.

ಕಾರ್ಯಕ್ರಮದಲ್ಲಿ ಪ್ರಗತಿಪರ ಜೇನು ಕೃಷಿಕರಾದ ಜೈಶಂಕರ್ (ನಂಜನಗೂಡು), ಸುರೇಶ್ ಕರ್ಕೇರ (ಕಾರ್ಕಳ) ಹಾಗೂ ವಿ.ಆರ್. ಚಂದ್ರಶೇಖರ್ (ಕಳಸ) ಅವರನ್ನು ಸನ್ಮಾನಿಸಲಾಯಿತು. ಇದೇ ವೇಳೆ ಕೈಪಿಡಿಯನ್ನು ಬಿಡುಗಡೆ ಮಾಡಲಾಯಿತು. ರಾಯಚೂರು ಕೃಷಿ ವಿವಿ ಸಹ ಪ್ರಾಧ್ಯಾಪಕ ಡಾ. ಪಿ.ಆರ್. ಬದರಿಪ್ರಸಾದ್ ಅವರು ಜೇನು ಕೃಷಿ ಅವಕಾಶ ಹಾಗೂ ಸವಾಲುಗಳು ಕುರಿತು ವಿಷಯ ಮಂಡಿಸಿದರು.