ಅರಣ್ಯ ಇಲಾಖೆಯು ಕೆಲವೊಂದು ಮರಗಳನ್ನು ಕಡಿಯುವುದು ಹಾಗೂ ಸಾಗಾಟಕ್ಕೆ ವಿನಾಯಿತಿ ನೀಡಿದೆ. ಟೀಕು, ಶ್ರೀಗಂಧ, ರಕ್ತ ಚಂದನ ಸೇರಿ ಹಲವು ಜಾತಿಯ ಮರಗಳನ್ನು ಕಡಿಯಲಿಚ್ಛಿಸುವವರು ಫೋಟೋ, ಸ್ಥಳದ ಮಾಹಿತಿ, ಜಮೀನಿನ ದಾಖಲೆ, ಮರ ಕಡಿಯಲು ಕಾರಣ ನಮೂದಿಸಿ ಅರ್ಜಿ ಸಲ್ಲಿಸಬೇಕು. ಈ ಸಂದರ್ಭ ಅರ್ಜಿದಾರರಿಗೆ ಸಂಬಂಧಪಟ್ಟ ಅಧಿಕಾರಿಯ ವಿವರ ಹಾಗೂ ಅರ್ಜಿ ಸಂಖ್ಯೆ ಲಭ್ಯವಾಗುತ್ತದೆ. ಈ ಅರ್ಜಿ ಸಂಖ್ಯೆ ಆಧಾರದಲ್ಲಿ ಅಧಿಕಾರಿಗಳು ಜಮೀನಿಗೆ ತೆರಳಿ ಮೂಲ ದಾಖಲೆ ಹಾಗೂ ಸ್ಥಳ ಪರಿಶೀಲನೆ ನಡೆಸಿ ವಲಯ ಅರಣ್ಯಾಧಿಕಾರಿಗಳಿಗೆ ವರದಿ ಸಲ್ಲಿಸುತ್ತಾರೆ. ಬಳಿಕ ಅರಣ್ಯಾಧಿಕಾರಿಗೆ ಸೂಕ್ತವೆನಿಸಿದರೆ ಮರ ಕಡಿಯಲು ಹಾಗೂ ಸಾಗಾಟಕ್ಕೆ ಅನುಮತಿ ನೀಡುತ್ತಾರೆ. ಮರ ವಿನಾಶದ ಅಂಚಿನಲ್ಲಿರುವ ಪ್ರಭೇದಕ್ಕೆ ಸೇರಿದ್ದರೆ ಆಯ್ಕೆ ಸಂದರ್ಭದಲ್ಲೇ, ಅದರ ತೆರವು ಸಾಧ್ಯವಿಲ್ಲ ಎಂಬ ಸಂದೇಶವನ್ನು ತಂತ್ರಾಂಶ ತೋರಿಸಬೇಕು. ಈ ಎಲ್ಲ ಪ್ರಕ್ರಿಯೆಯನ್ನು ಅರಣ್ಯ ಇಲಾಖೆಯ ಮಾಹಿತಿ ಸಂವಹನ ಮತ್ತು ತಂತ್ರಜ್ಞಾನ ಕೇಂದ್ರದ (ಐಸಿಟಿ) ಅಧಿಕಾರಿ, ಸಿಬ್ಬಂದಿ ನಿರ್ವಹಿಸಲಿದ್ದಾರೆ.
