ಗುಲಾಬಿ ಮಾರ್ಗದಲ್ಲಿ ರೈಲುಗಳ ಪರೀಕ್ಷೆ | METRO

ಕಾಳೇನ ಅಗ್ರಹಾರದಿಂದ ತಾವರೆಕೆರೆಯವರೆಗೆ ಇರುವ 7.5 ಕಿಮೀ ಗುಲಾಬಿ ಮಾರ್ಗದಲ್ಲಿ ರೋಲಿಂಗ್​ ಸ್ಟಾಕ್​ ಪರೀಕ್ಷೆಗಳನ್ನು 11ರಿಂದ ಆರಂಭಿಸಲು ಬಿಎಂಆರ್​ಸಿಎಲ್​ ತೀರ್ಮಾನಿಸಿದೆ. ಈ ಪರೀೆಗಳು ಏಪ್ರಿಲ್​ ಮಧ್ಯಭಾಗದೊಳಗೆ ಪೂರ್ಣಗೊಳಿಸುವ ನಿರೀಕ್ಷೆ ಇದೆ. 

ವಾಣಿಜ್ಯ ಸಂಚಾರ ಮಾಡುವ ಮೊದಲು ಕೈಗೊಳ್ಳಲಾಗುವ ಈ ಮುಖ್ಯ ಪರೀಕ್ಷೆಗಳು ರೈಲುಗಳ ಕಾರ್ಯಕ್ಷಮತೆ ಹಾಗೂ ವ್ಯವಸ್ಥೆಗಳ ಪರಸ್ಪರ ಸಂಯೋಜನೆಯ ಸಮಗ್ರ ಪರಿಶೀಲನೆಯನ್ನು ಒಳಗೊಂಡಿರುತ್ತದೆ. ಶಾಸನಬದ್ಧ ಅನುಮೋದನೆಗಳನ್ನು ಪಡೆಯಲು ಈ ಪರೀಕ್ಷೆಗಳು ಅಗತ್ಯವಾಗಿದೆ. ಮೇಲ್ಕಂಡ ಅವಧಿಯಲ್ಲಿ ಟ್ರಾಕ್ಷನ್​ ಮತ್ತು ಬ್ರೇಕ್​, ಆಸಿಲೇಷನ್​, ಸಿಗ್ನಲಿಂಗ್​, ವಿದ್ಯುತ್​ ಮತ್ತು ದೂರಸಂಪರ್ಕ ವ್ಯವಸ್ಥೆಗಳೊಂದಿಗೆ ಏಕೀಕರಣ ಸೇರಿ ಹಲವು ಪರೀಕ್ಷೆಗಳು ನಡೆಸಲಾಗುತ್ತವೆ.

ಬಿಇಎಂಎಲ್​ ಒಟ್ಟು 318 ಸ್ಟ್ಯಾಂಡರ್ಡ್​ ಗೇಜ್​ ಮೆಟ್ರೋ ಕೋಚ್​ಗಳನ್ನು ತಯಾರಿಸಲಿದ್ದು, ಅವುಗಳಲ್ಲಿ ನೀಲಿ ಮತ್ತು ಗುಲಾಬಿ ಮಾರ್ಗದ ರೈಲುಗಳು ಸೇರಿವೆ. ಸಂಪೂರ್ಣ ವಿನ್ಯಾಸ, ಇಂಜಿನಿಯರಿಂಗ್​ ಮತ್ತು ತಯಾರಿಕಾ ಕಾರ್ಯಗಳು ಬೆಂಗಳೂರಿನಲ್ಲಿರುವ ಬಿಇಎಂಎಲ್​ ಘಟಕದಲ್ಲೇ ನಡೆಯುತ್ತಿದ್ದು, ನಿಗದಿಯಂತೆ ಹಲವು ಹಂತಗಳ ಪರೀಕ್ಷೆ, ತಾಂತ್ರಿಕ ಪರಿಶೀಲನೆ ಮತ್ತು ಪ್ರಮಾಣೀಕರಣಕ್ಕೆ ಒಳಪಡುವುದಲ್ಲದೆ, ಸುಮಾರು 15 ವರ್ಷಗಳವರೆಗೆ ನಿರ್ವಹಣಾ ಸಾಮರ್ಥ್ಯ ಹೊಂದಲಿದೆ. 

ಸ್ಪರ್ಧಾತ್ಮಕ ಟೆಂಡರ್​ ಪ್ರಕ್ರಿಯೆಯ ಮೂಲಕ ಬಿಇಎಂಎಲ್​ಗೆ ಲಭ್ಯವಾದ 3,177 ಕೋಟಿ ರೂ. ಮೌಲ್ಯದ ಒಡಂಬಡಿಕೆಯಂತೆ ಯೋಜನೆ ಕೈಗೆತ್ತಿಕೊಳ್ಳಲಾಗಿದೆ. ಚಾಲಕರಹಿತ ಮೆಟ್ರೋ ಮಾದರಿಯ ಅನಾವರಣವು ಬಿಇಎಂಎಲ್​ನ ಮುಂದಿನ ತಲೆಮಾರಿನ ನಗರ ಸಾರಿಗೆ ಪರಿಹಾರಗಳನ್ನು ಒದಗಿಸುವ ಪ್ರಯತ್ನದಲ್ಲಿ ದೊಡ್ಡ ಯೋಜನೆಯಾಗಿದೆ ಎಂದು ಬಿಎಂಆರ್​ಸಿಎಲ್​ ಅಧಿಕಾರಿಗಳು ತಿಳಿಸಿದ್ದಾರೆ.

ಬಿಇಎಂಎಲ್​ ಅಭಿವೃದ್ಧಿಪಡಿಸಿದ ಚಾಲಕರಹಿತ ಮೆಟ್ರೋ ಟ್ರೇನ್​ಸೆಟ್​ನ ಒಳಾಂಗಣವನ್ನು ಆಧುನಿಕವಾಗಿ ನಿರ್ಮಿಸಲಾಗಿದೆ. ಅಗಲ ಗ್ಯಾಂಗ್​ವೇಗಳು, ಯುಎಸ್​ಬಿ ಚಾರ್ಜಿಂಗ್​ ಪೋರ್ಟ್​, ಸುಧಾರಿತ ಸುಲಭ ಪ್ರವೇಶ ಸೌಲಭ್ಯಗಳು ಹಾಗೂ ಅಂತಾರಾಷ್ಟ್ರೀಯ ಸುರಕ್ಷತಾ ಮಾನದಂಡಗಳಿವೆ. ಚಿಬಿಟಿಸಿ ತಂತ್ರಜ್ಞಾನಕ್ಕೆ ಹೊಂದಿಕೊಂಡಿರುವ ಈ ಟ್ರೇನ್​ಸೆಟ್​ ಸಂಪೂರ್ಣ ಚಾಲಕರಹಿತ ಸಂಚಲನಕ್ಕೆ ಸಿದ್ಧವಾಗಿರುವುದೇ ಪ್ರಮುಖ ವಿಶೇಷತೆಯಾಗಿದೆ. ಮಾದರಿ ರೋಲ್​ಔಟ್​ನೊಂದಿಗೆ ಯೋಜನೆಗೆ ಸಂಬಂಧಿಸಿದ ವಿತರಣಾ ಹಂತಗಳು ಆರಂಭವಾಗಿದ್ದು, ಸರಣಿ ಉತ್ಪಾದನೆ ಒಪ್ಪಂದಕ್ಕ ಅನುಸಾರವಾಗಿ ಮುಂದುವರಿಯಲಿದೆ. 

ತಾವರೇಕೆರೆ, ಜಯದೇವ ಆಸ್ಪತ್ರೆ, ಡೇರಿ ಸರ್ಕಲ್​, ಎಂ.ಜಿ. ರಸ್ತೆ, ಕಳೇನ ಅಗ್ರಹಾರ, ನಾಗವಾರ ಮುಂತಾದ ಪ್ರಮುಖ ವಲಯಗಳನ್ನು ಸಂಪರ್ಕಿಸುತ್ತಿರುವ ಗುಲಾಬಿ ಮಾರ್ಗ, 21.26 ಕಿ.ಮೀ ಉದ್ದವಿದ್ದು, 18 ನಿಲ್ದಾಣಗಳನ್ನು ಒಳಗೊಂಡಿದೆ. ಎತ್ತರಿಸಿದ ನಿಲ್ದಾಣಗಳ ನಿರ್ಮಾಣ ಬಹುತೇಕ ಪೂರ್ಣಗೊಂಡಿದೆ. ಒಟ್ಟಾರೆ ಈ ಯೋಜನೆಯನ್ನು ದಕ್ಷಿಣ ಮತ್ತು ಉತ್ತರ ಬೆಂಗಳೂರನ್ನು ಸಂಪರ್ಕಿಸುವ ಉದ್ದೇಶದಿಂದ ರೂಪಿಸಲಾಗಿದೆ.