ನಿಯಮಿತವಾಗಿ ನಾಗರಿಕರ ಕುಂದು-ಕೊರತೆ ಆಲಿಸಿ

ದಕ್ಷಿಣ ನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಶನಿವಾರ ಸಾರ್ವಜನಿಕರ ಕುಂದು-ಕೊರತೆ ಸಭೆ ನಡೆಯುವ ಮುನ್ನ ಮಹೇಶ್ವರ ರಾವ್ ಅವರು ದಕ್ಷಿಣ ಕಾರ್ಪೋರೇಷನ್ ಆಯುಕ್ತ ಕೆ.ಎನ್. ರಮೇಶ್ ಹಾಗೂ ಹಿರಿಯ ಅಧಿಕಾರಿಗಳೊಂದಿಗೆ ಜಯನಗರದಲ್ಲಿ ಸಭೆಯಲ್ಲಿ ಈ ನಿರ್ದೇಶನವನ್ನು ನೀಡಲಾಯಿತು.

ಸಾರ್ವಜನಿಕರು ನೀಡಿರುವ ಸಮಸ್ಯೆಗಳ ಪೈಕಿ ತುರ್ತಾಗಿ ಪರಿಹಾರ ನೀಡುವ ಕೆಲಸಗಳನ್ನು ಆದ್ಯತೆ ಮೇರೆಗೆ ಕೈಗೊಳ್ಳಬೇಕು. ಕುಂದು-ಕೊರತೆ ಆಲಿಸುವ ಸಭೆಗಳನ್ನು ಆಯುಕ್ತರು ಹಾಗೂ ಜಂಟಿ ಆಯುಕ್ತರ ಹಂತದಲ್ಲಿ ಆಗಾಗ್ಗೆ ನಡೆಸಬೇಕು. ಸ್ವೀಕರಿಸಿದ ದೂರುಗಳನ್ನು ಕಾಲಮಿತಿಯೊಳಗೆ ಪರಿಹಾರ ಒದಗಿಸಿಕೊಡಬೇಕು ಎಂದು ಮಹೇಶ್ವರ ರಾವ್ ತಾಕೀತು ಮಾಡಿದರು.

ನಾಗರಿಕರ ಅಹವಾಲು ಆಲಿಕೆ ವೇಳೆ ದಕ್ಷಿಣ ಪಾಲಿಕೆಯ ವಿವಿಧೆಡೆಯಿಂದ ಆಗಮಿಸಿದ್ದ ಜನರು ತಮ್ಮ ಸಮಸ್ಯೆಗಳನ್ನು ಆಯುಕ್ತರ ಗಮನಕ್ಕೆ ತಂದರು. ಈ ವೇಳೆ ವೆಗಾ ಸಿಟಿ ಮಾಲ್ ಬಳಿಯ ರಾಜಕಾಲುವೆ ಹೂಳೆತ್ತುವಿಕೆ, ಮಳೆ ಹಾನಿ ಸಮಸ್ಯೆ, ಅಸಮರ್ಪಕ ಕಸ ಸಂಗ್ರಹಣೆ ಮತ್ತು ವಿಲೇವಾರಿ, ಫುಟ್‌ಪಾತ್ ಸಮಸ್ಯೆ, ಎಚ್‌ಎಸ್‌ಆರ್ ಲೇಔಟ್‌ನ ಸರ್ವಿಸ್ ರಸ್ತೆಗಳ ಅತಿಕ್ರಮಣ ತೆರವು ಹಾಗೂ ಸ್ಕೈವಾಕ್ ಕೆಳಗೆ ಕೆಟ್ಟು ನಿಂತಿರುವ ಲಿಫ್ಟ್​​, ರೂಪೇನ ಅಗ್ರಹಾರದ ಬಸ್ ನಿಲ್ದಾಣದಲ್ಲಿ ಶೌಚಾಲಯ ನಿರ್ಮಾಣ, ಕೋಡಿ ಚಿಕ್ಕನಹಳ್ಳಿಯ ಕಸದ ಸಮಸ್ಯೆ ಹಾಗೂ ಕೋರಮಂಗಲದ ಪಿಜಿ, ಪಬ್, ಬಾರ್ ಸಮಸ್ಯೆಗಳಿಂದ ಉಂಟಾಗುತ್ತಿರುವ ಸಮಸ್ಯೆಗಳ ಬಗ್ಗೆ ಸಾರ್ವಜನಿಕರು ಪ್ರಸ್ತಾಪಿಸಿದರು.

ಸಭೆಯಲ್ಲಿ ಆರ್‌ಬಿಐ ಲೇಔಟ್, ಎಲ್ಐಸಿ ಕಾಲೋನಿ, ಕಸವನಹಳ್ಳಿ, ಕೋರಮಂಗಲ, ರೂಪೇನ ಅಗ್ರಹಾರ, ಎಚ್‌ಎಸ್‌ಆರ್ ಲೇಔಟ್‌ನ ಆರ್‌ಡಬ್ಲ್ಯುಎ ಪ್ರತಿನಿಧಿಗಳಿಂದ 53ಕ್ಕೂ ಹೆಚ್ಚು ಅಹವಾಲುಗಳು ಸಲ್ಲಿಕೆಯಾದವು.

ಈ ವೇಳೆ ಅಪರ ಆಯುಕ್ತ ಡಾ. ನವೀನ್ ಕುಮಾರ್ ರಾಜು ಹಾಗೂ ರಾಚಪ್ಪಾ ಸೇರಿ ಇತರ ಇಲಾಖೆಗಳ ಹಿರಿಯ ಅಧಿಕಾರಿಗಳು ಹಾಜರಿದ್ದರು.