ತಿಂಗಳಾಂತ್ಯಕ್ಕೆ ಬಿಬಿಸಿ ಯೋಜನೆಗೆ ಶಂಕುಸ್ಥಾಪನೆ

2007ರಿಂದಲೂ ಕಾಗದದ ಮೇಲೆ ಉಳಿದಿದ್ದ ಯೋಜನೆಯು ಭೂಸ್ವಾಧೀನ ಹಾಗೂ ಜಮೀನು ಬಿಟ್ಟುಕೊಟ್ಟಿರುವ ಭೂಮಾಲೀಕರಿಗೆ ಪರಿಹಾರ ವಿತರಿಸುವ ವಿಚಾರದಲ್ಲೇ ಬಹಳಷ್ಟು ಸಮಯ ವ್ಯರ್ಥವಾಗಿದೆ. ಈಗ ಈ ಎರಡೂ ವಿಚಾರದಲ್ಲಿ ರಾಜ್ಯ ಸರ್ಕಾರ ಮಧ್ಯಸ್ಥಿಕೆ ವಹಿಸಿ ಪರಿಹಾರ ಒದಗಿಸಿರುವ ಹಿನ್ನೆಲೆಯಲ್ಲಿ, ಪ್ರಾಜೆಕ್ಟ್ ಜಾರಿಗೆ ಇಚ್ಛಾಶಕ್ತಿಯನ್ನು ಪ್ರದರ್ಶಿಸಿದೆ. ಇತ್ತೀಚಿಗಷ್ಟೇ ಸಿಎಂ ಡಿ.ಕೆ. ಶಿವಕುಮಾರ್ ಅವರು ಬೆಂಗಳೂರಿನ ಪ್ರಮುಖ ಯೋಜನೆಗಳಿಗೆ ಇರುವ ಅಡ್ಡಿಗಳನ್ನು ನಿವಾರಿಸಿ ಕಾಲಮಿತಿಯೊಳಗೆ ಅನುಷ್ಠಾನಕ್ಕೆ ತರುವಂತೆ ಖಡಕ್ ನಿರ್ದೇಶನ ನೀಡಿದ ಬೆನ್ನಲ್ಲೇ ಬಿಬಿಸಿಗೆ ಅಡಿಗಲ್ಲು ಹಾಕಲು ತೀರ್ಮಾನಿಸಲಾಗಿದೆ.

ಪೆರಿಫೆರಲ್ ರಿಂಗ್ ರಸ್ತೆ (ಪಿಆರ್‌ಆರ್) ಯನ್ನು ಬಿಬಿಸಿ ಎಂದು ಹೆಸರು ಬದಲಿಸಿದ ನಂತರ ಯೋಜನೆ ಅನುಷ್ಠಾನ ಘಟಕದ ಹೊಣೆಯನ್ನು ಬಿಬಿಸಿ ನಿಗಮಕ್ಕೆ ವಹಿಸಲಾಗಿದೆ. ಪ್ರಾಜೆಕ್ಟ್ ಜಾರಿಗಾಗಿ ನಿಗಮದ ಚೇರ್ಮನ್ ಆಗಿ ನಿವೃತ್ತ ಐಎಎಸ್ ಅಧಿಕಾರಿ ಎಲ್.ಕೆ. ಅತೀಕ್ ಅವರಿಗೆ ವಹಿಸಲಾಗಿದೆ. ಇದಾದ ಬಳಿಕ ಜಮೀನು ಬಿಟ್ಟುಕೊಟ್ಟಿರುವ ರೈತರಿಗೆ ಪರಿಹಾರ ವಿತರಣೆಗೆ ಚಾಲನೆ ದೊರೆತಿದೆ. ಇತ್ತ ಮೊದಲ ಪ್ಯಾಕೇಜ್ ಅಡಿಯಲ್ಲಿ ತುಮಕೂರು ರಸ್ತೆಯ ಮಾದಾವರದಿಂದ ಆರಂಭಿಸಿ ಹೆಸರಘಟ್ಟ ರಸ್ತೆ, ದೊಡ್ಡಬಳ್ಳಾಪುರ ರಸ್ತೆ ಮಾರ್ಗವಾಗಿ ಯಲಹಂಕದ ವೆಂಕಟಾಲ ಬಳಿ ಬಳ್ಳಾರಿ ರಸ್ತೆವರೆಗೂ 21 ಕಿ.ಮೀ. ಹೊಸ ರೋಡ್ ನಿರ್ಮಾಣಗೊಳ್ಳಲಿದೆ. ಒಟ್ಟು 12 ಪಥಗಳ ಮಾರ್ಗದಲ್ಲಿ 8 ಪಥ ಮುಖ್ಯ ಕ್ಯಾರೇಜ್ ಇರಲಿದ್ದು, ಉಳಿದ 4 ಪಥಗಳು ಸರ್ವಿಸ್ ರಸ್ತೆಯಾಗಿರಲಿದೆ. ಜತೆಗೆ ರಸ್ತೆಯ ಎರಡೂ ಬದಿ ಪ್ರತ್ಯೇಕ ಸೈಕಲ್ ಪಥವೂ ನಿರ್ಮಾಣವಾಗಲಿದೆ. ಮೊದಲ ಪ್ಯಾಕೇಜ್‌ಅನ್ನು ಮೆ. ಶಂಕರನಾರಾಯಣ ನಿರ್ಮಾಣ ಸಂಸ್ಥೆಯ (ಎಸ್‌ಎನ್‌ಸಿ) ಪಾಲಾಗಿದೆ.

ಮೊದಲ ಪ್ಯಾಕೇಜ್ ಅನುಷ್ಠಾನಕ್ಕೆ 3,348.05 ಕೋಟಿ ರೂ. ವೆಚ್ಚಕ್ಕೆ ಬಿಡ್ ಆಹ್ವಾನಿಸಲಾಗಿತ್ತು. ಬಿಡ್‌ನಲ್ಲಿ 3 ಕಂಪನಿಗಳು ಪಾಲ್ಗೊಂಡಿದ್ದು, ಕಡಿಮೆ ಬಿಡ್ ದಾಖಲಿಸಿದ್ದ ಎಸ್‌ಎನ್‌ಸಿಗೆ ಕಾಮಗಾರಿ ವಹಿಸಲಾಗಿದೆ. ಬಿಡ್ ಮೊತ್ತಕ್ಕಿಂತ ಶೇ.4.9ರಷ್ಟು ಹೆಚ್ಚುವರಿ ಮೊತ್ತ (3,500 ಕೋಟಿ ರೂ.) ನಮೂದಿಸಿದ್ದರೂ, ತಾಂತ್ರಿಕ ಹಾಗೂ ಹಣಕಾಸು ಬಿಡ್ ಪರಾಮರ್ಶೆ ವೇಳೆ ಎಸ್‌ಎನ್‌ಸಿ ಕಾಮಗಾರಿಯನ್ನು ತನ್ನದಾಗಿಸಿಕೊಳ್ಳುವಲ್ಲಿ ಸಫಲವಾಗಿದೆ. ಮೊದಲ ಹಂತದ ಕಾಮಗಾರಿಗೆ ಡಿಪಿಆರ್ ಸಿದ್ಧಗೊಂಡಿದ್ದು, ಅಧಿಕೃತವಾಗಿ ಒಪ್ಪಿಗೆ ಪತ್ರವನ್ನು ಕಂಪನಿಗೆ ನೀಡಲಾಗಿದೆ. ಹತ್ತು ವರ್ಷದ ಕಾರ್ಯಾಚರಣೆ ಹಾಗೂ ನಿರ್ವಹಣೆ ಸೇರಿ ವಿನ್ಯಾಸ, ನಿರ್ಮಾಣ, ನಿರ್ವಹಣೆ, ಹಸ್ತಾಂತರ (ಡಿಬಿಒಟಿ) ಮಾದರಿಯಲ್ಲಿ ಪ್ರಾಜೆಕ್ಟ್‌ಅನ್ನು 3 ವರ್ಷದಲ್ಲಿ ಜಾರಿ ಮಾಡುವಂತೆ ಗಡುವು ನೀಡಲಾಗಿದೆ.

ಬಿಬಿಸಿ ಯೋಜನೆ ಜಾರಿಗೆ ಈಗಾಗಲೇ ಬಿಡಿಎ 3 ಬಾರಿ ಯತ್ನಿಸಿ ವಿಫಲವಾಗಿತ್ತು. ಹಣಕಾಸು ಹೊಂದಿಸುವುದು ಹಾಗೂ ಭೂಸ್ವಾಧೀನ ವೆಚ್ಚ ಭರಿಸಲು ಕಂಪನಿಗಳು ಕೊನೆ ಕ್ಷಣದಲ್ಲಿ ಹಿಂದೆ ಸರಿದ ಕಾರಣ ಪ್ರಾಜೆಕ್ಟ್ ನೆನೆಗುದಿಗೆ ಬಿದ್ದಿತ್ತು. ಈಗ ಭೂಸ್ವಾಧೀನಕ್ಕೆ ಬಿಡಿಎ ವಿವಿಧ ಹಣಕಾಸು ಸಂಸ್ಥೆಗಳಿಂದ ಸಾಲ ಪಡೆದುಕೊಳ್ಳಲು ಯಶಸ್ವಿಯಾಗಿದೆ. ಇದನ್ನಾಧರಿಸಿ ಮೊದಲ ಪ್ಯಾಕೇಜ್‌ಗೆ ಆಹ್ವಾನಿಸಿದ್ದ ಬಿಡ್‌ಅನ್ನು ಎರಡೇ ತಿಂಗಳಲ್ಲಿ ಪೂರ್ಣಗೊಳಿಸಿ. ಕಳೆದ ಏ.6ಕ್ಕೆ ಬಿಡ್ ಆಹ್ವಾನಿಸಿ ವಿವಿಧ ಹಂತಗಳಲ್ಲಿ ಪರಾಮರ್ಶೆ ನಡೆಸಿ ಮೇ 11ರಂದು ಹಣಕಾಸು ಬಿಡ್ ತೆರೆದಿತ್ತು. ಎಲ್ಲ ಷರತ್ತುಗಳನ್ನು ಪೂರ್ಣಗೊಳಿಸಿರುವ ಎಸ್‌ಎನ್‌ಸಿಗೆ ಕಾಮಗಾರಿ ಹೊಣೆ ವಹಿಸಲಾಗಿದೆ.

ಬಿಬಿಸಿಯ 2ನೇ ಹಂತದ ಪ್ಯಾಕೇಜ್ ಬಳ್ಳಾರಿ ರಸ್ತೆಯಿಂದ ಹಳೇ ಮದರಾಸು ರಸ್ತೆವರೆಗೆ (19.37 ಕಿ.ಮೀ.) ಮಾರ್ಗ ಒಳಗೊಂಡಿದೆ. ಇದಕ್ಕಾಗಿ ಟೆಂಡರ್ ಆಹ್ವಾನಿಸಲು ಸಿದ್ಧತೆ ನಡೆದಿದ್ದು, ಎಲ್ಲ ಪ್ರಕ್ರಿಯೆ ಪೂರ್ಣಗೊಂಡ ಬಳಿಕ ಈ ವರ್ಷಾಂತ್ಯದೊಳಗೆ ಅರ್ಹ ಕಂಪನಿಗೆ ಕಾರ್ಯಾದೇಶ ನೀಡುವ ಗಡುವನ್ನು ಬಿಬಿಸಿ ವೇಳಾಪಟ್ಟಿ ಹಾಕಿಕೊಂಡಿದೆ. ಆನಂತರ 3ನೇ ಪ್ಯಾಕೇಜ್ ಹಳೇ ಮದರಾಸು ರಸ್ತೆಯಿಂದ ಹೊಸೂರು ರಸ್ತೆವರೆಗೆ (27.75 ಕಿ.ಮೀ.) ಇರಲಿದ್ದು, ಮುಂದಿನ ವರ್ಷ ಟೆಂಡರ್ ಅಂತಿಮಗೊಳ್ಳುವ ನಿರೀಕ್ಷೆ ಇದೆ.

ರಸ್ತೆಯ ಒಟ್ಟು ಉದ್ದ - 73.4 ಕಿ.ಮೀ.

ಒಟ್ಟು ವೆಚ್ಚ - 27,000 ಕೋಟಿ ರೂ.

ಭೂಸ್ವಾಧೀನ - 20,511 ಸಾವಿರ ಕೋಟಿ ರೂ.

ಕಾಮಗಾರಿ, ಯುಟಿಲಿಟಿ ಬದಲು - 6,000 ಕೋಟಿ ರೂ.

1ನೇ ಹಂತದ ಪ್ಯಾಕೇಜ್ ಕಾಮಗಾರಿ - 3,500 ಕೋಟಿ ರೂ.

"

ಬಿಬಿಸಿ ಪ್ರಾಜೆಕ್ಟ್ ಅನುಷ್ಠಾನಕ್ಕೆ ತರಲು ಪ್ರಾಧಿಕಾರ ಕಟಿಬದ್ಧವಾಗಿದೆ. ಮೊದಲ ಹಂತದಲ್ಲಿ 21 ಕಿ.ಮೀ. ಮಾರ್ಗ ನಿರ್ಮಿಸುವ ಪ್ಯಾಕೇಜ್ -1ಕ್ಕೆ ಅರ್ಹ ಕಂಪನಿಯನ್ನು ಆಯ್ಕೆ ಮಾಡಲಾಗಿದೆ. ಕಾಮಗಾರಿಗೆ ಬೇಕಾದ ಅಗತ್ಯ ಸಿದ್ಧತೆ ಮಾಡಿಕೊಳ್ಳುವಂತೆಯೂ ಕಂಪನಿಗೆ ಸೂಚಿಸಿದ್ದು, ಯೋಜನೆಗೆ ಈ ತಿಂಗಳಲ್ಲೇ ಶಂಕುಸ್ಥಾಪನೆ ನೆರವೇರಿಸಲಾಗುವುದು. ಸಿಎಂ ಸೂಚನೆ ಮೇರೆಗೆ ಬಿಬಿಸಿಗೆ ಇದ್ದ ಅಡ್ಡಿಯನ್ನು ಬಿಡಿಎ ನಿವಾರಿಸಿದೆ.- ಎನ್.ಎ. ಹ್ಯಾರಿಸ್, ಬಿಡಿಎ ಅಧ್ಯಕ್ಷ