ಜನಸ್ನೇಹಿಯಾದ ‘ಸಹಾಯ 3.0 ತಂತ್ರಾಂಶ’ ಅಭಿವೃದ್ಧಿ

ನಗರದಲ್ಲಿ ರಸ್ತೆ ಮೂಲಸೌಕರ್ಯ ನಿರ್ವಹಣಾ ವ್ಯವಸ್ಥೆ (ಆರ್‌ಐಎಂಎಸ್) ಕುರಿತು ಬುಧವಾರ ಜಿಬಿಎ ಕಚೇರಿಯ ನೌಕರರ ಭವನದಲ್ಲಿ ನಾಗರಿಕರೊಂದಿಗೆ ನಡೆದ ಸಮಾಲೋಚನಾ ಸಭೆಯಲ್ಲಿ ಅವರು ಮಾತನಾಡಿದರು.

ಹಾಲಿ ಚಾಲ್ತಿಯಲ್ಲಿರುವ ಸಹಾಯ 2.0 ತಂತ್ರಾಂಶದಲ್ಲಿ ಈಗಾಗಲೇ ಕೆಲವು ಬದಲಾವಣೆಗಳನ್ನು ತರಲಾಗಿದೆ. ಇದನ್ನೀಗ ಮೇಲ್ದರ್ಜೆಗೇರಿಸುತ್ತಿದ್ದು, ನಾಗರಿಕರ ಸಲಹೆಗಳನ್ನು ಅಳವಡಿಸಿಕೊಂಡು ಸಹಾಯ 3.0 ತಂತ್ರಾಂಶವನ್ನು ಶೀಘ್ರದಲ್ಲೇ ಅನುಷ್ಠಾನಕ್ಕೆ ತರಲಾಗುವುದು ಎಂದರು.

ಸರ್ಕಾರದ ವಿವಿಧ ಇಲಾಖೆಗಳ ಮಧ್ಯೆ ಸಮನ್ವಯವನ್ನು ಪರಿಣಾಮಕಾರಿಯಾಗಿ ಕೈಗೊಳ್ಳಲು ಸಮಗ್ರ ಪೋರ್ಟಲ್ಅನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ. ಸದ್ಯ ಆರ್‌ಐಎಂಎಸ್ ಹೆಸರಿನಲ್ಲಿ ದತ್ತಾಂಶ ಸ್ವೀಕರಿಸಲಾಗುತ್ತಿದ್ದು, ಶೀಘ್ರದಲ್ಲೇ ಈ ಪೋರ್ಟಲ್‌ಗೆ ಸೂಕ್ತ ಹೆಸರನ್ನು ಇಡಲಾಗುವುದು. ರಸ್ತೆ ನಿರ್ಮಾಣ, ವಿದ್ಯುತ್ ಕೇಬಲ್ ಅಳವಡಿಕೆ ಸೇರಿ ಇತರ ಕಾಮಗಾರಿ ಕೈಗೊಳ್ಳುವ ಮುನ್ನ ವಿವಿಧ ಇಲಾಖೆಗಳ ನಡುವೆ ಸಮನ್ವಯ ಸಾಧಿಸಲು ಈ ಪೋರ್ಟಲ್ ಸಹಕಾರಿಯಾಗಬೇಕು. ಯಾವುದೇ ರಸ್ತೆ ಅಥವಾ ಮೂಲಸೌಕರ್ಯ ಕಾಮಗಾರಿ ಆರಂಭವಾಗುವ 6 ತಿಂಗಳ ಮುನ್ನವೇ ಪೋರ್ಟಲ್‌ನಲ್ಲಿ ಮಾಹಿತಿ ದಾಖಲಿಸುವಂತಿರಬೇಕು. ಇದರಿಂದ ಸಾರ್ವಜನಿಕರು ತಮ್ಮ ವೈಯಕ್ತಿಕ ಯೋಜನೆಗಳನ್ನು ರೂಪಿಸಿಕೊಳ್ಳಲು ಅನುಕೂಲವಾಗಲಿದೆ ಎಂದು ತಿಳಿಸಿದರು.

ಆರ್‌ಐಎಂಎಸ್‌ನಲ್ಲಿ 2022-23ನೇ ಸಾಲಿನಿಂದ 2026-27ನೇ ಸಾಲಿನವರೆಗೆ (ಪ್ರಸ್ತುತ ಸಾಲು ಸೇರಿ) 5 ವರ್ಷದ ರಸ್ತೆ ಕಾಮಗಾರಿಗಳ ಮಾಹಿತಿಯು ಐದೂ ನಗರ ಪಾಲಿಕೆಗಳ ವ್ಯಾಪ್ತಿಯಲ್ಲಿ ಲಭ್ಯವಿದೆ. 2,000ಕ್ಕೂ ಹೆಚ್ಚು ಕಿ.ಮೀ. ರಸ್ತೆ ಕಾಮಗಾರಿಗಳ ಮಾಹಿತಿ ಹಾಗೂ ವಿವಿಧ ಅನುದಾನ ಮೂಲದಿಂದ ಒದಗಿಸಲಾದ 9,151 ಕೋಟಿ ರೂ. ಅನುದಾನದ ಮಾಹಿತಿಯೂ ಲಭ್ಯವಿದೆ.

ಈ ವೇಳೆ ಜಿಬಿಎ ಮುಖ್ಯ ಆಯುಕ್ತ ಎಂ.ಮಹೇಶ್ವರ ರಾವ್, ನಗರ ಪಾಲಿಕೆಗಳ ಆಯುಕ್ತರಾದ ಡಿ.ಎಸ್. ರಮೇಶ್, ಜಿ.ಜಗದೀಶ್, ಕೆ.ಎನ್. ರಮೇಶ್, ಡಾ. ಕೆ.ವಿ. ರಾಜೇಂದ್ರ ಹಾಜರಿದ್ದರು.

ಆರ್‌ಐಎಂಎಸ್ ವ್ಯವಸ್ಥೆಯು ರಸ್ತೆ ಕಾಮಗಾರಿಗಳ ಮಾಹಿತಿಯಲ್ಲಿನ ದೋಷ ಮತ್ತು ಅಸಮರ್ಪಕತೆ ಕಡಿಮೆಗೊಳಿಸುವುದು, ಪ್ರಕ್ರಿಯೆಯ ಹರಿವನ್ನು ಉತ್ತಮಗೊಳಿಸುವುದು ಹಾಗೂ ಎಐ ಆಧಾರಿತ ತಂತ್ರಜ್ಞಾನಗಳನ್ನು ಸಂಯೋಜಿಸುವ ಮೂಲಕ ರಸ್ತೆ ಅಭಿವೃದ್ಧಿ ಯೋಜನೆ, ಕಾಮಗಾರಿಗಳ ಮೇಲ್ವಿಚಾರಣೆ, ಹೂಡಿಕೆ ಆದ್ಯತೆ ನಿಗದಿ ಹಾಗೂ ಸಾರ್ವಜನಿಕ ಪಾರದರ್ಶಕತೆಯನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶವನ್ನು ಹೊಂದಿದೆ.

* ಭಾರತೀಯ ಭಾಷೆಗಳ ಬೆಂಬಲ

* ಧ್ವನಿ ಆಧಾರಿತ ದೂರು ನೋಂದಣಿ

* ಕಡಿಮೆ ಬ್ಯಾಂಡ್‌ವಿಡ್ತ್‌ನಲ್ಲಿಯೂ ಬಳಕೆ

* ಆಯ್ದ ಪ್ರಕರಣಗಳಲ್ಲಿ ಅನಾಮಧೇಯ ದೂರು

* ಸರಳ ಮರುತೆರೆಯುವ ವ್ಯವಸ್ಥೆ

* ಮುಕ್ತಾಯಕ್ಕೂ ಮುನ್ನ ನಾಗರಿಕರ ದೃಢೀಕರಣ

* ಸಾರ್ವಜನಿಕ ಕಾರ್ಯಕ್ಷಮತೆ ಡ್ಯಾಶ್‌ಬೋರ್ಡ್

* ಸ್ವಯಂಚಾಲಿತ ಎಸ್‌ಎಲ್ಎ ಎಚ್ಚರಿಕೆ

* ಅಧಿಕಾರಿಗಳ ಜವಾಬ್ದಾರಿಯ ಸ್ಪಷ್ಟತೆ

* ಏಕರೂಪದ ಸ್ಥಳ ಪರಿಶೀಲನೆ