ಸದಾ ಜನಜಂಗುಳಿ ಕಾಣಸಿಗುವ ಕೆ.ಆರ್.ಮಾರುಕಟ್ಟೆ ಆಸುಪಾಸು ಫುಟ್ಪಾತ್ ಒತ್ತುವರಿ ತೆರವು ಕಾರ್ಯವನ್ನು ಸ್ವತ: ಕೇಂದ್ರ ಪಾಲಿಕೆ ಆಯುಕ್ತ ಜಿ.ಜಗದೀಶ್ ವಹಿಸಿದ್ದರು. ಬೃಹತ್ ಕಾರ್ಯಾಚರಣೆ ಹಿನ್ನೆಲೆ 150ಕ್ಕೂ ಹೆಚ್ಚು ಪೊಲೀಸರನ್ನು ಬಳಸಿಕೊಳ್ಳಲಾಯಿತು. ತೆರವು ವೇಳೆ ವರ್ತಕರು ಪಾಲಿಕೆ ಕ್ರಮವನ್ನು ವಿರೋಧಿಸಿದರು. ಪರ್ಯಾಯ ವ್ಯವಸ್ಥೆ ಕಲ್ಪಿಸುವಂತೆ ಪಟ್ಟು ಹಿಡಿದರು. ಜತೆಗೆ ಹಲವು ಮಹಿಳಾ ವ್ಯಾಪಾರಿಗಳು ಅಧಿಕಾರಿ ಹಾಗೂ ಪೊಲೀಸರ ಮುಂದೆ ಕಣ್ಣೀರು ಹಾಕಿದರು. ಅಧಿಕಾರಿಗಳು ವರ್ತಕರನ್ನು ಸಮಾಧಾನಪಡಿಸಲು ಹರಸಾಹಸಪಟ್ಟರು. ಹೈಕೋರ್ಟ್ ಆದೇಶ ಹಿನ್ನೆಲೆಯಲ್ಲಿ ಕಾರ್ಯಾಚರಣೆ ಮಾಡಲಾಗುತ್ತಿದ್ದು, ನಿಮಗೆ ಸೇರಿದ ವಸ್ತುಗಳನ್ನು ಒತ್ತೊಯ್ಯಲು ಅಡ್ಡಿಯಿಲ್ಲ ಎಂದು ಮನವರಿಕೆ ಮಾಡಿಕೊಟ್ಟರು. ಇದರ ಹೊರತಾಗಿಯೂ ಹಲವು ವ್ಯಾಪಾರಿಗಳು ತಮ್ಮ ಮಳಿಗೆಗಳನ್ನು ಕಿತ್ತೆಸೆಯದಂತೆ ಅಧಿಕಾರಿಗಳ ದುಂಬಾಲು ಬಿದ್ದರು. ಕಾರ್ಯಾಚರಣೆಗೆ 60 ಕಾರ್ಮಿಕರು, 6 ಜೆಸಿಬಿ, 10 ಟ್ರ್ಯಾಕ್ಟರ್ ಹಾಗೂ 4 ಟಿಪ್ಪರ್ಗಳನ್ನು ಬಳಸಿಕೊಳ್ಳಲಾಯಿತು ಎಂದು ಆಯುಕ್ತರು ತಿಳಿಸಿದರು.
