ಆರೈಕೆಯ ಷರತ್ತಿಲ್ಲದ ದಾನಪತ್ರ ರದ್ದು ಸಾಧ್ಯವಿಲ್ಲ| high court

ಸೊಸೆಗೆ ನೀಡಿದ್ದ ದಾನಪತ್ರವನ್ನು ಅಸಿಂಧುಗೊಳಿಸಿ ಆಸ್ತಿಯನ್ನು ಮಾವನಿಗೆ ಮರಳಿಸಿದ್ದ ಹಿರಿಯ ನಾಗರಿಕರ ಕಲ್ಯಾಣ ನ್ಯಾಯಮಂಡಳಿಯ ಆದೇಶ ರದ್ದುಗೊಳಿಸಿರುವ ನ್ಯಾಯಮೂರ್ತಿ ಸೂರಜ್​ ಗೋವಿಂದರಾಜ್​ ಅವರಿದ್ದ ಏಕಸದಸ್ಯ ನ್ಯಾಯಪೀಠ ಈ ಆದೇಶ ನೀಡಿದೆ.

ಹಿರಿಯ ನಾಗರಿಕರ ನಿರ್ವಹಣೆ ಮತ್ತು ಕಲ್ಯಾಣ ಕಾಯ್ದೆಯ ಸೆಕ್ಷನ್​ 23ರ ಅಡಿಯಲ್ಲಿ ಆಸ್ತಿ ವರ್ಗಾವಣೆಗಳನ್ನು ರದ್ದುಪಡಿಸಬೇಕಾದರೆ, ಆ ದಾನಪತ್ರದಲ್ಲಿ ಹಿರಿಯ ನಾಗರಿಕರಿಗೆ ಮೂಲಸೌಕರ್ಯ ಮತ್ತು ಇತರ ಅಗತ್ಯಗಳನ್ನು ಪೂರೈಸುವ ಕಡ್ಡಾಯ ಷರತ್ತು ಇರಬೇಕು. ಆದರೆ, ಈ ಪ್ರಕರಣದಲ್ಲಿ ಅಂತಹ ಷರತ್ತುಗಳಿಲ್ಲದೆ ಸ್ವಯಂಪ್ರೇರಿತರಾಗಿ ಆಸ್ತಿಯನ್ನು ಸೊಸೆಗೆ ನೀಡಲಾಗಿದೆ.

ಬೆಂಗಳೂರಿನ ಬ್ಯಾಟರಾಯನಪುರದ ವ್ಯಕ್ತಿಯೊಬ್ಬರು 10 ವಸತಿ ಘಟಕಗಳನ್ನು ಹೊಂದಿರುವ ಆಸ್ತಿಯನ್ನು ತಮ್ಮ ಸೊಸೆ ಮತ್ತು ಮೊಮ್ಮಗನ ಹೆಸರಿಗೆ 2020ರ ಅಕ್ಟೋಬರ್​ನಲ್ಲಿ ದಾನಪತ್ರದ ಮೂಲಕ ನೋಂದಾಯಿಸಿದ್ದರು. ಅವರ ಮಗ ಕುಟುಂಬವನ್ನು ಸರಿಯಾಗಿ ನೋಟಿಕೊಳ್ಳದ ಹಿನ್ನಲೆಯಲ್ಲಿ, ಸೊಸೆ ಮತ್ತು ಮೊಮ್ಮಗನ ಭವಿಷ್ಯದ ರಕ್ಷಣೆಗಾಗಿ ಈ ಆಸ್ತಿಯನ್ನು ನೀಡಿದ್ದರು. ಆದರೆ, ನಂತರದ ದಿನಗಳಲ್ಲಿ ಕೌಟುಂಬಿಕ ಕಲಹ ಉಂಟಾಗಿ ಸೊಸೆಯು ಮನೆಯಿಂದ ಹೊರಬಂದಿದ್ದರು. 2022ರಲ್ಲಿ ಹಿರಿಯ ನಾಗರಿಕರ ಕಲ್ಯಾಣ ನ್ಯಾಯಮಂಡಳಿಗೆ ಅರ್ಜಿ ಸಲ್ಲಿಸಿದ್ದ ಮಾವ, ಸೊಸೆಯು ತಮಗೆ ಮೂಲಸೌಕರ್ಯಗಳನ್ನು ಪೂರೈಸದ ಹಿನ್ನಲೆಯಲ್ಲಿ ದಾನಪತ್ರವನ್ನು ರದ್ದುಪಡಿಸಬೇಕು ಎಂದು ಕೋರಿದ್ದರು. ಮನವಿಯನ್ನು ನ್ಯಾಯಮಂಡಳಿ ಪುರಸ್ಕರಿಸಿತ್ತು. ಈ ಆದೇಶ ರದ್ದುಕೋರಿ ಸೊಸೆ ಹೈಕೋರ್ಟ್​ ಮೆಟ್ಟಿಲೇರಿದ್ದರು. 

ಹಿರಿಯ ನಾಗರಿಕರ ನಿರ್ವಹಣೆ ಮತ್ತು ಕಲ್ಯಾಣ ಕಾಯ್ದೆಯ ಸೆಕ್ಷನ್​ 23ರ ಅಡಿಯಲ್ಲಿ ಅರ್ಜಿ ಸಲ್ಲಿಸುವಾಗ 60 ವರ್ಷ ಪೂರೈಸಿರಬೇಕು ಅಥವಾ ನ್ಯಾಯಮಂಡಳಿ ಅಥವಾ ನ್ಯಾಯಾಲಯಗಳು ಪ್ರಕರಣಗಳನ್ನು ವಿಚಾರಣೆಗೆ ಪರಿಗಣಿಸುವ, ಆದೇಶ ನೀಡುವ ಹಂತದೊಳಗೆ 60 ವರ್ಷ ಪೂರೈಸಿದರೆ ಸಾಕು ಎಂದು ನ್ಯಾಯಾಲಯ ತಿಳಿಸಿದೆ. ಪಾಲಕರು ಮತ್ತು ಹಿರಿಯ ನಾಗರಿಕರ ವ್ಯಾಖ್ಯಾನದಲ್ಲಿ ವ್ಯತ್ಯಾಸವಿದೆ ಎಂದು ಸ್ಪಷ್ಟಪಡಿಸಿದೆ.