ನಗರ ವಿವಿಯಲ್ಲಿ ಪಿಎಚ್.ಡಿಗೆ ಗ್ರಹಣ: ಒಂದೂವರೆ ವರ್ಷ ಕಳೆದರೂ ನಡೆಯದ ಕೌನ್ಸೆಲಿಂಗ್

ದೇವರಾಜ್ ಎಲ್. ಬೆಂಗಳೂರು: ಬೆಂಗಳೂರು ಕೇಂದ್ರ (ನಗರ) ವಿಶ್ವವಿದ್ಯಾಲಯ ಪಿಎಚ್.ಡಿಗೆ ಅರ್ಜಿ ಅಹ್ವಾನಿಸಿ ಒಂದೂವರೆ ವರ್ಷ ಕಳೆದರೂ ವಿದ್ಯಾರ್ಥಿಗಳಿಗೆ ಕೌನ್ಸೆಲಿಂಗ್ ನಡೆಸುವಲ್ಲಿ ವಿಫಲವಾಗಿದೆ. ವಿವಿಯು 2019ರ ಮಾರ್ಚ್​ನಲ್ಲೇ 18 ವಿಷಯಗಳಲ್ಲಿ ಪಿಎಚ್.ಡಿಗೆ ಅರ್ಜಿ ಆಹ್ವಾನಿಸಿತ್ತು. ಫೆಬ್ರವರಿಯಲ್ಲಿ ಅರ್ಜಿ ಸಲ್ಲಿಕೆ ಅಂತ್ಯ ಮಾಡಿ ಮ್ಯಾನೇಜ್​ವೆುಂಟ್ ಮತ್ತು ವಾಣಿಜ್ಯ ಹೊರತಾಗಿ ಉಳಿದ ಎಲ್ಲ ವಿಷಯಗಳಿಗೆ ಕೌನ್ಸೆಲಿಂಗ್ ಮಾಡಿ ಅಭ್ಯರ್ಥಿಗಳ ನೋಂದಣಿ ಮಾಡಿಕೊಂಡಿದೆ. ಆದರೆ, ಈ ಎರಡು ವಿಭಾಗದ ವಿದ್ಯಾರ್ಥಿಗಳಿಗೆ ಕೌನ್ಸೆಲಿಂಗ್ ನಡೆಯದಿರುವುದರಿಂದ ಅಭ್ಯರ್ಥಿಗಳು ವಿವಿಯ ಅಧಿಸೂಚನೆಗಾಗಿ ಕಾಯುತ್ತಿದ್ದಾರೆ. ವಿವಿಯು ಪ್ರತಿ ಬಾರಿ ಒಂದಲ್ಲೊಂದು ನೆಪ ಇಟ್ಟುಕೊಂಡು ಪ್ರಕ್ರಿಯೆ ಮುಂದೂಡುತ್ತಲೇ ಬರುತ್ತಿದೆ.

ಕರೊನಾ ನೆಪ: ಮಾರ್ಚ್​ನಲ್ಲಿ ಲಾಕ್​ಡೌನ್ ಜಾರಿಯಾದ ನಂತರ ಕರೊನಾ ನೆಪ ಹೇಳುತ್ತಿತ್ತು. ಇದೀಗ ಆನ್​ಲೈನ್ ಪ್ರಕ್ರಿಯೆ ಚಾಲ್ತಿಯಲ್ಲಿದ್ದು, ಆಫ್​ಲೈನ್​ನಲ್ಲೇ ಪರೀಕ್ಷೆಗಳು ನಡೆಸಲು ಸರ್ಕಾರ ಮುಂದಾಗಿದ್ದರೂ ಪಿಎಚ್.ಡಿ ಕೌನ್ಸೆಲಿಂಗ್ ಮಾಡುವುದಕ್ಕೆ ಮಾತ್ರ ವಿವಿ ಆಲೋಚನೆ ಮಾಡದಿರುವುದು ಸಾವಿರಾರು ಅಭ್ಯರ್ಥಿಗಳ ಆಕ್ರೋಶಕ್ಕೆ ಕಾರಣವಾಗಿದೆ.

ಇದನ್ನೂ ಓದಿ: ಪ್ರೇಮ ವಿವಾಹ ಮಾಡಿಕೊಂಡರೆ ಆಸ್ತಿಯ ಹಕ್ಕು ಕಳೆದುಕೊಳ್ಳುತ್ತೇವಾ?

ಬೆಂ.ಕೇಂದ್ರ ವಿವಿ ಪಿಎಚ್.ಡಿ ಅರ್ಜಿ ಆಹ್ವಾನಿಸುವುದಕ್ಕೆ ರಾಜ್ಯಪಾಲರ ಅನುಮತಿಯನ್ನೇ ಪಡೆದಿರಲಿಲ್ಲ. ಈ ವಿಚಾರದ ಬಗ್ಗೆ ಮಾಧ್ಯಮಗಳು ಬೆಳಕಿಗೆ ತಂದ ನಂತರ ಅನುಮತಿ ಪಡೆಯಿತು. ತಾಂತ್ರಿಕ ಕಾರಣ ಹೇಳಿಕೊಂಡು ಹಲವು ಬಾರಿ ಕೌನ್ಸೆಲಿಂಗ್ ಮುಂದೂಡಿತ್ತು.

ಇದನ್ನೂ ಓದಿ: ಸಿಎಎ ವಿರುದ್ಧದ ಹೋರಾಟಕ್ಕೆ ಮಹಿಳೆಯರಿಗೆ ದಿನಗೂಲಿ! ಸಾಕ್ಷ್ಯ ಒದಗಿಸಿದ ಪೊಲೀಸರು

ಹೊಸ ವಿವಿಯ ಪಿಎಚ್.ಡಿ: ಹೊಸ ವಿಶ್ವವಿದ್ಯಾಲಯ ಆರಂಭದ ನಂತರ ಮೊದಲ ಬಾರಿಗೆ ಪಿಎಚ್.ಡಿಗೆ ಅರ್ಜಿ ಆಹ್ವಾನಿಸಿದ್ದರಿಂದ ಲಭ್ಯವಿರುವ 139 ಸೀಟುಗಳಿಗೆ ಬರೋಬ್ಬರಿ 1,114 ಅರ್ಜಿಗಳು ಸಲ್ಲಿಕೆಯಾಗಿವೆ. ವಾಣಿಜ್ಯ ಮತ್ತು ಮ್ಯಾನೇಜ್​ವೆುಂಟ್ ವಿಭಾಗದಲ್ಲಿ ಲಭ್ಯವಿರುವ 36 ಸೀಟುಗಳಿಗೆ 491 ಅರ್ಜಿಗಳು ಬಂದಿವೆ. 1:5 ಅನುಪಾತದಲ್ಲಿ ಆಯ್ಕೆ ಪಟ್ಟಿ ಬಿಡುಗಡೆ ಮಾಡಿದ್ದು, ಕೌನ್ಸೆಲಿಂಗ್ ಮಾತ್ರ ಬಾಕಿ ಉಳಿದಿದೆ.

ಇದನ್ನೂ ಓದಿ: ನೋಡಲ್ ಅಧಿಕಾರಿ ವಿರುದ್ಧ ಜೆಸಿ ನಗರದಲ್ಲಿ ಪ್ರತಿಭಟನೆ : ಸ್ಥಳೀಯರನ್ನು ಒಕ್ಕಲೆಬ್ಬಿಸಲು ಎಸ್.ಜಿ. ರವೀಂದ್ರ ದುಂಡಾವರ್ತನೆ

ಅಧಿಕಾರಿಗಳ ಕಿತ್ತಾಟ: ಬೆಂ.ಕೇಂದ್ರ ವಿವಿಯಲ್ಲಿ ಅಧಿಕಾರಿಗಳು ಮತ್ತು ಕುಲಪತಿ ನಡುವೆ ಸಮನ್ವಯತೆ ಕೊರತೆ ಇದೆ. ಕುಲಪತಿ ಹೇಳಿದ್ದನ್ನು ಅಧಿಕಾರಿಗಳು ಮತ್ತು ಅಧಿಕಾರಿಗಳ ಸಲಹೆಗಳನ್ನು ಕುಲಪತಿ ಸ್ವೀಕರಿಸದೆ ಇರುವುದರಿಂದ ವಿದ್ಯಾರ್ಥಿಗಳು ತೊಂದರೆ ಅನುಭವಿಸುವಂತಾಗಿದೆ. ವಿವಿಯ ವ್ಯಾಪ್ತಿಯಲ್ಲೇ ಇರದ ಪ್ರಾಧ್ಯಾಪಕರೊಬ್ಬರನ್ನು ಪಿಎಚ್.ಡಿ ಮಾರ್ಗದರ್ಶಕರಾಗಿ ಮಾಡುವಂತೆ ಕುಲಪತಿಗಳು ಸೂಚನೆ ನೀಡಿದ್ದರು.ಇದು ಕಾನೂನಿನ ವಿರುದ್ಧ ಎಂದು ಅಧಿಕಾರಿಗಳು ತಿಳಿಸಿದ್ದರು. ಇದರಿಂದಾಗಿ ಕುಲಪತಿ ಕೌನ್ಸೆಲಿಂಗ್ ಮಾಡಲು ಅಡ್ಡಿ ಪಡಿಸುತ್ತಿದ್ದಾರೆಂಬ ಆರೋಪ ಕೂಡ ಕೇಳಿ ಬಂದಿದೆ.

https://www.vijayavani.net/jharkhand-education-minister-gifts-cars-to-class-10th-12th-state-toppers/