ಬಳ್ಳಾರಿ: ನಗರದ ವಿವಿಧ ಜನವಸತಿ ಪ್ರದೇಶಕ್ಕೆ ಶನಿವಾರ ಬೆಳಂಬೆಳ್ಳಗ್ಗೆ ಕರಡಿಯೊಂದು ನುಗ್ಗಿ ಜನರನ್ನು ಭಯ ಭೀತರನ್ನಾಗಿಸಿತು. ವಿಮ್ಸ್ ಆಸ್ಪತ್ರೆಯ ಆವರಣದಲ್ಲಿರುವ ನ್ಯೂ ಡೆಂಟಲ್ ಕಾಲೇಜು ಹಾಗೂ ನಗರದ ರೇಣುಕಾ ಪ್ರದೇಶದ 16 ನೇ ಕ್ರಾಸ್ ಬಳಿ ಕರಡಿ ಕಾಲಿಟ್ಟು ಅವಾಂತರ ಸೃಷ್ಟಿಸಿತ್ತು. ಕರಡಿ ಬಂದಿದೆ ಎನ್ನುವಷ್ಟರಲ್ಲಿ ಅಪಾರ ಸಂಖ್ಯೆಯಲ್ಲಿ ಜನಸ್ತೋಮ ಸೇರಿದ ಹಿನ್ನಲೆ ರೇಣುಕಾ ನಗರದ ಬಳಿ ಪೊದೆಯಲ್ಲಿ ಅವಿತು ಕುಳಿತುಕೊಂಡಿತು. ಈ ವೇಳೆ ಸ್ಥಳಕ್ಕಾಗಮಿಸಿದ ಅರಣ್ಯ ಇಲಾಖೆ ಸಿಬ್ಬಂದಿ ಮತ್ತು ಪೊಲೀಸರು ಜಂಟಿ ಕಾರ್ಯಾಚರಣೆ ನಡೆಸಿ ಕರಡಿ ಹಿಡಿಯಲು ಹರ ಸಾಹಸ ಪಟ್ಟರೂ ಕರಡಿ ಮಾತ್ರ ಗಿಡದ ಪೊದೆಯಿಂದ ಹಲವು ಗಂಟೆಗಳ ಕಾಲ ಹೊರ ಬರಲಿಲ್ಲ.
