ವೆಂಕೋಬಾ ರಥೋತ್ಸವಕ್ಕೆ ಕ್ಷಣಗಣನೆ

ಪೇಶ್ವೆಗಳ ಆಡಳಿತ ಕಾಲದಲ್ಲಿ ಸ್ಥಾಪನೆಗೊಂಡಿರುವ ಈ ಭಾಗದ ಆರಾಧ್ಯದೈವ ವೆಂಕಟೇಶ್ವರ ದೇವಸ್ಥಾನ ತನ್ನದೇ ಪರಂಪರೆ ಹೊಂದಿದ್ದು, ಗಡಿ ಭಾಗದಲ್ಲಿ ಕನ್ನಡ-ಮರಾಠಿಗರ ಸಾಂಸ್ಕೃತಿಕ ಸಂಗಮದ ಪ್ರತಿಬಿಂಬವಾಗಿ ಗುರುತಿಸಿಕೊಂಡಿದೆ.

ಜಾತ್ರೋತ್ಸವ ಪ್ರಯುಕ್ತ ನಗರದ ಪ್ರಮುಖ ಬೀದಿಗಳನ್ನು ವಿದ್ಯುತ್ ದೀಪಗಳಿಂದ ಅಲಂಕರಿಸಲಾಗಿದೆ. ನಗರದ ಹುತಾತ್ಮ ಚೌಕದಲ್ಲಿನ ಸ್ವಾಗತ ಕಮಾನು ತಿರುಪತಿ ತಿಮ್ಮಪ್ಪನ ಕ್ಷೇತ್ರಕ್ಕೆ ಸ್ವಾಗತಿಸುವಂತಿದೆ. ಧ್ವನಿವರ್ಧಕಗಳಲ್ಲಿ ಮೊಳಗುವ ಗೋವಿಂದ ನಾಮಾವಳಿ, ವೆಂಕಟೇಶ್ವರ ನಾಮ ಹೋಲುವ ವಿದ್ಯುತ್ ದೀಪಾಲಂಕಾರ ಜಾತ್ರೆಯ ಕಳೆ ಹೆಚ್ಚಿಸಿದೆ.

ಹಿನ್ನೆಲೆ: ಬ್ರಿಟೀಷ್ ಆಳ್ವಿಕೆ ಕಾಲದಲ್ಲಿ ಮರಾಠಿ ಪೇಶ್ವೆಗಳ ಆಡಳಿತಕ್ಕೆ ರಾಮದುರ್ಗ ಸಂಸ್ಥಾನ ಒಳಪಟ್ಟಿತ್ತು. ನರಗುಂದ ಮತ್ತು ರಾಮದುರ್ಗ ಸಂಸ್ಥಾನಗಳು ಭಾವೆ ಸಹೋದರರ ಆಡಳಿತ ವಿಭಜನೆ ನಂತರ ರಾಮದುರ್ಗದ ಕೊನೆಯ ಅರಸು ರಾಮರಾಯ ವೆಂಕಟರಾಯ ಭಾವೆ ರಾಮದುರ್ಗ ಹಾಗೂ ಮುದಕವಿ ಗ್ರಾಮದಲ್ಲಿ ವೆಂಕಟೇಶ್ವರ ದೇವಸ್ಥಾನ ನಿರ್ಮಿಸಿ ಜಾತ್ರೆ ಆರಂಭಿಸಿದ್ದಾರೆ. ಆ ಪರಂಪರೆ ಇಂದಿಗೂ ಮುಂದುವರಿದಿದೆ.

ಒಟ್ಟು 10 ದಿನ ಜರುಗುವ ಜಾತ್ರೆಯಲ್ಲಿ ಪ್ರತಿದಿನ ಬ್ರಹ್ಮೋತ್ಸವ, ವಿವಿಧ ವಾಹನೋತ್ಸವ, ವೆಂಕಟೇಶ್ವರ ದೇವರ ಉತ್ಸವ ಮೂರ್ತಿ ಮೆರವಣಿಗೆ ಹಾಗೂ ಮಾ.28ರಂದು ಲಲಿತ ಓಕುಳಿ ಜರುಗಲಿದೆ. ಭಕ್ತರು ತಮ್ಮ ಇಷ್ಟಾರ್ಥ ಪ್ರಾಪ್ತಿಗಾಗಿ ಭಕ್ತಿ-ಭಾವದಿಂದ ಜಾತ್ರೋತ್ಸವದಲ್ಲಿ ಪಾಲ್ಗೊಳ್ಳುತ್ತಾರೆ.