ಉದ್ಯೋಗ ಸೃಷ್ಟಿಸಿದ ಚಳಿಗಾಲ ಅಧಿವೇಶನ!

ಬೆಳಗಾವಿ: ಉತ್ತರ ಕರ್ನಾಟಕ ಭಾಗದ ಜನರ ಹೆಮ್ಮೆಯ ಪ್ರತೀಕವಾಗಿರುವ ಬೆಳಗಾವಿ ಸುವರ್ಣ ವಿಧಾನಸೌಧದಲ್ಲಿ ವರ್ಷಪೂರ್ತಿ ಸರ್ಕಾರಿ ಕಚೇರಿಗಳು ಕಾರ್ಯನಿರ್ವಹಿಸದಿದ್ದರೂ ಚಳಿಗಾಲ ಅಧಿವೇಶನ ನೂರಾರು ಕುಟುಂಬಗಳಿಗೆ ಉದ್ಯೋಗ ಸೃಷ್ಟಿಸಿದೆ.

ಸುವರ್ಣ ವಿಧಾನಸೌಧದಲ್ಲಿ ಡಿ.8ರಿಂದ ಹತ್ತು ದಿನಗಳ ಕಾಲ ನಡೆಯಲಿರುವ ವಿಧಾನಮಂಡಲ ಚಳಿಗಾಲ ಅಧಿವೇಶನ ನಗರ, ಗ್ರಾಮೀಣ ಪ್ರದೇಶಗಳಲ್ಲಿ ಬಡ ಕುಟುಂಬಗಳಿಗೆ ಉದ್ಯೋಗ ಕಲ್ಪಿಸಿದೆ. ಅಲ್ಲದೆ, ಸಾರಿಗೆ, ಆರೋಗ್ಯ, ವಸತಿ, ಹೋಟೆಲ್ ಹೀಗೆ ವಿವಿಧ ವಲಯದಲ್ಲಿ ಕೋಟ್ಯಂತರ ರೂ. ಆರ್ಥಿಕ ವಹಿವಾಟಿಗೆ ಮಾರುಕಟ್ಟೆ ಕಲ್ಪಿಸಿಕೊಟ್ಟಿದೆ.

ಈ ಬಾರಿ ಚಳಿಗಾಲ ಅಧಿವೇಶನದ ಪೂರ್ವ ತಯಾರಿ ಕೆಲಸಗಳು ನ.2ರಿಂದಲೇ ಆರಂಭವಾಗಿದ್ದು, ಸುವರ್ಣ ವಿಧಾನಸೌಧ ಕಟ್ಟಡ ಸ್ವಚ್ಛತೆ, ಮೂರ್ತಿಗಳ ಸ್ವಚ್ಛತೆ, ಸುಣ್ಣ-ಬಣ್ಣ, ಉದ್ಯಾನ ನಿರ್ವಹಣೆ, ಆಲಂಕಾರಿಕ ಗಿಡ, ದೀಪಗಳ ಅಳವಡಿಕೆ, ಪ್ರತಿಭಟನೆ ನಡೆಸುವ ಸ್ಥಳಗಳ ಸ್ವಚ್ಛತೆ, ಪಾರ್ಕಿಂಗ್ ಸ್ಥಳ ಸ್ವಚ್ಛತೆ ಕೆಲಸಗಳಲ್ಲಿ 550ಕ್ಕೂ ಅಧಿಕ ಕಾರ್ಮಿಕರು ಕೆಲಸ ಮಾಡುತ್ತಿದ್ದಾರೆ. ಸುತ್ತಮುತ್ತಲಿನ ಗ್ರಾಮಗಳಿಂದ ಬರುವ ಮಹಿಳೆಯರು, ಪುರುಷರು ನಿತ್ಯ ಬೆಳಗ್ಗೆ 8 ರಿಂದ ಸಂಜೆ 6ರ ವರೆಗೆ ದುಡಿಯುತ್ತಿದ್ದಾರೆ.

ಈಗಾಗಲೇ ಚಳಿಗಾಲ ಅಧಿವೇಶನಕ್ಕೂ ಮುನ್ನ ಸೌಧದ ಆವರಣದಲ್ಲಿ ಉದ್ಯಾನ ನಿರ್ಮಾಣ ಹಾಗೂ ನವೀಕರಣಕ್ಕಾಗಿ ಧಾರವಾಡ, ಹುಬ್ಬಳ್ಳಿ, ಗದಗ, ಖಾನಾಪುರ, ಅಥಣಿ ಸೇರಿ ವಿವಿಧ ಭಾಗಗಳಿಂದ 150ಕ್ಕೂ ಅಧಿಕ ಕಾರ್ಮಿಕರ ಆಗಮಿಸಿದ್ದಾರೆ. ಸೌಧದ ಒಳ ಆವರಣದಲ್ಲಿ ವಿದ್ಯುತ್, ಫರ್ನಿಚರ್ ದುರಸ್ತಿ, ಕಂಪ್ಯೂಟರ್ ಅಳವಡಿಕೆಗೆ ಪ್ರತ್ಯೇಕವಾಗಿ 50ಕ್ಕೂ ಅಧಿಕ ಸಿಬ್ಬಂದಿ ಒಂದು ವಾರದಿಂದ ಕೆಲಸ ಮಾಡುತ್ತಿದ್ದಾರೆ. ಈ ಬಾರಿ ಅಧಿವೇಶಕ್ಕಾಗಿ ಸೌಧ ಸಿದ್ಧಪಡಿಸುವ ನಿಟ್ಟಿನಲ್ಲಿ ಸಾವಿರಕ್ಕೂ ಅಧಿಕ ಜನರಿಗೆ ಉದ್ಯೋಗ ದಕ್ಕಿದೆ.

ದರದಲ್ಲಿ ಏರಿಕೆ?: ರಾಜ್ಯ ಸರ್ಕಾರ ಚಳಿಗಾಲ ಅಧಿವೇಶನದ ದಿನಾಂಕ ನಿಗದಿಪಡಿಸುತ್ತಿದ್ದಂತೆ ಬೆಳಗಾವಿ ಮಾರುಕಟ್ಟೆ ವಾತಾವರಣ ಬದಲಾಗಿದ್ದು, ಸಿಹಿತಿಂಡಿ, ಆಹಾರ ಪದಾರ್ಥ, ಬಟ್ಟೆಗಳು ಸೇರಿ ವಿವಿಧ ವಸ್ತುಗಳ ದರದಲ್ಲಿ ಭಾರಿ ಬದಲಾವಣೆ ಆಗಿದೆ. ಕಾರುಗಳ ಬಾಡಿಗೆ, ಪ್ರವಾಸಿ ಪ್ಯಾಕೇಜ್‌ಗಳು, ಗೋವಾ, ಮುಂಬೈ ಪ್ರವಾಸದ ಎರಡು ದಿನದ ಪ್ಯಾಕೇಜ್ ದರದಲ್ಲಿ ಶೇ.12ರಷ್ಟು ದರ ಹೆಚ್ಚಳವಾಗಿದೆ. ಐಷಾರಾಮಿ ಹೋಟೆಲ್ ಕೊಠಡಿಗಳ ದರ ಕೂಡ ಡಿ.1ರಿಂದ ಹೆಚ್ಚಾಗಲಿದೆ.

ಪ್ರತಿ ವರ್ಷ ಹತ್ತು ದಿನಗಳ ಕಾಲ ನಡೆಯುವ ವಿಧಾನಮಂಡಲ ಚಳಿಗಾಲ ಅಧಿವೇಶನದಲ್ಲಿ ಭಾಗವಹಿಸಲು ರಾಜ್ಯದ ವಿವಿಧ ಭಾಗಗಳಿಂದ ಸಚಿವರು, ಶಾಸಕರು, ಅಧಿಕಾರಿಗಳು, ರಾಜಕೀಯ ಪಕ್ಷಗಳ ಮುಖಂಡರು, ಕಾರ್ಯಕರ್ತರು ಸೇರಿ 15 ಸಾವಿರಕ್ಕೂ ಅಧಿಕ ಜನರು ಆಗಮಿಸುತ್ತಾರೆ. ಈ ವೇಳೆ ನಗರದಲ್ಲಿ ಬರೋಬ್ಬರಿ 50 ಕೋಟಿ ರೂ. ವರೆಗೆ ವಹಿವಾಟು ನಡೆಯುವ ಸಾಧ್ಯತೆ ಇದೆ ಎಂದು ವ್ಯಾಪಾರಿಗಳು ತಿಳಿಸಿದ್ದಾರೆ.

ನಗರದಲ್ಲಿ ಚಳಿಗಾಲ ಅಧಿವೇಶನ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ನಗರ, ಗ್ರಾಮೀಣ ಭಾಗದ ಜನರಿಗೆ 45 ದಿನಗಳ ಕಾಲ ನಿರಂತರ ಉದ್ಯೋಗ ಅವಕಾಶ ಸಿಗುತ್ತದೆ. ಹೋಟೆಲ್‌ಗಳಲ್ಲಿ ಒಂದು ತಿಂಗಳ ಮಟ್ಟಿಗೆ ತಾತ್ಕಾಲಿಕವಾಗಿ 560ಕ್ಕೂ ಅಧಿಕ ಕಾರ್ಮಿಕರನ್ನು ನೇಮಕ ಮಾಡಿಕೊಳ್ಳಲಾಗಿದೆ. ಹೀಗಾಗಿ, ಅಧಿವೇಶನದ ಕಾರಣದಿಂದ ಕಾರ್ಮಿಕರಿಗೆ 45 ದಿನಗಳ ಕಾಲ ನಿರಂತರ ಉದ್ಯೋಗ ಅವಕಾಶ ಸಿಕ್ಕಂತಾಗಿದೆ ಎಂದು ಕಾರ್ಮಿಕರಾದ ರಮೇಶ ಪಡತರೆ, ಪಾರ್ವತಿ ಜಾಧವ ತಿಳಿಸಿದ್ದಾರೆ.