ಕುಂದಾನಗರಿಯಲ್ಲಿ ಎತ್ತರದ ವಿಗ್ರಹಗಳದ್ದೇ ಸದ್ದು!

ಹೌದು. 2012ರಲ್ಲಿ ಸದಾಶಿವನಗರದಲ್ಲಿ ಗಣೇಶ ವಿಸರ್ಜನೆ ವೇಳೆ ಸಂಭವಿಸಿದ ವಿದ್ಯುತ ಅವಘಡದ ಹಿನ್ನೆಲೆಯಲ್ಲಿ ಮುನ್ನೆಚ್ಚರಿಕೆ ವಹಿಸಿರುವ ಪೊಲೀಸ್ ಇಲಾಖೆ, ಗಣೇಶ ವಿಗ್ರಹದ ಎತ್ತರವನ್ನು ನೆಲಮಟ್ಟದಿಂದ 10 ಅಡಿಗೆ ಸೀಮಿತಗೊಳಿಸಿದೆ. ಮತ್ತೊಂದೆಡೆ, ಹಲವು ಸಾರ್ವಜನಿಕ ಗಣೇಶೋತ್ಸವ ಮಂಡಳಿಗಳು 22ರಿಂದ 25 ಅಡಿ ಎತ್ತರದ ವಿಗ್ರಹಗಳನ್ನು ಹಾಗೂ 35 ಅಡಿವರೆಗೂ ಎತ್ತರದ ಮಂಟಪಗಳನ್ನು ಮಂಡಳಿಗಳು ನಿರ್ಮಿಸುತ್ತಿರುವುದು ಗಣೇಶೋತ್ಸವ ನಿರ್ವಹಣೆಗೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ.

ಗಣೇಶೋತ್ಸವದ ಪ್ರಮುಖ ಆಕರ್ಷಣೆಯೇ ಭವ್ಯ ವಿಸರ್ಜನಾ ಮೆರವಣಿಗೆ. ಆದರೆ, 25 ಅಡಿ ಎತ್ತರದ ವಿಗ್ರಹಗಳನ್ನು ನಗರದ ರಸ್ತೆಗಳಲ್ಲಿ ಸುರಕ್ಷಿತವಾಗಿ ಕೊಂಡೊಯ್ಯುವುದು ಸುಲಭದ ಕೆಲಸವಲ್ಲ. ವಿದ್ಯುತ ತಂತಿಗಳು ರಸ್ತೆಗಳ ಮೇಲೆ ಜೋತು ಬಿದ್ದಿವೆ. ಕೆಲ ಪ್ರದೇಶಗಳಲ್ಲಿ ರಸ್ತೆ ಬದಿಯ ಮರಗಳ ಕೊಂಬೆಗಳು ಒಂದಕ್ಕೊಂದು ಕೂಡಿಕೊಂಡಿವೆ. ಇಂತಹ ಪರಿಸ್ಥಿತಿಯಲ್ಲಿ ಬೃಹತ್ ವಿಗ್ರಹಗಳನ್ನು ಸಾಗಿಸುವಾಗ ವಿದ್ಯುತ ತಂತಿ ಹಾಗೂ ಮರದ ಕೊಂಬೆಗಳಿಂದ ಅಪಾಯ ಎದುರಾಗುವ ಸಾಧ್ಯತೆ ಇದೆ.

ನಗರದ ಹಲವು ಕಲಾವಿದರು ಈಗಾಗಲೇ 20 ಅಡಿಗಿಂತಲೂ ಹೆಚ್ಚಿನ ಎತ್ತರದ ಗಣೇಶ ವಿಗ್ರಹಗಳನ್ನು ನಿರ್ಮಿಸಿದ್ದು, ಅಂತಿಮ ಸ್ಪರ್ಶ ನೀಡುತ್ತಿದ್ದಾರೆ. ಹೀಗಾಗಿ 15ರಿಂದ 20 ಅಡಿಗಿಂತಲೂ ಹೆಚ್ಚಿನ ಎತ್ತರದ ವಿಗ್ರಹಗಳು ಈ ಬಾರಿ ಪ್ರತಿಷ್ಠಾಪನೆಗೊಳ್ಳುವ ಸಾಧ್ಯತೆ ಹೆಚ್ಚಾಗಿದೆ. ಈ ಹಿನ್ನೆಲೆ ನಗರ ಪೊಲೀಸರು, ಮಹಾನಗರ ಪಾಲಿಕೆ ಹಾಗೂ ಜಿಲ್ಲಾಡಳಿತ ಸಾರ್ವಜನಿಕ ಗಣೇಶೋತ್ಸವ ಮಂಡಳಿಗಳ ಪ್ರಮುಖರನ್ನು ಕರೆದು ಸಭೆ ನಡೆಸಿ ವಿಗ್ರಹ ಎತ್ತರ ಕಡಿಮೆ ಮಾಡುವಂತೆ ವಿನಂತಿಸಿದರು ಪ್ರಯೋಜನವಾಗಿಲ್ಲ ಎಂದು ಅಧಿಕಾರಿಗಳು, ಪೊಲೀಸರು ಅಸಹಾಯಕತೆ ವ್ಯಕ್ತಪಡಿಸಿದ್ದಾರೆ.

...........................

ಬಾಕ್ಸ್

ಗಲ್ಲಿಗಲ್ಲಿಯಲ್ಲಿ ಗಣೇಶನ ವೈಭವ

ಬರದ ಛಾಯೆಯ ನಡುವೆಯೂ ವಿಘ್ನ ನಿವಾರಕ ಗಣೇಶನನ್ನು ಅದ್ದೂರಿಯಾಗಿ ಬರಮಾಡಿಕೊಳ್ಳಲು ಬೆಳಗಾವಿ ಸಿದ್ಧವಾಗುತ್ತಿದೆ. ನಗರದ ಗಲ್ಲಿ-ಗಲ್ಲಿಗಳಲ್ಲಿ ಬಗೆಬಗೆಯ ವಿನ್ಯಾಸದ ಮಂಟಪಗಳು ನಿರ್ಮಾಣಗೊಳ್ಳುತ್ತಿವೆ.ಗಣೇಶ ಚತುರ್ಥಿಗೆ ಇನ್ನೇನು ಒಂದು ವಾರ ಬಾಕಿ ಇರುವ ಸಂದರ್ಭದಲ್ಲಿ ನಗರದ ಪ್ರಮುಖ ಪ್ರದೇಶಗಳು ಹಬ್ಬದ ವಾತಾವರಣದಿಂದ ಕಂಗೊಳಿಸುತ್ತಿವೆ. ಈ ಬಾರಿ ಮಹಾನಗರದಲ್ಲಿ 1,024 ಗಣೇಶ ವಿಗ್ರಹಗಳು ಪ್ರತಿಷ್ಠಾಪನೆಗೊಳ್ಳಲಿವೆ.

...............

ಬಾಕ್ಸ್

121 ವರ್ಷಗಳ ಪರಂಪರೆಗೆ ಮತ್ತೊಂದು ವೈಭವ

ಬೆಳಗಾವಿಯ ಗಣೇಶೋತ್ಸವಕ್ಕೆ ಬರೋಬ್ಬರಿ 121 ವರ್ಷಗಳ ಇತಿಹಾಸ. ಕನ್ನಡ ಹಾಗೂ ಮರಾಠಿ ಸಂಸ್ಕೃತಿಗಳ ಸಂಗಮವಾಗಿರುವ ಈ ಗಡಿನಾಡಿನಲ್ಲಿ ಗಣೇಶೋತ್ಸವ ಕೇವಲ ಧಾರ್ಮಿಕ ಆಚರಣೆಯಲ್ಲ ಅದು ನಗರದ ಸಾಂಸ್ಕೃತಿಕ ಅಸ್ಮಿತೆಯ ಪ್ರತೀಕ. ಮಹಾರಾಷ್ಟ್ರದ ಮುಂಬೈ, ಪುಣೆ ಬಳಿಕ ಗಣೇಶೋತ್ಸವವನ್ನು ಅದ್ದೂರಿಯಾಗಿ ಆಚರಿಸುವ ನಗರಗಳಲ್ಲಿ ಬೆಳಗಾವಿಗೂ ವಿಶೇಷ ಸ್ಥಾನವಿದೆ.1905ರಲ್ಲಿ ಲೋಕಮಾನ್ಯ ಬಾಲಗಂಗಾಧರ ತಿಲಕರು ಬೆಳಗಾವಿಗೆ ಆಗಮಿಸಿ ಸಾರ್ವಜನಿಕ ಗಣೇಶೋತ್ಸವಕ್ಕೆ ಚಾಲನೆ ನೀಡಿದ್ದರು.ರವಿವಾರ ಪೇಟೆಯಲ್ಲಿ ಮೊದಲ ಸಾರ್ವಜನಿಕ ಗಣೇಶ ವಿಗ್ರಹ ಪ್ರತಿಷ್ಠಾಪನೆಯಾಗಿತ್ತು. ಅಂದು ಸಣ್ಣ ಪ್ರಮಾಣದಲ್ಲಿ ಆರಂಭಗೊಂಡಿದ್ದ ಉತ್ಸವ, ಕಾಲಕ್ರಮೇಣ ಬೃಹತ ರೂಪ ಪಡೆದುಕೊಂಡು ಇಂದು ದೇಶದ ಗಮನ ಸೆಳೆಯುವ ಮಟ್ಟಕ್ಕೆ ಬೆಳೆದಿದೆ.

.............

ಕೋಟ್ಸ್

ನಗರದಲ್ಲಿ 11 ದಿನಗಳ ಕಾಲ ನಡೆಯುವ ಗಣೇಶೋತ್ಸವದಲ್ಲಿ ಹೆಚ್ಚು ನಿಗಾ ವಹಿಸಲಾಗಿದೆ. 25 ಅಡಿಗಿಂತ ಹಚ್ಚು ಎತ್ತರದ ವಿಗ್ರಹಗಳನ್ನು ನಿರ್ಮಿಸಿರುವ ಕುರಿತು ಪರಿಶೀಲನೆ ನಡೆಸಲಾಗುತ್ತಿದ್ದು, ದೊಡ್ಡ ವಿಗ್ರಹಗಳ ವಿಸರ್ಜನೆ, ಮೆರವಣಿ ನಿರ್ವಹಣೆ ಸವಾಲಾಗಿ ಪರಿಣಮಿಸಿದೆ.

- ನಾರಾಯಣ ಭರಮಣಿ, ಡಿಸಿಪಿ

..............