ಪಾಲಿಕೆ ಆಸ್ತಿ ಪತ್ತೆಗೆ ಹರಸಾಹಸ!

ಈಗಾಗಲೇ ಪಾಲಿಕೆ ಒಡೆತನದ ಆಸ್ತಿ ಸೇರಿ ಸಾಮಾಜಿಕ ಸೇವಾ ಉದ್ದೇಶಕ್ಕೆ ಮೀಸಲಿಟ್ಟಿರುವ ಜಾಗಗಳನ್ನು ಖಾಸಗಿ ಸಂಸ್ಥೆಗಳಿಗೆ ಭೋಗ್ಯ, ಬಾಡಿಗೆ ಆಧಾರದ ಮೇಲೆ 110ಕ್ಕೂ ಅಧಿಕ ಆಸ್ತಿ ನೀಡಲಾಗಿದ್ದು, ಈ ಪೈಕಿ 70ಕ್ಕೂ ಅಧಿಕ ಆಸ್ತಿಗಳ ಗುತ್ತಿಗೆ ಅವಧಿ ಮುಗಿದು ಎರಡು ವರ್ಷ ಕಳೆದಿವೆ. ಆದರೆ, ಇಂತಹ ಆಸ್ತಿ ವಶಕ್ಕೆ ಪಡೆದುಕೊಳ್ಳಲು ಸೂಕ್ತ ದಾಖಲೆಗಳು ಸಿಗುತ್ತಿಲ್ಲ. ಕೆಲ ಆಸ್ತಿ ಖಾಸಗಿ ವ್ಯಕ್ತಿ, ಸಂಸ್ಥೆ ಹೆಸರಿಗೆ ದಾಖಲಾಗಿವೆ. ಇದರಿಂದಾಗಿ ಪಾಲಿಕೆಗೆ ಮಾಸಿಕ ಲಕ್ಷಾಂತರ ರೂ. ಆದಾಯ ನಷ್ಟವಾಗುತ್ತಿದೆ.

2002ರಿಂದ 2020ರ ನಡುವಿನ ಅವಧಿಯಲ್ಲಿ ಪಾಲಿಕೆ ಸಾಕಷ್ಟು ಆಸ್ತಿಗಳನ್ನು ಮನಬಂದಂತೆ ಗುತ್ತಿಗೆ ನೀಡಿದೆ. ಅಂತಹ ಆಸ್ತಿಗಳನ್ನು ಕೆಲವರು ವೈಯಕ್ತಿಕ ಲಾಭಕ್ಕಾಗಿ ಬಳಸಿಕೊಂಡಿದ್ದಾರೆ. ಇನ್ನೂ ಕೆಲವರು ವಾಣಿಜ್ಯ ಮಳಿಗೆಗಳನ್ನು ನಿರ್ಮಿಸಿ ಮಾಸಿಕ 2ರಿಂದ 3 ಲಕ್ಷ ರೂ. ಬಾಡಿಗೆ ಪಡೆದುಕೊಳ್ಳುತ್ತಿದ್ದಾರೆ. ಕೆಲವರು ಸಾಮಾಜಿಕ ಸೇವೆ ಹೆಸರಿನಲ್ಲಿ ಆಸ್ತಿ ಪಡೆದು ಖಾಸಗಿ ವ್ಯಕ್ತಿಗಳ ಹೆಸರಿಗೆ ನೋಂದಣಿ ಮಾಡಿಕೊಂಡಿದ್ದಾರೆ. ಇಂತಹ ಆಸ್ತಿಗಳನ್ನು ಮರಳಿ ಪಡೆದುಕೊಳ್ಳಲು ಕಂದಾಯ ವಿಭಾಗ ಅಧಿಕಾರಿ ವರ್ಗ ಕ್ರಮ ವಹಿಸಿಲ್ಲ. ನೋಟಿಸ್ ಕೂಡ ನೀಡಿಲ್ಲ. ಹೀಗಾಗಿ ಕೆಲವರು ಕೋರ್ಟ್ ಮೂಲಕ ಆಸ್ತಿಗಳನ್ನು ತಮ್ಮಂತೆ ಮಾಡಿಕೊಂಡಿದ್ದಾರೆ.

"