ಭಕ್ತಿ, ಶಿಸ್ತು, ಒಗ್ಗಟ್ಟು ಸಾರಿದ ಸವದತ್ತಿ ಜಾತ್ರೆ

ಐತಿಹಾಸಿಕ ಗ್ರಾಮದೇವಿ ಜಾತ್ರಾ ಮಹೋತ್ಸವ ಭಕ್ತಿ, ಶಿಸ್ತು ಹಾಗೂ ಒಗ್ಗಟ್ಟಿನ ಸಂದೇಶ ಸಮಾಜಕ್ಕೆ ಸಾರುತ್ತಿದೆ ಎಂದು ನಿವೃತ್ತ ಪೊಲೀಸ್ ಮಹಾನಿರ್ದೇಶಕ ಶಂಕರ ಬಿದರಿ ಹೇಳಿದರು.

ನಗರದ ಐತಿಹಾಸಿಕ ಗ್ರಾಮದೇವಿ ಜಾತ್ರಾ ಮಹೋತ್ಸವದ ಏಳನೇ ದಿನ ಭಾನುವಾರ ನಡೆದ ಧಾರ್ಮಿಕ ಸಭೆ ಹಾಗೂ ಸಾಂಸ್ಕೃತಿಕ ಸಮಾರಂಭದಲ್ಲಿ ಮಾತನಾಡಿ, ಓಣಿಗೊಂದು ಆಚರಣೆ, ಊರಿಗೊಂದು ಸಂಪ್ರದಾಯ ಎಂಬಂತೆ ಎಲ್ಲ ಧರ್ಮ, ಜಾತಿ, ಮತ-ಪಂಥಗಳ ಜನರು ಒಂದಾಗಿ ಗ್ರಾಮದೇವಿಯರ ಆರಾಧನೆ ಮಾಡುತ್ತಿರುವುದು ವಿಶೇಷವಾಗಿದೆ. ಇಂತಹ ಜಾತ್ರೆಗಳು ನಮ್ಮ ಸಂಸ್ಕೃತಿ, ಪರಂಪರೆ ಹಾಗೂ ಸಹೋದರತ್ವವನ್ನು ಮುಂದಿನ ಪೀಳಿಗೆಗೆ ಪರಿಚಯಿಸುವ ಮಹತ್ವದ ಕಾರ್ಯ ಮಾಡುತ್ತಿವೆ ಎಂದರು.

ಉಪ್ಪಿನಬೆಟಗೇರಿಯ ಹೊಸಮಠದ ಶಾಂತವೀರ ಸ್ವಾಮೀಜಿ, ಸುಖದೇವಾನಂದ ಆಶ್ರಮದ ಸಿದ್ಧಲಿಂಗ ಸ್ವಾಮೀಜಿ, ಮೂಲಿಮಠದ ಮಲ್ಲಿಕಾರ್ಜುನ ಸ್ವಾಮೀಜಿ, ಬಿದರಿ ಕಲ್ಮರದ ಬಸವಲಿಂಗದೇವರು, ಗವಿಮಠದ ಚಿದಾನಂದ ಸ್ವಾಮೀಜಿ, ಸಂಗಮೇಶ ಸ್ವಾಮಿಜಿ, ವೀರಭದ್ರ ಶಾಸಿ ಹಾಗೂ ಬಸಯ್ಯ ಅಜ್ಜನವರು ಆಶೀರ್ವಚನ ನೀಡಿದರು.

ಜಾತ್ರೆ ಯಶಸ್ಸಿಗೆ ಶ್ರಮಿಸಿದ ಪುರಸಭೆ ಕಾರ್ಮಿಕರು, ಅಧಿಕಾರಿಗಳು ಹಾಗೂ ದಾನಿಗಳನ್ನು ವಿರೂಪಾಕ್ಷ ಮಾಮನಿ ಹಾಗೂ ವಿಶ್ವಾಸ ವೈದ್ಯ ಸನ್ಮಾನಿಸಿದರು. ಮಧ್ಯಾಹ್ನ ನಡೆದ ರಾಗ ಸಂಜೀವಿನಿ ತಂಡದ ಭಕ್ತಿ ಹಾಗೂ ಸುಗಮ ಸಂಗೀತ ಕಾರ್ಯಕ್ರಮ ಜನರ ಮೆಚ್ಚುಗೆಗೆ ಪಾತ್ರವಾಯಿತು. ರಾತ್ರಿ ನಡೆದ ಗಂಗಾವತಿ ಪ್ರಾಣೇಶ್ ಹಾಗೂ ತಂಡದ ಹಾಸ್ಯ ರಸಾಯನ ಕಾರ್ಯಕ್ರಮದಲ್ಲಿ ಪ್ರೇಕ್ಷಕರು ನಗೆಯಲ್ಲಿ ತೇಲಿದರು.

ವಿಧಾನ ಪರಿಷತ್ ಸದಸ್ಯ ಹಣಮಂತ ನಿರಾಣಿ, ಬಿಡಿಸಿಸಿ ಬ್ಯಾಂಕ್ ನಿರ್ದೇಶಕ ಮಲ್ಲಣ್ಣ ಯಾದವಾಡ, ಮಾಜಿ ಶಾಸಕ ವಿಶ್ವನಾಥ ಪಾಟೀಲ, ಅಶೋಕ ಮುರಗೋಡ, ಮಂಜುನಾಥ ಪಾಚಂಗಿ, ಗಂಗಾವತಿ ಪ್ರಾಣೇಶ, ಬಸವರಾಜ ಮಹಾಮನಿ, ನರಸಿಂಹ ಜೋಶಿ ಇತರರಿದ್ದರು.

ಗ್ರಾಮದೇವಿ ಜಾತ್ರಾ ಮಹೋತ್ಸವದ ಎಂಟನೇ ದಿನ ಸೋಮವಾರ ನಗರದಲ್ಲಿ ಭಕ್ತಿ, ಧಾರ್ಮಿಕ ವಿಧಿವಿಧಾನಗಳು ಹಾಗೂ ಉಡಿ ತುಂಬುವ ಕಾರ್ಯಕ್ರಮಗಳು ಭಕ್ತಿಭಾವದಿಂದ ನೆರವೇರಿದವು. ವೈಶಾಖ ಕೃಷ್ಣ ನವಮಿ ಅಂಗವಾಗಿ ಬೆಳಗ್ಗೆ 4 ಗಂಟೆಯಿಂದ ದೇವಿಕಟ್ಟೆಯಲ್ಲಿ ಮಹಾಗಣಪತಿ ಪೂಜೆ ಹಾಗೂ ಸ್ಕಂದಮಾತಾ ದೇವಿ, ಕಾತ್ಯಾಯನಿ ದೇವಿ ಹೋಮಗಳು ವೈದಿಕ ಮಂತ್ರೋಚ್ಚಾರಗಳೊಂದಿಗೆ ಜರುಗಿದವು. ಭಕ್ತರ ಜೀವನದಲ್ಲಿ ಸುಖ, ಶಾಂತಿ, ಆರೋಗ್ಯ ಹಾಗೂ ಸಮೃದ್ಧಿ ವೃದ್ಧಿಯಾಗಲೆಂಬ ಉದ್ದೇಶದಿಂದ ವಿಶೇಷ ಪೂಜೆ ನೆರವೇರಿದವು. ಬೆಳಗ್ಗೆ 8 ಗಂಟೆಯಿಂದ ನಗರದ ವಿವಿಧ ಓಣಿಗಳ ಭಕ್ತರು ವಾದ್ಯಮೇಳಗಳೊಂದಿಗೆ ದೇವಿಕಟ್ಟೆಗೆ ಆಗಮಿಸಿ ದೇವಿಗೆ ಉಡಿ ತುಂಬಿದರು. ಶಾಂತಿನಗರ, ವಾಟರ್ ಸಪ್ಲೈ ಭಾಗ, ಬಸವಸದನ, ಬೈಪಾಸ್ ರಸ್ತೆ, ಕೊಳ್ಳಾರ ಓಣಿ, ಮೇದಾರ ಓಣಿ, ಕಂಬಾರ ಓಣಿ, ಸಮಗಾರ ಓಣಿ, ಆನಿ ಆಗಸಿ, ಅಲಾರಕಿ ಓಣಿ, ಚಿನಿವಾಲರ ಓಣಿ, ದಾಸರ ಓಣಿ, ಅಂಬೇಡ್ಕರ ನಗರ, ಮಾದರ ಓಣಿ, ವಕ್ಕುಂದದೇವರ ಓಣಿ, ಮೊಕಾಶಿ ಓಣಿ ಹಾಗೂ ಬಂಡಿ ಓಣಿಗಳ ಭಕ್ತರು ಸರತಿ ಸಾಲಿನಲ್ಲಿ ನಿಂತು ದೇವಿಯ ದರ್ಶನ ಪಡೆದು ಭಕ್ತಿಭಾವ ಮೆರೆದರು.

ಮೇ 12ರಂದು ಬೆಳಗ್ಗೆ 7ರಿಂದ ಮಧ್ಯಾಹ್ನ 3ಗಂಟೆಯವರೆಗೆ ಗುರ್ಲಹೊಸೂರ ಸೇರಿದಂತೆ ಪರ ಊರಿನವರು ಹಾಗೂ ಪರ ಓಣಿಯ ಸಾರ್ವಜನಿಕರಿಗೆ ಮಾತ್ರ ದೇವಿಯರಿಗೆ ಉಡಿ ತುಂಬಲು ಅವಕಾಶ ಕಲ್ಪಿಸಲಾಗಿದೆ. ಮಧ್ಯಾಹ್ನ 3 ಗಂಟೆಯ ಬಳಿಕ ಶಿಮೊಂಗೊಲಂಗನೆ ಕಾರ್ಯಕ್ರಮ ನಡೆಯಲಿದೆ ಎಂದು ಜಾತ್ರಾ ಸಮಿತಿ ತಿಳಿಸಿದೆ.