ಸಮಾಜ ಒಂದುಗೂಡಿಸುವ ಧರ್ಮ

ಶಮನೇವಾಡಿ ಗ್ರಾಮದ ಸಮೀಪದ ನೇಜ ಕ್ರಾಸ್ ಬಳಿ ಮಂಗಳವಾರ ಎಜಿಎಂ ಇಂಜಿನಿಯರಿಂಗ್ ಕಾಲೇಜು ಉದ್ಘಾಟನೆ ಹಾಗೂ 151 ಅಡಿ ಎತ್ತರದ ಪಾರ್ಶ್ವನಾಥ ಬೃಹತ್ ವಿಗ್ರಹ ನಿರ್ಮಾಣದ ಶಂಕುಸ್ಥಾಪನಾ ಸಮಾರಂಭದಲ್ಲಿ ಮಾತನಾಡಿ, ಸಮಾಜವನ್ನು ಒಂದುಗೂಡಿಸುವಲ್ಲಿ ಧರ್ಮ ಪ್ರಮುಖ ಪಾತ್ರ ವಹಿಸುತ್ತದೆ.

ಇದು ಜನರಲ್ಲಿ ಒಗ್ಗಟ್ಟು ಮತ್ತು ಏಕತೆ ಮೂಡಿಸುತ್ತದೆ. ಈ ನಿಟ್ಟಿನಲ್ಲಿ ಜಾಗತಿಕ ಶಾಂತಿ ಹಾಗೂ ಮಾನವ ಕಲ್ಯಾಣಕ್ಕಾಗಿ ಅವಿರತವಾಗಿ ಶ್ರಮಿಸುತ್ತಿರುವ ರಾಷ್ಟ್ರ ಸಂತ ಆಚಾರ್ಯ ಶ್ರೀ 108 ಗುಣಧರನಂದಿ ಮಹಾರಾಜರ ಸತ್ಕಾರ್ಯಗಳಿಗೆ ಎಲ್ಲರೂ ಕೈಜೋಡಿಸಬೇಕು ಎಂದರು.

ಜೈನ ತೀರ್ಥಂಕರರ ಕೊಡುಗೆ ಸ್ಮರಿಸಿದ ಅವರು, ಜೈನ ಧರ್ಮದ ತೀರ್ಥಂಕರರು ಅಹಿಂಸೆಯ ಸಾಕಾರ ಮೂರ್ತಿಗಳಾಗಿದ್ದರು. ತ್ಯಾಗ, ತಪಸ್ಸು, ಸಂಯಮ, ಕರುಣೆ ಹಾಗೂ ಭಕ್ತಿಯೇ ಅವರ ಜೀವನದ ಜೀವಾಳವಾಗಿತ್ತು. ‘ಬದುಕು ಮತ್ತು ಬದುಕಲು ಬಿಡು’ ಎಂಬ ಅವರ ಸಾರ್ವಕಾಲಿಕ ಸಂದೇಶ ಇಂದಿಗೂ ಪ್ರಸ್ತುತ ಎಂದರು.

ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಬಿ.ಎಲ್.ಸಂತೋಷ ಮಾತನಾಡಿ, ಗುಣಧರನಂದಿ ಮಹಾರಾಜರು ಗ್ರಾಮೀಣ ಪರಿಸರದಲ್ಲಿ ಏಕಶಿಲಾ ಮೂರ್ತಿ ಪ್ರತಿಷ್ಠಾಪಿಸುತ್ತಿರುವುದು ಐತಿಹಾಸಿಕ ಕಾರ್ಯ. ಅಧ್ಯಾತ್ಮದೊಂದಿಗೆ ಲೋಕ ಕಲ್ಯಾಣದ ಚಿಂತನೆ ನಡೆದಾಗ ಮಾತ್ರ ಭಾರತೀಯ ಸಂಸ್ಕೃತಿ ವಿಕಸನಗೊಳ್ಳಲು ಸಾಧ್ಯ. ಶೈಕ್ಷಣಿಕ ಸಂಸ್ಥೆಗಳು ಕೇವಲ ಅಕ್ಷರ ಜ್ಞಾನಕ್ಕೆ ಸೀಮಿತವಾಗದೆ, ನೈತಿಕತೆ ಮತ್ತು ದೇಶಭಕ್ತಿ ಬಿತ್ತುವ ಕೇಂದ್ರಗಳಾಗಬೇಕು ಎಂದು ಹೇಳಿದರು.

ಆಚಾರ್ಯ ಶ್ರೀ 108 ಗುಣಧರನಂದಿ ಮಹಾರಾಜ ಮಾತನಾಡಿ, ನಾನು ಜನಿಸಿದ ಈ ಮಣ್ಣು ಪುಣ್ಯಭೂಮಿಯಲ್ಲಿ ಎಲ್ಲ ಧರ್ಮದ ಜನರು ನನ್ನನ್ನು ಪ್ರೀತಿಯಿಂದ ಸಲುಹಿದ್ದಾರೆ. ಈ ಭಾಗದ ಜನರ ಋಣ ತೀರಿಸಲು ಹಾಗೂ ಗ್ರಾಮೀಣ ಭಾಗದ ಯುವಜನರಿಗೆ ಉನ್ನತ ಶಿಕ್ಷಣ ಒದಗಿಸಲು ಕಾಲೇಜು ಸ್ಥಾಪಿಸಲಾಗಿದೆ.

ತಮಿಳುನಾಡಿನಲ್ಲಿ ಕೆತ್ತನೆಯಾಗುತ್ತಿರುವ ಜಗತ್ತಿನ ಅತಿ ಎತ್ತರದ ಪಾರ್ಶ್ವನಾಥರ ಮೂರ್ತಿ ಭಾರತೀಯ ಆಧ್ಯಾತ್ಮಿಕ ಕ್ಷೇತ್ರಕ್ಕೆ ಹೆಮ್ಮೆ ಕೊಡುಗೆಯಾಗಲಿದೆ. ಈ ಸಂಸ್ಥೆಯಲ್ಲಿ ತಂದೆ-ತಾಯಿ ಇಲ್ಲದ ಅನಾಥ ಮಕ್ಕಳಿಗೆ ಸಂಪೂರ್ಣ ಉಚಿತ ಶಿಕ್ಷಣ ನೀಡಲಾಗುವುದು ಎಂದು ಘೋಷಿಸಿದರು.

ಸ್ವಸ್ತಿಶ್ರೀ ಭಟ್ಟಾರಕ ಭಟ್ಟಾಚಾರ್ಯ ಸ್ವಾಮೀಜಿ, ಶಾಸಕರಾದ ಅಭಯ ಪಾಟೀಲ, ದುರ್ಯೋಧನ ಐಹೊಳೆ, ಶಶಿಕಲಾ ಜೊಲ್ಲೆ, ವಿಧಾನ ಪರಿಷತ್ ಸದಸ್ಯ ಪ್ರಕಾಶ ಹುಕ್ಕೇರಿ, ಮಾಜಿ ಸಂಸದ ಅಣ್ಣಾಸಾಹೇಬ ಜೊಲ್ಲೆ, ಅನಿಲ ಬೆನಕೆ, ಪಿ.ರಾಜೀವ, ಮಹೇಶ ಕುಮಠಳ್ಳಿ, ಸಂಜಯ ಪಾಟೀಲ, ಮಾಜಿ ಎಂಎಲ್‌ಸಿ ಮಹಾಂತೇಶ ಕವಟಗಿಮಠ, ಉದ್ಯಮಿ ಪ್ರಸನ್ನ ಹಜಾರೆ, ಭರತೇಶ ಬನವಣೆ ಇತರರಿದ್ದರು.