ನ್ಯೂ ಗೂಡ್ಸ್‌ಶೆಡ್ ರಸ್ತೆಗೆ ಬೇಕಿದೆ ಕಾಯಕಲ್ಪ!

ಸ್ಥಳೀಯರು ಮುಂಚಿತವಾಗಿಯೇ ಮಹಾನಗರ ಪಾಲಿಕೆ ಆಯುಕ್ತರಿಗೆ ಮನವಿ ಸಲ್ಲಿಸಿದರೂ ಪ್ರಯೋಜನವಾಗಿಲ್ಲ. ಈಗ ಇಡೀ ರಸ್ತೆ ಅಪಾಯಕಾರಿಯಾಗಿದ್ದು, ಬೈಕ್ ಸವಾರರು ಬಿದ್ದು ಎದ್ದು ಓಡಾಡುತ್ತಿದ್ದಾರೆ. ಇಲ್ಲಿನ ಮನೆ- ಅಂಗಡಿಗಳಿಗೆ ವಾಹನಗಳ ಓಡಾಟದಿಂದ ಗುಂಡಿಯೊಳಗಿನ ಕೆಸರು ಸಿಡಿಯುತ್ತಿದ್ದು, ಬಾಗಿಲು ಹಾಕಿಕೊಂಡೇ ಕುಳಿತುಕೊಳ್ಳುವ ದುಸ್ಥಿತಿ ಬಂದಿದೆ. ಈ ರಸ್ತೆಯಲ್ಲಿ ಎಲ್ ಆ್ಯಂಡ್ ಟಿ ಕಂಪನಿಯು ಕಾಮಗಾರಿ ನಡೆಸಿದ ನಂತರ ರಸ್ತೆ ಹದಗೆಟ್ಟು ಹೋಗಿದೆ. ಹಿರಿಯ ನಾಗರಿಕರು ಮತ್ತು ಮಹಿಳೆಯರು ಸಣ್ಣಪುಟ್ಟ ಅಪಘಾತಗಳಿಗೀಡಾಗಿ ಗಾಯಗೊಂಡಿದ್ದಾರೆ.

ಒಂದೆಡೆ ಮಾತ್ರ ಸುಧಾರಣೆ: ಆರ್‌ಎಸ್‌ಎಸ್ ಅಖಿಲ ಭಾರತೀಯ ಪ್ರಾಂತ ಪ್ರಚಾರಕರ ಸಭೆ ಹಿನ್ನೆಲೆಯಲ್ಲಿ ಸದ್ಯ ನ್ಯೂ ಗೂಡ್ಸ್ ಶೆಡ್ ರಸ್ತೆ ಗಣ್ಯರು ಓಡಾಡುವ ಪ್ರಮುಖ ಮಾರ್ಗವಾಗಿದೆ. ಇಂತಹ ಸಮಯದಲ್ಲೂ ರಸ್ತೆ ಗುಂಡಿ ಮುಚ್ಚುವ ಕೆಲಸವಾಗಿಲ್ಲ. ಸಂಘದ ಕಚೇರಿಗೆ ಬರುವ ಗಣ್ಯರನ್ನು ಎಸ್‌ಪಿಎಂ ರಸ್ತೆ ಮೂಲಕ ಕರೆದುಕೊಂಡು ಬರುವ ಯೋಜನೆ ರೂಪಿಸಿದ್ದಾರೆ. ಇದಕ್ಕಾಗಿ ರೇಣುಕಾ ಹೋಟೆಲ್‌ನಿಂದ ಸಂಘದ ಕಚೇರಿವರೆಗಿನ ಕ್ರಾಸ್‌ವರೆಗೆ ಎರಡೂ ಬದಿಯ ಫುಟ್‌ಪಾತ್‌ಗೆ ಪೇವರ್ಸ್‌ ಹಾಕಿ ಅಂದಗೊಳಿಸಲಾಗಿದೆ. ಆದರೆ ಗೂಡ್ಸ್ ಶೆಟ್ ರಸ್ತೆಯನ್ನು ಗಡೆಗಣಿಸಲಾಗಿದೆ ಎಂಬ ಆರೋಪ ಕೇಳಿ ಬಂದಿದೆ.