ನಗರದಲ್ಲಿ ಭಾನುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಸಂಸ್ಥೆಗೆ ಸಂಬಂಧಿಸಿದ ಖಾತೆಗಳ ಡೆಬಿಟ್ ಪ್ರಿಜ್ ಮಾಡಿಸಿದ್ದೇವೆ. ನಮ್ಮ ಫಾರೆನ್ಸಿಕ್ ಅಡಿಟ್ ತಂಡ 20 ಸಾವಿರ ಠೇವಣಿದಾರರ ದಾಖಲಾತಿ ಪರಿಶೀಲಿಸಿದ್ದಾರೆ. ಇದರಲ್ಲಿ ಮಹಾರಾಷ್ಟ್ರ ರಾಜ್ಯದವರೇ ಹೆಚ್ಚಿದ್ದಾರೆ. ಹೀಗಾಗಿ, ತನಿಖೆಗೆ ಮಹಾರಾಷ್ಟ್ರ ಸರ್ಕಾರ, ಅಲ್ಲಿನ ಪೊಲೀಸ್ ಇಲಾಖೆ ಸಹಕಾರ ಕೋರಿದ್ದೇವೆ ಎಂದರು. ಕೆಲವರು ಸಂಸ್ಥೆ ಪರವಾಗಿ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋಗಳನ್ನು ಹಾಕುತ್ತಿದ್ದಾರೆ. ಈಗಾಗಲೇ ಹಣ ಹಾಕಿದವರು, ಈಗಲೂ ಹೊಸಬರಿಂದ ಹಣ ಹೂಡಿಕೆ ಮಾಡಿಸುತ್ತಿದ್ದಾರೆ. ಹೆಚ್ಚು ಲಾಭಾಂಶ ಪಡೆದಿರುವುದಾಗಿ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಹಾಕಿದವರಿಗೂ ನೋಟಿಸ್ ನೀಡಿ ಮಾಹಿತಿ ಪಡೆಯುತ್ತೇವೆ. ಆರಂಭದಲ್ಲಿ ಅತಿ ಹೆಚ್ಚಿನ ಲಾಭಾಂಶ ಪಡೆದವರನ್ನೂ ವಿಚಾರಿಸಿ, ಹೆಚ್ಚುವರಿ ಹಣ ವಾಪಸ್ಸು ಪಡೆಯುತ್ತೇವೆ. ನೀಲಣ್ಣವರ ಹೊಸದಾಗಿ ಠೇವಣಿ ಮಾಡುವವರ ಹಣವನ್ನೇ ಹಳಬರಿಗೆ ಲಾಭಾಂಶವಾಗಿ ನೀಡುತ್ತಿದ್ದ. ಹೊಸ ಹಣ ಬರುತ್ತ ಹೋದಂತೆ ಆತನಿಗೆ ಯಾವುದೇ ಸಮಸ್ಯೆಯಾಗಿರಲಿಲ್ಲ. ಆದರೆ, ಈಚೆಗೆ ಸುಮಾರು ಹತ್ತು ಸಾವಿರ ಠೇವಣಿದಾರರಿಗೆ ಸಮಸ್ಯೆಯಾಗಿತ್ತು ಎಂದು ತನಿಖೆಯಲ್ಲಿ ಗೊತ್ತಾಗಿದೆ ಎಂದರು.
