ಲೋಕೋಳಿ ಗ್ರಾಪಂನಲ್ಲಿ ಕೇಂದ್ರ ತಂಡದಿಂದ ಪರಿಶೀಲನೆ

ಕೇಂದ್ರ ತಂಡದ ಸದಸ್ಯರಾದ ಸಂಜುಲಿ ಗುಪ್ತಾ ಹಾಗೂ ಸತೀಶ ಬರ್ಜಾಚಾರ್ಯ ಅವರು ಗ್ರಾಪಂ ವ್ಯಾಪ್ತಿಯಲ್ಲಿ ಯೋಜನೆಯಡಿ ಕೈಗೊಂಡಿರುವ ಸ್ಟ್ಯಾಗರ್ಡ್ ಕಾಂಟೂರ್ ಟ್ರೆಂಚ್ ಕಾಮಗಾರಿ ಸ್ಥಳಕ್ಕೆ ತೆರಳಿ ಕಾಮಗಾರಿಯ ಪ್ರಗತಿ ಹಾಗೂ ಗುಣಮಟ್ಟ ವೀಕ್ಷಿಸಿದರು. ಕಾಮಗಾರಿ ನಿರ್ವಹಿಸುತ್ತಿದ್ದ ಕಾರ್ಮಿಕರೊಂದಿಗೆ ಮಾತುಕತೆ ನಡೆಸಿ, ಕೆಲಸ ಪಡೆಯುತ್ತಿರುವ ವಿಧಾನ, ಜಾಬ್ ಕಾರ್ಡ್ ಬಳಕೆ, ಹಾಜರಾತಿ ಮತ್ತು ಕೂಲಿ ಪಾವತಿ ಕುರಿತು ಮಾಹಿತಿ ಪಡೆದರು.

ಆಧಾರ್ ಆಧಾರಿತ ಕೂಲಿ ಪಾವತಿ ವ್ಯವಸ್ಥೆಯಲ್ಲಿ ಎದುರಾಗುತ್ತಿರುವ ತಾಂತ್ರಿಕ ತೊಂದರೆ, ಪಾವತಿ ವಿಳಂಬ ಹಾಗೂ ತಿರಸ್ಕೃತ ಪಾವತಿಗಳ ಬಗ್ಗೆ ಕಾರ್ಮಿಕರಿಂದಲೇ ಮಾಹಿತಿ ಪಡೆದುಕೊಂಡ ತಂಡ, ಯೋಜನೆಯಡಿ ಅವರಿಗೆ ದೊರೆಯುತ್ತಿರುವ ಸೌಲಭ್ಯಗಳ ಬಗ್ಗೆಯೂ ವಿಚಾರಿಸಿತು.

ನಂತರ ಗ್ರಾಪಂ ಸಭಾಂಗಣದಲ್ಲಿ ಅಧಿಕಾರಿಗಳು ಹಾಗೂ ಸಿಬ್ಬಂದಿಯೊಂದಿಗೆ ಸಭೆ ನಡೆಸಿದ ತಂಡ, ಯೋಜನೆಯಡಿ ಕೈಗೊಳ್ಳುವ ಕಾಮಗಾರಿಗಳ ಆಯ್ಕೆ, ಅಂದಾಜು ತಯಾರಿ, ತಾಂತ್ರಿಕ ಅನುಮೋದನೆ, ಸ್ಥಳ ಪರಿಶೀಲನೆ, ಮಾಪನ, ಮಸ್ಟರ್‌ರೋಲ್ ನಿರ್ವಹಣೆ ಮತ್ತು ಕೂಲಿ ಪಾವತಿ ಪ್ರಕ್ರಿಯೆ ಕುರಿತು ಚರ್ಚಿಸಿತು. ಅನುಷ್ಠಾನದ ಸಂದರ್ಭದಲ್ಲಿ ತಾಂತ್ರಿಕ ಹಂತದಲ್ಲಿ ಎದುರಾಗುತ್ತಿರುವ ಸಮಸ್ಯೆಗಳು ಹಾಗೂ ಅವುಗಳ ಪರಿಹಾರದ ಕುರಿತು ಮಾಹಿತಿ ಪಡೆದುಕೊಂಡಿತು.

ಯೋಜನೆಯ ಅನುಷ್ಠಾನವು ದಾಖಲೆಗಳಲ್ಲಿ ಮಾತ್ರವಲ್ಲದೆ, ಕ್ಷೇತ್ರಮಟ್ಟದಲ್ಲಿ ಹೇಗೆ ನಡೆಯುತ್ತಿದೆ ಎಂಬುದನ್ನು ಖಚಿತಪಡಿಸಿಕೊಳ್ಳುವ ಉದ್ದೇಶದಿಂದ ಕೇಂದ್ರ ತಂಡವು ಕಾಮಗಾರಿ ಸ್ಥಳ, ಗ್ರಾಪಂ ಕಚೇರಿ ಹಾಗೂ ಕಾರ್ಮಿಕರೊಂದಿಗೆ ನೇರ ಸಂವಾದ ನಡೆಸಿತು.

ಖಾನಾಪುರ ತಾಪಂ ಇಒ ರಮೇಶ ಮೇತ್ರಿ, ಸಹಾಯಕ ನಿರ್ದೇಶಕ (ಗ್ರಾ.ಉ) ಶಶಿಧರ ಬಳ್ಳಾರಿ, ತಾಂತ್ರಿಕ ಸಂಯೋಜಕ ಬಸವರಾಜ ಹೊಸಮನಿ, ಸಂಯೋಜಕ ಪ್ರಮೋದ ಗೋಡೆಕರ, ಆಡಳಿತ ಸಹಾಯಕ ಗಣೇಶ ಅಲಾಬಾದಿ, ಪಿಡಿಒ ವಿಜಯಲಕ್ಷ್ಮಿ ತೆಗ್ಗಿ ಸೇರಿದಂತೆ ಅಧಿಕಾರಿಗಳು ಹಾಗೂ ಸಿಬ್ಬಂದಿ ಉಪಸ್ಥಿತರಿದ್ದರು.