ಮತ್ತಿಕೊಪ್ಪದ ಕೆಎಲ್ಇ ಕೃಷಿ ವಿಜ್ಞಾನ ಕೇಂದ್ರದಿಂದ ರೈತ ನಾಗರಾಜ ತಲ್ಲೂರ ಹಾಗೂ ಸಹೋದರರಿಗೆ ನೀಡಲಾದ ಡ್ರೋನ್ ಹಸ್ತಾಂತರ ಸಂದರ್ಭದಲ್ಲಿ ಡಾ. ಮಂಜುನಾಥ ಚೌರಡ್ಡಿ, ಡಾ.ಪಿ.ಎಸ್.ಹೂಗಾರ, ಪ್ರವಿಣ ಯಡಹಳ್ಳಿ, ಎಸ್.ಎಂ.ವಾರದ, ಡಾ.ಗುರುರಾಜ ಕೌಜಲಗಿ, ಶಂಕರಗೌಡ ಪಾಟೀಲ, ಮಂಜುನಾಥ ಪಿ.ಐ., ಬಸವರಾಜ ಅಮ್ಮಿನಬಾವಿ, ವೀಣಾ ಬನ್ನೂರ ಇತರರಿದ್ದರು.
ಬೆಳಗಾವಿ: ಕೆಎಲ್ಇ ಕೃಷಿ ವಿಜ್ಞಾನ ಕೇಂದ್ರದಿಂದ ಉದ್ಯಮಶೀಲತಾ ಅಭಿವೃದ್ಧಿಗೆ ಚಾಲನೆ ನೀಡುವ ನಿಟ್ಟಿನಲ್ಲಿ ರೈತರಿಗೆ ಡ್ರೋನ್ ಮೂಲಕ ಕೃಷಿ ರಾಸಾಯನಿಕಗಳು ಹಾಗೂ ಕೀಟನಾಶಕಗಳನ್ನು ಸಿಂಪಡಣೆ ಮಾಡಲು ಅನುಕೂಲವಾಗುವಂತೆ ಯುವಕರನ್ನು ಪ್ರೋತ್ಸಾಹಿಸುತ್ತಿದ್ದು, ಈ ನಿಟ್ಟಿನಲ್ಲಿ ಮತ್ತಿಕೊಪ್ಪದಲ್ಲಿನ ಕೆಎಲ್ಇ ಕೃಷಿ ವಿಜ್ಞಾನ ಕೇಂದ್ರ(ಕೆವಿಕೆ)ದ ವಿಜ್ಞಾನಿಗಳು ಮಲ್ಲಾಪುರ ಗ್ರಾಮದ ನಾಗರಾಜ ತಲ್ಲೂರ ಹಾಗೂ ಸಹೋದರರಿಗೆ ಸೆಲ್ಕೋ ಕಂಪನಿಯ ಸಹಯೋಗದೊಂದಿಗೆ ಡ್ರೋನ್ ಮಷಿನ್ ಒದಗಿಸಿದ್ದಾರೆ.
ಈಗಾಗಲೇ ರೈತ ನಾಗರಾಜ ಕೆವಿಕೆಯಿಂದ ಡ್ರೋನ್ ಪೈಲೆಟ್ ತರಬೇತಿ ಪೂರ್ಣಗೊಳಿಸಿದ್ದಾರೆ. ಇಂತಹ ರೈತರ ಸೇವೆಯಲ್ಲಿ ಕೆವಿಕೆ ಮೂಲಕ ನೀಡಲಾದ ಮೂರನೆಯ ಡ್ರೋನ್ ಇದಾಗಿದೆ.
ಡ್ರೋನ್ ಹಸ್ತಾಂತರ ವೇಳೆ ಸಂಸ್ಥೆ ಮುಖ್ಯಸ್ಥ ಡಾ. ಮಂಜುನಾಥ ಚೌರಡ್ಡಿ ಮಾತನಾಡಿ, ಸಂದಿಗ್ಧ ಕೃಷಿ ಪರಿಸ್ಥಿತಿಗಳಲ್ಲಿ ಕೃಷಿ ಪರಿಕರಗಳನ್ನು ಸಿಂಪಡಣೆ ಮಾಡಲು ಡ್ರೋನ್ ಸಹಕಾರಿಯಾಗಿದ್ದು, ಸದ್ಬಳಕೆ ಮಾಡಿಕೊಳ್ಳಬೇಕು ಎಂದರು.
ಮುಂದಿನ ದಿನಗಳಲ್ಲಿ ಕೃಷಿ ವ್ಯವಸ್ಥೆಯಲ್ಲಿ ಡ್ರೋನ್ ಸದ್ಬಳಕೆ ಕುರಿತು ರೈತರಲ್ಲಿ ಅರಿವು ಮೂಡಿಸುವ ಹಾಗೂ ಯುವಕರಲ್ಲಿ ಉದ್ಯಮಶೀಲತಾ ಮನೋಭಾವ ತುಂಬಲು ಇನ್ನಷ್ಟು ಕಾರ್ಯಕ್ರಮಗಳನ್ನು ಕೇಂದ್ರದಿಂದ ಹಮ್ಮಿಕೊಳ್ಳಲಾಗುವುದು ಎಂದರು.
ಹೊಸದಾಗಿ ಸ್ವೀಕರಿಸಲಾದ ಡ್ರೋನ್ ಮಷಿನ್ ಕುರಿತು ನಾಗರಾಜ ತಲ್ಲೂರ ಹಾಗೂ ಕೇಂದ್ರದ ಡ್ರೋನ್ ವಿಜ್ಞಾನಿ ಪ್ರವಿಣ ಯಡಹಳ್ಳಿ ವಿವರಿಸಿದರು.
ಕೆಎಲ್ಇ ಕೃಷಿ ಮಹಾವಿದ್ಯಾಲಯದ ಡೀನ್ ಡಾ.ಪಿ.ಎಸ್.ಹೂಗಾರ, ಕೇಂದ್ರದ ವಿಜ್ಞಾನಿಗಳಾದ ಎಸ್.ಎಂ.ವಾರದ, ಡಾ.ಗುರುರಾಜ ಕೌಜಲಗಿ, ಶಂಕರಗೌಡ ಪಾಟೀಲ, ಮಂಜುನಾಥ ಪಿ.ಐ., ಬಸವರಾಜ ಅಮ್ಮಿನಬಾವಿ, ವೀಣಾ ಬನ್ನೂರ ಇದ್ದರು.
