ಜಿ+3 ಮಾದರಿ ಮನೆಗಳ ನಿರ್ಮಾಣಕ್ಕೆ ಡಿಮ್ಯಾಂಡ್!

ಹೌದು. ಬೆಳಗಾವಿ ಮಹಾನಗರ ಪಾಲಿಕೆ, ಗೋಕಾಕ, ನಿಪ್ಪಾಣಿ, ಬೈಲಹೊಂಗಲ, ಸವದತ್ತಿ ನಗರಸಭೆ ಸೇರಿ ಪುರಸಭೆ, ಪಟ್ಟಣ ಪಂಚಾಯತಿ ವ್ಯಾಪ್ತಿಯಲ್ಲಿ ಅಧಿಕ ಸಂಖ್ಯೆಯಲ್ಲಿರುವ ಬಡವರು ದಶಕದಿಂದ ಸೂರಿಗಾಗಿ ಅಲೆದಾಡುತ್ತಿದ್ದಾರೆ. ಆದರೆ, ನಿವೇಶನ ಅಲಭ್ಯತೆ, ದಾಖಲೆ, ತಾಂತ್ರಿಕ ಸಮಸ್ಯೆದಿಂದಾಗಿ ಮನೆ ಕಟ್ಟಿಕೊಳ್ಳಲು ಸಾಧ್ಯವಾಗದೆ ಬಾಡಿಗೆ ಮನೆ ಇಲ್ಲವೇ ಚಿಕ್ಕ ಗೂಡಿಸಿನಲ್ಲಿಯೇ ಬದುಕು ಕಳೆಯುತ್ತಿದ್ದಾರೆ. ಈ ವಸತಿ ಸಮಸ್ಯೆಗೆ ಶಾಶ್ವತ ಪರಿಹಾರ ಕಲ್ಪಿಸಲು ಜಿ+3 ಮಾದರಿ ಮನೆ ಮಾಡುತ್ತಿದೆ. ಆದರೆ, ಸರ್ಕಾರದ ವಿಳಂಬ ನೀತಿಯಿಂದಾಗಿ ಯೋಜನೆ ನಿಗದಿ ಸಮಯದಲ್ಲಿ ಪೂರ್ಣಗೊಳ್ಳುತ್ತಿಲ್ಲ.

ಈಗಾಗಲೇ ಬೆಳಗಾವಿ ಮಹಾನಗರ ಪಾಲಿಕೆ- 1484 ಮತ್ತು ನಿಪ್ಪಾಣಿ ನಗರಸಭೆ -1812 ಜಿ+3 ಮಾದರಿ ಮನೆ ನಿರ್ಮಾಣ ಪ್ರಗತಿ ಹಂತದಲ್ಲಿವೆ. ಇದೇ ಮಾದರಿಯಲ್ಲಿ ಗೋಕಾಕ, ಬೈಲಹೊಂಗಲ, ಅಥಣಿ, ಚಿಕ್ಕೋಡಿ, ರಾಮದುರ್ಗ, ಸವದತ್ತಿ ಸೇರಿ ವಿವಿಧ ನಗರ ಸ್ಥಳೀಯ ಸಂಸ್ಥೆಗಳಲ್ಲಿ ಜಿ+3 ಮನೆ ನಿರ್ಮಾಣ ಯೋಜನೆ ಪ್ರಸ್ತಾವನೆ ಹಂತದಲ್ಲಿದೆ ಉಳಿದುಕೊಂಡಿದೆ. ಕೆಲ ಭಾಗದಲ್ಲಿ ರಾಜ್ಯ ಸರ್ಕಾರದ ವಿವಿಧ ವಸತಿ ಯೋಜನೆ ಅಡಿಯಲ್ಲಿ ಮನೆ ಮಂಜೂರು ಆದರೂ, ನಿವೇಶನ ಇಲ್ಲದಿರುವ ಕಾರಣ ಫಲಾನುಭವಿಗಳು ಮನೆ ನಿರ್ಮಿಸಿಕೊಂಡಿಲ್ಲ. ಹೀಗಾಗಿ ಜಿ+3 ಮಾದರಿ ಮನೆಗೆ ಬೇಡಿಕೆ ಹೆಚ್ಚಲು ಪ್ರಮುಖ ಕಾರಣ ಎನ್ನಲಾಗಿದೆ.

ಬೆಳಗಾವಿ ಪಾಲಿಕೆಯು ಅಲಾರವಾಡ, ವಡಗಾಂವಿ ಸೇರಿ ವಿವಿಧ ಕಡೆ ಒಟ್ಟು 21 ಎಕರೆ ಪ್ರದೇಶದಲ್ಲಿ ಜಿ+3 ಮನೆ ನಿರ್ಮಾಣ ಆಗುತ್ತಿದ್ದು, ಉತ್ತರ ಮತ್ತು ದಕ್ಷಿಣ ವಿಧಾನಸಭಾ ಕ್ಷೇತ್ರದ ವ್ಯಾಪ್ತಿಯಲ್ಲಿ ಪರಿಶಿಷ್ಟ ಜಾತಿ-738, ಪರಿಶಿಷ್ಟ ಪಂಗಡ-207, ಓಬಿಸಿ-154 ಹಾಗೂ ಇತರೆ 385 ಸೇರಿದಂತೆ 1484 ಫಲಾನುಭವಿಗಳು ಆಯ್ಕೆಗೊಂಡಿದ್ದಾರೆ. ಆದರೆ, ಗುತ್ತಿಗೆದಾರರ ವಿಳಂಬದಿಂದಾಗಿ ಮನೆ ನಿರ್ಮಾಣ ಕಾರ್ಯ ನಿಗದಿತ ಸಮಯದಲ್ಲಿ ಪೂರ್ಣಗೊಂಡಿಲ್ಲ. ನಿಪ್ಪಾಣಿ ನಗರ ಸಭೆಯ ವ್ಯಾಪ್ತಿಯಲ್ಲಿ 1812 ಜಿ+3 ಮಾದರಿ ಮನೆ ಪೈಕಿ 600 ಮನೆ ಪೂರ್ಣಗೊಂಡಿದ್ದು, ಬಾಕಿ ಉಳಿದಿರುವ 1212 ಮನೆಗಳ ನಿರ್ಮಾಣ ಪ್ರಗತಿ ಹಂತದಲ್ಲಿದೆ. ಈ ಯೋಜನೆಯಡಿ ಜಿ+3 ಮಾದರಿ ಮನೆಗಳ ನಿರ್ಮಾಣಕ್ಕೆ ಪ್ರತಿ ಮನೆಗೆ 6.20 ಲಕ್ಷ ರೂ. ಖರ್ಚಾಗಲಿದೆ ಎಂದು ವಸತಿ ಮತ್ತು ಪಾಲಿಕೆ ಅಧಿಕಾರಿಗಳು ತಿಳಿಸಿದ್ದಾರೆ.

...........

ಬಾಕ್ಸ್

ಜಿಲ್ಲೆಯಲ್ಲಿ ಜಿ+3 ಮನೆಗಳ ನಿರ್ಮಿಸುವ ವಿವರ

ವಿಭಾಗ ಬೆಳಗಾವಿ ಪಾಲಿಕೆ ನಿಪ್ಪಾಣಿ ನಗರಸಭೆ

ಒಟ್ಟು ಮನೆ(ಜಿ+3) 1484 1812

ಪೂರ್ಣ 00 600

ಪ್ರಗತಿ 800 1212

ಆರಂಭವಾಗದ 684 00

..................................

ಕೋಟ್ಸ್

ಸದ್ಯ ನಗರ ಸ್ಥಳೀಯ ಸಂಸ್ಥೆಯ ವ್ಯಾಪ್ತಿಯಲ್ಲಿ ಜಿ+3 ಮಾದರಿ ಮನೆಗಳಿಗೆ ಹೆಚ್ಚಿನ ಬೇಡಿಕೆ ಬರುತ್ತಿವೆ. ಬೆಳಗಾವಿ ಪಾಲಿಕೆ, ನಿಪ್ಪಾಣಿ ನಗರಸಭೆಯಲ್ಲಿ ಮನೆ ನಿರ್ಮಾಣ ಪ್ರಗತಿ ಹಂತದಲ್ಲಿವೆ. ಹಂತ ಹಂತವಾಗಿ ಫಲಾನುಭವಿಗಳಿಗೆ ನಿಗದಿತ ಸಮಯದಲ್ಲಿಯೇ ಮನೆ ಹಂಚಿಕೆ ಮಾಡುವಂತೆ ಸೂಚಿಸಲಾಗಿದೆ.

-ಮಲ್ಲಿಕಾರ್ಜುನ ಕಲಾದಗಿ, ಜಿಲ್ಲಾ ನಗರಾಭಿವೃದ್ಧಿ ಕೋಶದ ಯೋಜನಾ ನಿರ್ದೇಶಕ