ಚರಂಡಿ ಸೇರಿದ ಕಟ್ಟಡ ತ್ಯಾಜ್ಯ!

ಬೆಳಗಾವಿ: ವಿವಿಧ ಬಡಾವಣೆಗಳಲ್ಲಿ ಹಳೇ ಕಟ್ಟಡಗಳ ತೆರವು ಹಾಗೂ ಹೊಸ ಕಟ್ಟಡಗಳ ನಿರ್ಮಾಣ ಕಾಮಗಾರಿ ಜೋರಾಗಿದ್ದು, ಚರಂಡಿ ಸೇರುತ್ತಿರುವ ಕಟ್ಟಡ ತ್ಯಾಜ್ಯಗಳಿಂದ ಕೊಳಚೆ ನೀರು ಹರಿದು ಹೋಗದಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ಅನೇಕ ಬಡಾವಣೆಗಳ ನಿವಾಸಿಗಳು ಅಳಲು ತೋಡಿಕೊಂಡಿದ್ದಾರೆ.

ನೆಹರು ನಗರ, ಶಿವಬಸವ ನಗರ, ಮಹಾಂತೇಶ ನಗರ, ಮಹಾದ್ವಾರ ರಸ್ತೆ, ವಡಗಾವಿ, ಅನಗೋಳ, ಟಿಳಕವಾಡಿ, ಶಹಾಪುರ, ಶಾಸಿ ನಗರಗಳಲ್ಲಿ ಮನೆ ನಿರ್ಮಾಣ ಜೋರಾಗಿ ನಡೆದಿವೆ. ನಗರದ ಹಳೇ ಬಡಾವಣೆಗಳಲ್ಲಿ ಹಳೇ ಮನೆ ಕೆಡವಿ ಹೊಸ ಕಟ್ಟಡ ನಿರ್ಮಿಸುತ್ತಿದ್ದಾರೆ. ಹೊರವಲಯದಲ್ಲಿರುವ ಬಡಾವಣೆಗಳಲ್ಲಿ ಹೊಸ ಕಟ್ಟಡಗಳನ್ನು ಕಟ್ಟುತ್ತಿದ್ದಾರೆ. ಹಳೆಯದನ್ನು ತೆರವು ಮಾಡುವಾಗ ಅದರ ಅವಶೇಷಗಳು ಚರಂಡಿಗಳಿಗೆ ಸೇರುತ್ತಿವೆ. ಹೊಸ ಕಟ್ಟಡ ನಿರ್ಮಾಣಕ್ಕೆ ಜಲ್ಲಿಕಲ್ಲು, ಮರಳು ಹಾಗೂ ಮತ್ತಿತರ ಸಾಮಗ್ರಿಗಳನ್ನು ಗಟಾರಿನ ಮೇಲೆಯೇ ಸಂಗ್ರಹ ಮಾಡುತ್ತಿದ್ದಾರೆ. ಇದು ಕೂಡ ಚರಂಡಿಗಳನ್ನು ಸೇರುತ್ತಿದ್ದು, ಮಳೆ ಬಂದಾಗ ಇಲ್ಲವೇ ಮೇಲ್ಭಾಗದಿಂದ ಹೆಚ್ಚಿನ ನೀರು ಹರಿದು ಬಂದಾಗ, ಕೆಳಭಾಗಕ್ಕೆ ಹೋಗಿ ನಿಂತು ಅಲ್ಲಲ್ಲಿ ಅಡೆತಡೆ ಸೃಷ್ಟಿಸುತ್ತಿವೆ.

ಹಳೇ ಚರಂಡಿಗಳಿದ್ದು ಅಲ್ಲಲ್ಲಿ ಸೋರಿಕೆಯಾಗುತ್ತಿವೆ. ಕಲ್ಲು, ಕಡಿ, ಮರಳು ತುಂಬಿ, ನೀರು ಹರಿದು ಹೋಗದಂತಾಗಿದೆ. ದುರ್ವಾಸನೆಗೆ ಮನೆ ಬಾಗಿಲು ತೆಗೆಯದ ಪರಿಸ್ಥಿತಿ ನಿರ್ಮಾಣವಾಗಿದೆ. ನಾವೇ ತಾತ್ಕಾಲಿಕ ವ್ಯವಸ್ಥೆ ಮಾಡಿಕೊಳ್ಳುತ್ತಿದ್ದು, ಪಾಲಿಕೆ ಕಾಳಜಿ ವಹಿಸಬೇಕು.

— ವಿಶ್ವನಾಥ ಪಾಟೀಲ, ನೆಹರು ನಗರ ನಿವಾಸಿ

ನೆಹರು ನಗರ ಡಿಮಾರ್ಟ್ ರಸ್ತೆಯಲ್ಲಿ ಈಗಾಗಲೇ ಸಾಕಷ್ಟು ಸಲ ಚರಂಡಿ ಸಮಸ್ಯೆ ಉದ್ಭವಿಸಿದೆ. ಇಲ್ಲಿನ ಬಸವಣ್ಣ ಮಹಾದೇವ ಮಂದಿರಕ್ಕೆ ಈಚೆಗೆ ಕೊಳಚೆ ನೀರು ನುಗ್ಗಿತ್ತು. ಈ ಬಗ್ಗೆ ವಿಜಯವಾಣಿ ವರದಿ ಮಾಡಿದ ಬಳಿಕ ಎಚ್ಚೆತ್ತುಕೊಂಡ ಪಾಲಿಕೆ ಕೆಲಸವನ್ನು ಆರಂಭಿಸಿದೆಯಾದರೂ, ಆಮೆಗತಿಯಲ್ಲಿ ನಡೆದಿದೆ. ಹೀಗಿರುವಾಗಲೇ ಅಕ್ಕಪಕ್ಕದಲ್ಲಿನ ಗಟಾರುಗಳಲ್ಲಿ ಸದ್ಯ ಕಟ್ಟಡ ಸಾಮಗ್ರಿಗಳು ಸೇರಿ ಕೊಳಚೆ ನೀರು ಹರಿದು ಹೋಗದೆ ನೇರವಾಗಿ ರಸ್ತೆಗೆ ವ್ಯಾಪಿಸಿಕೊಳ್ಳುತ್ತಿದೆ.

ಈ ಬಗ್ಗೆ ಪಾಲಿಕೆ ಗಮನಕ್ಕೆ ತಂದರೂ ಕಸಕಡ್ಡಿ ಮಾತ್ರ ತೆರವು ಮಾಡಬಹುದು. ಕಟ್ಟಡ ಸಾಮಗ್ರಿ ತೆಗೆಯಲು ಆಗುವುದಿಲ್ಲ ಎಂದು ಸಬೂಬು ಹೇಳಿದ್ದಾರಂತೆ. ಪರಿಣಾಮ, ಸ್ಥಳೀಯರೇ ಈಗ ಇದನ್ನು ಸರಿಮಾಡಲು ಮುಂದಾಗಿದ್ದು, ಕೊಳಚೆ ನೀರು ರಸ್ತೆಗೆ ನುಗ್ಗದಂತೆ ಅಲ್ಲಲ್ಲಿ ಮಣ್ಣು ಸುರಿಯುತ್ತಿದ್ದಾರೆ. ಆದರೆ, ಗಟಾರಿನಲ್ಲಿ ಸಾಕಷ್ಟು ಕಲ್ಲು, ಕಡಿ, ಮರಳು ಸೇರಿದ್ದು ನೀರು ಹರಿದು ಹೋಗುತ್ತಿಲ್ಲ. ಇದರಲ್ಲಿ ಚಿಕ್ಕಮಕ್ಕಳು ಬಿದ್ದು ಅಪಘಾತ ಸಂಭವಿಸುವ ಆತಂಕವೂ ಹೆಚ್ಚಾಗಿದೆ.