ಪಾರ್ಕಿಂಗ್ ಅಡ್ಡೆಯಾದ ಬೆಳವಡಿ ಆಸ್ಪತ್ರೆ

ಆಸ್ಪತ್ರೆಯಲ್ಲಿಇಬ್ಬರು ವೈದ್ಯರು ಮಾತ್ರ ಕಾರ್ಯನಿರ್ವಹಿಸುತ್ತಿದ್ದು, ಮೂರು ಹುದ್ದೆ ಖಾಲಿ ಇವೆ. ಗ್ರಾಮ ಸುಮಾರು 18,000 ಜನಸಂಖ್ಯೆ ಹೊಂದಿದೆ. ಸಿದ್ಧಸಮುದ್ರ, ಲಿಂಗದಳ್ಳಿ, ಬಿದರಗಡ್ಡಿ ಹಾಗೂ ಕೆಂಗಾನೂರ ಗ್ರಾಮಗಳು ಕೂಡ ಈ ಆರೋಗ್ಯ ಕೇಂದ್ರದ ವ್ಯಾಪ್ತಿಗೆ ಒಳಪಡುತ್ತವೆ. ಹೀಗಾಗಿ, ಈ ಭಾಗದ ಸಹಸ್ರಾರು ಜನರು ಚಿಕಿತ್ಸೆಗಾಗಿ ಇದೇ ಆಸ್ಪತ್ರೆಗೆ ಬರುತ್ತಾರೆ. ಆದರೆ, ವೈದ್ಯರ ಕೊರತೆಯಿಂದ ರೋಗಿಗಳು ಪರದಾಡುವಂತಾಗಿದೆ.

ಖಾಸಗಿ ವಾಹನಗಳ ನಿಲುಗಡೆ: ಸಮುದಾಯದ ಆರೋಗ್ಯ ಕೇಂದ್ರದ ಆವರಣದಲ್ಲಿ ಸಂಜೆಯಾಗುತ್ತಿದ್ದಂತೆ ಖಾಸಗಿ ವಾಹನಗಳ ನಿಲುಗಡೆ ಜೋರಾಗುತ್ತದೆ. ವಾಹನ ನಿಲುಗಡೆ ಮಾಡದಂತೆ ಸಿಬ್ಬಂದಿ ತಿಳಿಹೇಳಿದರೂ ಸ್ಪಂದಿಸುತ್ತಿಲ್ಲ. ಒಮ್ಮೊಮ್ಮೆ ಆಂಬುಲೆನ್ಸ್ ನಿಲ್ಲಿಸಲು ಕೂಡ ಜಾಗ ಇಲ್ಲವಾಗಿರುತ್ತದೆ.

ಆಸ್ಪತ್ರೆ ಆವರಣದಲ್ಲಿ ಗಿಡ-ಗಂಟಿ ಬೆಳೆದಿವೆ. ಭದ್ರತಾ ಸಿಬ್ಬಂದಿ ಇಲ್ಲದ ಕಾರಣ ಆವರಣ ಬಿಡಾಡಿ ದನಗಳು, ಬೀದಿ ನಾಯಿಗಳ ಆಶ್ರಯ ತಾಣವಾಗಿದೆ. ಈಗಲಾದರೂ ಸಂಬಂಧಪಟ್ಟ ಮೇಲಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳು ಆಸ್ಪತ್ರೆಗೆ ಅಗತ್ಯ ವೈದ್ಯರನ್ನು ನಿಯೋಜಿಸಿ, ಸಮಸ್ಯೆಗಳನ್ನು ನಿವಾರಿಸಿ ಬಡ ರೋಗಿಗಳಿಗೆ ಅನುಕೂಲ ಕಲ್ಪಿಸಬೇಕೆಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.