ಬೆಂಗಳೂರು: 2024-25ನೇ ಸಾಲಿನ ಆಯವ್ಯಯ ಭಾಷಣ ಕಂಡಿಕೆ 269ರಲ್ಲಿ ಘೋಷಿಸಿರುವಂತೆ ಇದೀಗ ಬೆಂಗಳೂರು ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ವ್ಯಾಪಾರ-ವಹಿವಾಟು ನಡೆಸುವವರು ಇನ್ಮುಂದೆ ಮಧ್ಯರಾತ್ರಿ 1 ಗಂಟೆಯವರೆಗೆ ಅಂಗಡಿಗಳನ್ನು ತೆರೆದಿರಬಹುದು ಎಂದು ಬಿಬಿಎಂಪಿ ಹೊರಡಿಸಿದ ಹೊಸ ಪ್ರಕಟಣೆಯಲ್ಲಿ ಉಲ್ಲೇಖಿಸಲಾಗಿದೆ. ಈ ಹಿಂದೆ ರಾಜ್ಯ ರಾಜಧಾನಿಯಲ್ಲಿ ರಸ್ತೆಬದಿ ವ್ಯಾಪಾರ-ವಹಿವಾಟು ನಡೆಸುವವರು ರಾತ್ರಿ 11 ಗಂಟೆಯೊಳಗೆ ತಮ್ಮ ವ್ಯಾಪಾರವನ್ನು ಮುಗಿಸಿ, ಅಂಗಡಿಗಳನ್ನು ಮುಚ್ಚಬೇಕಿತ್ತು. ಆದ್ರೆ, ಇದೀಗ ಬೆಂಗಳೂರು ಮಹಾನಗರ ಪಾಲಿಕೆ ಹೊಸ ಪ್ರಕಟಣೆಯೊಂದನ್ನು ವ್ಯಾಪಾರಿಗಳ ಗಮನಕ್ಕೆ ತಂದಿದ್ದು, ರಾತ್ರಿಯ ವೇಳೆ ವ್ಯಾಪಾರ-ವಹಿವಾಟಿನ ನಿರ್ಬಂಧವನ್ನು ಬೆಳಗಿನ ಜಾವ 01.00 ಗಂಟೆಯವರೆಗೆ ವಿಸ್ತರಿಸಿದೆ.
