ಡಕಾಯಿತ ಬಾಂಬೆ ಸಲೀಂ ಸೇರಿ 7 ಸಹಚರರ ಸೆರೆ

ಬಾಗೇಪಲ್ಲಿ: ಕರ್ನಾಟಕ, ಆಂಧ್ರಪ್ರದೇಶ, ಮಹಾರಾಷ್ಟ್ರ ರಾಜ್ಯಗಳಲ್ಲಿ ಡಕಾಯತಿ, ಕೊಲೆ, ಕಿಡ್ನಾಪ್​ ಪ್ರಕರಣಗಳಲ್ಲಿ ಆರೋಪಿಗಳಾಗಿರುವ ಡಕಾಯಿತ ಬಾಂಬೆ ಸಲೀಂ ಹಾಗೂ ಆತನ 7 ಸಹಚರರನ್ನು ಬಾಗೇಪಲ್ಲಿ ಪೊಲೀಸರು ಬಂಧಿಸಿದ್ದಾರೆ.

ಇಡೀ ಪ್ರಕರಣದ ಬಗ್ಗೆ ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಕುಶಾಲ್​ ಚೌಕ್ಸೆ ಅವರು ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.

ಬಂಧಿತರಿಂದ 5.15 ಲಕ್ಷ ರೂ. ನಗದು, 30 ಲಕ್ಷ ರೂ. ಬೆಲೆಬಾಳುವ ಕಾರನ್ನು ವಶಕ್ಕೆ ಪಡೆದಿದ್ದಾರೆ.

ಬಾಂಬೆ ಸಲೀಂ ಹಾಗೂ ಗುಡಿಬಂಡೆ, ಬಾಗೇಪಲ್ಲಿ, ರಾಜಾನುಕುಂಟೆ, ಬೆಂಗಳೂರು ಪೊಲೀಸ್​ ಠಾಣೆಗಳಲ್ಲಿ ರೌಡಿ ಶೀಟರ್​ಗಳಾದ ಬಾಗೇಪಲ್ಲಿಯ ಚೇತನ್​, ಗುಡಿಬಂಡೆಯ ಬಾಬುರೆಡ್ಡಿ, ರಾಜಾನುಕುಂಟೆಯ ನಾಗೇಶ್​, ಬೆಂಗಳೂರಿನ ವಸೀಮ್​ ಮತ್ತು ಸಹಚರರಾದ ಚೇತನ್​, ಅನಿಲ್​, ಅಸ್ಲಾಂ ಸೇರಿ ಎಂಟು ಡಕಾಯಿತರು ಆದಿಗಾನಹಳ್ಳಿ ಬಳಿಯ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಗುಡಿಬಂಡೆ ತಾಲೂಕಿನ ಗಂಗಾನಹಳ್ಳಿ ಗ್ರಾಮದ ಅಶ್ವತ್ಥನಾರಾಯಣಸ್ವಾಮಿ ಎಂಬುವರ ಕಾರನ್ನು ಅಡ್ಡಗಟ್ಟಿ 16 ಲಕ್ಷ ರೂ. ದೋಚಿ ಆತನನ್ನು ಕಿಡ್ನಾಪ್​ ಮಾಡಿ ಆತನ ಪತ್ನಿಗೆ ಕರೆ ಮಾಡಿ ಬೆದರಿಸಿ 50 ಲಕ್ಷ ರೂ.ಗಳಿಗೆ ಬೇಡಿಕೆ ಇಟ್ಟಿದ್ದರು.

ಅಶ್ವತ್ಥನಾರಾಯಣಸ್ವಾಮಿ ಸಂಬಂಧಿಕರು ನೀಡಿದ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿಕೊಂಡಿರುವ ಬಾಗೇಪಲ್ಲಿ ಪೋಲೀಸರು, ಎಸ್​ಪಿ ಕುಶಾಲ್​ ಚೌಕ್ಸೆ ಸೂಚನೆಯಂತೆ ಸರ್ಕಲ್​ ಇನ್​ಸ್ಪೆಪೆಕ್ಟರ್​ ಪ್ರಶಾಂತ್​ ವರ್ಣಿ ನೇತೃತ್ವದಲ್ಲಿ ಕಾರ್ಯಾಚರಣೆ ನಡೆಸಿ ಬಾಂಬೆ ಸಲೀಂ ಸೇರಿ ಇತರ 8 ಮಂದಿಯನ್ನು ಬಂಧಿಸಿ, ಡಕಾಯಿತರ ಬಳಿ ಇದ್ದ ಕಾರು, ಎಟಿಎಂ ಕಾರ್ಡ್​, ಹಣ, ದ್ವಿಚಕ್ರ ವಾಹನ, ಮಾರಕಾಸಗಳನ್ನು ವಶಕ್ಕೆ ಪಡೆದಿದ್ದಾರೆ.

ಕಾರ್ಯಾಚರಣೆಯಲ್ಲಿ ಸರ್ಕಲ್​ ಇನ್​ಸ್ಪೆಕ್ಟರ್​ ಪ್ರಶಾಂತ್​ ವರ್ಣಿ, ಇನ್​ಸ್ಪೆಕ್ಟರ್​ಗಳಾದ ನಾಗಮ್ಮ, ಮುನಿರತ್ನಂ, ಪೇದೆಗಳಾದ ಸುರೇಶ್​, ವೆಂಕಟರವಣ, ಶ್ರೀನಾಥ, ಶ್ರೀಪತಿ, ಧನುಂಜಯ, ಮೋಹನ್​ ಕುಮಾರ್​, ಸಾಗರ್​, ವೆಂಕಟಶಿವ, ಖದೀರ್​ ಮಹಮದ್​, ನೂರ್​ಬಾಷಾ ಇದ್ದರು.

ಯಾರು ಈ ಬಾಂಬೆ ಸಲೀಂ?: ಅಂತಾರಾಜ್ಯ ಡಕಾಯಿತ ಬಾಂಬೆ ಸಲೀಂ ಮೂಲತಃ ಮಹಾರಾಷ್ಟ್ರದವನಾಗಿದ್ದು, 12 ವರ್ಷದವನಾಗಿದ್ದಾಗಲೇ ಕೆಲಸ ಮಾಡುತ್ತಿದ್ದ ಅಂಗಡಿ ಮಾಲೀಕನನ್ನೆ ಕೊಲೆ ಮಾಡಿ ಜೈಲುಶಿೆ ಅನುಭವಿಸಿದ್ದ. ಅಂದಿನಿಂದ ಇದುವರೆಗೂ ಅದೇ ವೃತ್ತಿಯಲ್ಲಿ ತೊಡಗಿಸಿಕೊಂಡು ಕರ್ನಾಟಕ, ಮಹಾರಾಷ್ಟ್ರ, ಆಂಧ್ರಪ್ರದೇಶ ರಾಜ್ಯಗಳ ವಿವಿಧ ಪೊಲೀಸ್​ ಠಾಣೆಗಳಲ್ಲಿ ಬಾಂಬೆ ಸಲೀಂ ವಿರುದ್ದ 5 ಕೊಲೆ, 4 ಡಕಾಯಿತಿ, 2 ಸುಲಿಗೆ, 2 ಕಿಡ್ನಾಪ್​ ಪ್ರಕರಣ ಹಾಗೂ ಕಳವು ಪ್ರಕರಣಗಳು ಸೇರಿ 20ಕ್ಕೂ ಹೆಚ್ಚು ಪ್ರಕರಣಗಳು ದಾಖಲಾಗಿವೆ. ಬಾಂಬೆ ಸಲೀಂ ಮೂರು ರಾಜ್ಯಗಳ ಪೊಲೀಸರಿಗೆ ವಾಂಟೆಡ್​ ಕ್ರಿಮಿನಲ್​ ಆಗಿದ್ದಾನೆ.