ಜೆ.ಕೆ. ಆನಂದ್ ಚೇಳೂರು
ಪಟ್ಟಣದ ವ್ಯವಸಾಯ ಸೇವಾ ಸಹಕಾರ ಸಂಘವು ಮುಚ್ಚಿದ್ದು, ಕಚೇರಿಗೆ ಅಧಿಕಾರಿಗಳು ಹಾಗೂ ಸಿಬ್ಬಂದಿ ನಿಯೋಜಿಸಬೇಕೆಂದು ರೈತರು ಮನವಿ ಮಾಡಿದ್ದಾರೆ.
ತಾಲೂಕು ಕೇಂದ್ರ ಚೇಳೂರು ಪ್ರಮುಖ ವಾಣಿಜ್ಯ ಕೇಂದ್ರವಾಗಿದೆ. ಆದರೆ, ಒಂದು ವರ್ಷಕ್ಕೂ ಹೆಚ್ಚು ದಿನದಿಂದ ಇಲ್ಲಿನ ವ್ಯವಸಾಯ ಸೇವಾ ಸಹಕಾರ ಸಂಘದ ಬಾಗಿಲು ಬಂದ್ ಆಗಿದೆ.
ಸೀ ಶಕ್ತಿ ಮಹಿಳಾ ಸಂಘದ ಸದಸ್ಯರು, ಕೃಷಿ ಸಾಲ ಪಡೆಯುವವರು ಹಣ ಕಟ್ಟಿದ್ದು, ಇವರಿಗೆ ಕೃಷಿ ಸಾಲ ಮತ್ತಿತರ ಸಾಲ ನೀಡದ ಕಾರಣ ಸಂಘದ ಕಚೇರಿ ಎದುರು ಗಲಾಟೆಗಳು, ಪ್ರತಿಭಟನೆಗಳು ನಡೆದಿವೆ. ಸಂಘದ ಕಾರ್ಯದರ್ಶಿ ವಿರುದ್ಧ ಸ್ಥಳೀಯ ಠಾಣೆಯಲ್ಲಿ ದೂರು ಸಹ ನೀಡಲಾಗಿದೆ.
ಗಲಾಟೆಗಳಾಗಿ, ದೂರು ನೀಡಿದ್ದರೂ ಜಿಲ್ಲಾ ಡಿಸಿಸಿ ಬ್ಯಾಂಕ್ ಅಧಿಕಾರಿಗಳು ಇತ್ತ ತಿರುಗಿಯೂ ನೋಡಿಲ್ಲ. ಗ್ರಾಮೀಣ ರೈತಾಪಿ ಜನರಿಗೆ ಡಿಸಿಸಿ ಬ್ಯಾಂಕ್ನಿಂದ ಲಕ್ಷಾಂತರ ರೂಪಾಯಿ ಸಾಲ ನೀಡಿ ಅಭಿವೃದ್ಧಿ ಮಾಡಲು ಸೂಚಿಸಿದರೆ, ಇದಕ್ಕೆ ವಿರುದ್ಧವಾಗಿ ಇಲ್ಲಿನ ಸಂಘದ ಪ್ರಗತಿ ಶೂನ್ಯವಾಗಿದೆ. ಕೆಲ ರೈತರಿಂದ ಹಣ ಪಡೆದು, ಕೃಷಿ ಸಾಲ ನೀಡಿ ಮತ್ತೆ ಕಟ್ಟಿಸಿಕೊಂಡು ನವೀಕರಣ ಮಾಡಿಸುವುದಾಗಿ ಹೇಳಿ, ಹಣವನ್ನೂ ನೀಡದೆ, ನವೀಕರಣವನ್ನೂ ಮಾಡಿಲ್ಲ. ಪಹಣಿಯಲ್ಲಿ ಮಾತ್ರ ಆಧಾರ ಎಂದು ನಮೂದಿಸಿ ಕೈತೊಳೆದುಕೊಂಡಿರುವುದು ಹಲವರನ್ನು ಸಂಕಷ್ಟಕ್ಕೆ ಸಿಲುಕಿಸಿದೆ.
