ಸಾಧನೆ ಮಾಡಿ ಸಮಾಜಕ್ಕೆ ಕೊಡುಗೆ ನೀಡಿ

ಬಾಗಲಕೋಟೆ: ಕನ್ನಡ ನಾಡು ಪ್ರಾಚೀನ ಕಾಲದಿಂದಲೂ ವಿದ್ವತ್ತು ಮತ್ತು ವಿನಯ ಎರಡೂ ಪರಂಪರೆಗಳನ್ನು ಮೈಗೂಡಿಸಿಕೊಂಡು ಬಂದಿದೆ. ಇದು ಈ ನೆಲದ ಅಸ್ಮಿತೆ ಕೂಡಾ ಎಂದು ಶಿವಮೊಗ್ಗದ ಆನಂದಪುರ ಬೆಕ್ಕಿನಕಲ್ಮಠದ ಡಾ.ಮಲ್ಲಿಕಾರ್ಜುನ ಡಾ.ಮಲ್ಲಿಕಾರ್ಜುನ ಮುರಘರಾಜೇಂದ್ರ ಸ್ವಾಮೀಜಿ ಹೇಳಿದರು.

ನಗರ ಚರಂತಿಮಠದ ಶಿವಾನುಭವ ಮಂಗಲ ಭವನದಲ್ಲಿ ಭಾನುವಾರ ಹಮ್ಮಿಕೊಂಡಿದ್ದ ಪ್ರೊ.ಗೌ.ಮ.ಉಮಾಪತಿ ಶಾಸ್ತ್ರಿ ಜನ್ಮ ಶತಮಾನೋತ್ಸವ ವರ್ಷ, ಪ್ರತಿಷ್ಠಾನದ ಉದ್ಘಾಟನೆ, ಸಾಹಿತ್ಯ-ಸಂಶೋಧನಾ ಪ್ರಶಸ್ತಿ ಪ್ರದಾನ ಸಮಾರಂಭದ ಸಾನಿಧ್ಯ ವಹಿಸಿ ಅವರು ಮಾತನಾಡಿದರು.

ಉಮಾಪತಿ ಶಾಸ್ತ್ರಿಗಳು ಪ್ರಾಧ್ಯಾಪಕರಾಗಿ, ಪತ್ರಿಕಾ ಸಂಪಾದಕರಾಗಿ, ಸಂಶೋಧಕರಾಗಿ, ಹಸ್ತಪ್ರತಿಗಳ ಶೋಧ ಮತ್ತು ಸಂರಕ್ಷಕರಾಗಿ, ಕನ್ನಡ ನಾಡಿನ ವಿದ್ವತ್ ಪರಂಪರೆಯಲ್ಲಿ ಗುರುತಿಸಿಕೊಂಡವರು. ಬಹುಶೃತ ವಿದ್ವಾಂಸರಾಗಿರುವ ಶ್ರೀಯುತರು ಕನ್ನಡನಾಡು - ನುಡಿ- ಸಂಸ್ಕೃತಿಗಳ ಅನನ್ಯತೆಗೆ ತಮ್ಮದೆ ಆದ ಹೆಜ್ಜೆಗುರುತುಗಳನ್ನು ಬಿಟ್ಟು ಹೋಗಿದ್ದಾರೆ. ಸರಳ, ಸಜ್ಜನಿಕೆಯ, ನಿರಾಡಂಬರ ವ್ಯಕ್ತಿತ್ವದ ಉಮಾಪತಿಶಾಸ್ತಿçÃಯವರು ವಿದ್ವತ್ತು ಮತ್ತು ವಿನಯಕ್ಕೆ ಮಾದರಿಯಾದವರು ಎಂದರು.

ಬಿವಿವಿ ಸಂಘದ ಬಸವೇಶ್ವರ ಕಲಾ ಮಹಾವಿದ್ಯಾಲಯದಲ್ಲಿ ಹಿಂದಿ ಪ್ರಾಧ್ಯಾಪಕರಾಗಿ ಸೇವೆ ಆರಂಭಿಸಿದ ಅವರು ತಮ್ಮ ನಿರಂತರ ಅಧ್ಯಯನ ಮತ್ತು ಅಧ್ಯಾಪನದೊಂದಿಗೆ, ವೃತ್ತಿಗೆ ಮಾದರಿಯಾದವರು. ಶಿವಯೋಗಮಂದಿರ ಪರಿಸರದಲ್ಲಿ ಇದ್ದ ಹಸ್ತಪ್ರತಿಗಳ ಸಂಗ್ರಹ, ಸಂರಕ್ಷಣೆ, ಅವುಗಳ ವ್ಯವಸ್ಥಿತವಾದ ಅಧ್ಯಯನ ಮಾಡುವುದರ ಮೂಲಕ ಹಸ್ತಪ್ರತಿಗಳ ಒಡನಾಟವನ್ನೇ ಒಂದು ಚಟವನ್ನಾಗಿ ಬೆಳೆಸಿಕೊಂಡರು ಎಂದು ತಿಳಿಸಿದರು.

ಹೀಗೆ ಉತ್ತರದ ಕಾಶಿಯಲ್ಲಿ ಅಂಕುರಗೊAಡ ಈ ಬಯಕೆ ದಕ್ಷಿಣದ ಶಿವಯೋಗಮಂದಿರ ಹಾಗೂ ಧರ್ಮಸ್ಥಳಗಳಲ್ಲಿ ಫಸಲು ಬಿಡುವಂತಾದುದು ನಿಜಕ್ಕೂ ವಿಸ್ಮಯದ ಸಂಗತಿ, ದರ್ಶನ ಮಾಧ್ಯಮ, ಪತಂಜಲಿ ಯೋಗಸೂತ್ರಗಳನ್ನು ಕಂಠಸ್ಥ ಮಾಡಿಕೊಂಡು ನಾಡಿನ ವಿದ್ವತ್ ಪರಂಪರೆಯ ಬಹುದೊಡ್ಡ ಶಕ್ತಿಯಾಗಿ ಬೆಳೆದರು. ಇಂತಹ ಅಪೂರ್ವ ಚೇತನಕ್ಕೆ ಇದೀಗ ಜನ್ಮಶತಮಾನೋತ್ಸವದ ಸಂಭ್ರಮ. ಇಂತಹ ಅಪೂರ್ವ ಸಂದರ್ಭದಲ್ಲಿ ಅವರ ಸವಿನೆನಪಿಗಾಗಿ ಗೌ.ಮ.ಉಮಾಪತಿ ಶಾಸ್ತ್ರಿ ಪ್ರತಿಷ್ಠಾನ ಹುಟ್ಟುಹಾಕಿ ಅದರ ಉದ್ಘಾಟನೆ, ವಿಶೇಷ ಉಪನ್ಯಾಸ ಮತ್ತು ಪ್ರೊ.ಗೌ.ಮ.ಉಮಾಪತಿ ಶಾಸ್ತ್ರಿ ಸಾಹಿತ್ಯ ಸಂಶೋಧನಾ ಪ್ರಶಸ್ತಿ ಪ್ರದಾನ ಮಾಡುತ್ತಿರುವುದು ಶ್ಲಾಘನೀಯವಾಗಿದೆ. ಮುಂದಿನ ಪಿಳಿಗೆಗೆ ದೇಶದ ಇತಿಹಾಸ ಅರಿವು ಬಹಳ ಮುಖ್ಯವಾಗಿದೆ ಎಂದು ತಿಳಿಸಿದರು.

ಬೆಂಗಳೂರಿನ ಕರ್ನಾಟಕ ಸಂಸ್ಕೃತ ವಿಶ್ವವಿದ್ಯಾಲಯದ ಸಂಸ್ಥಾಪಕ ಕುಲಪತಿ ಹಿರಿಯ ವಿದ್ವಾಂಸ ಪ್ರೊ.ಮಲ್ಲೇಪುರಂ ಜಿ.ವೆಂಕಟೇಶ ಮಾತನಾಡಿ, ಉಮಾಪತಿಶಾಸ್ತ್ರಿ ಅವರ ವಿವೇಕ ಚಿಂತಾಮಣಿ ಕೃತಿ ನನ ಮೇಲೆ ಪ್ರಭಾವ ಬೀರಿದೆ, ಅಪೇಕ್ಷೆ ಇಲ್ಲದ ವಿದ್ವಾಂಸರಾಗಿದ್ದರು. ಇಳಿಯ ವಯಸ್ಸಲ್ಲು ಉತ್ಸಾಹ ಕಳೆದುಕೊಂಡಿರಲಿಲ್ಲ. ಸಂಪಾದನೆಯ ಕೃತಿಗಳಲ್ಲಿ ವಿದ್ವತ್ ಸಂಪೂರ್ಣವಾಗಿ ಬಳಸಿಕೊಂಡು ಕೆಲಸ ಮಾಡಿದವರು. ಮನುಷ್ಯ ಹುಟ್ಟಿದ ಮೇಲೆ ಏನಾದರೂ ಸಾಽಸಿ ಸಮಾಜಕ್ಕೆ ಕೊಡುಗೆ ನೀಡಬೇಕು ಎಂದರು.

ಚರ0ತಿಮಠದ ಮ.ನಿ.ಪ್ರ.ಪ್ರಭುಸ್ವಾಮಿಗಳು ಮಾತನಾಡಿ, ಉಮಾಪತಿ ಶಾಸ್ತ್ರಿ ಸಮಾಜಕ್ಕೆ ಉಪಯುಕ್ತ ಕೊಡುಗೆ ನೀಡಿದ್ದಾರೆ. ತಾಡೋಳೆ ಗ್ರಂಥಗಳ ಸಂಗ್ರಹದಲ್ಲಿ ಅಪಾರ ಆಸಕ್ತಿ ಹೊಂದಿದ್ದರು. ಸ್ವಾಧ್ಯಾಯ ನಮ್ಮಲ್ಲಿ ಇದ್ದರೆ ಎಲ್ಲವನ್ನು ಸಾಽಸಲು ಸಾಧ್ಯವಾಗಬಲ್ಲದು. ಉಮಾಪತಿ ಶಾಸ್ತ್ರಿ ತಮ್ಮ ಕೆಲಸಗಳಲ್ಲಿ ಸದಾ ನಿರತರಾಗಿರುತ್ತಿದ್ದರು ತಿಳಿಸಿದರು.

ವಿಶೇಷ ಉಪನ್ಯಾಸದಲ್ಲಿ ಸಾಹಿತಿ ಎಸ್.ಎಂ.ದಾಶಾಳ, ಪ್ರೊ.ಗೌ.ಮ.ಉಮಾಪತಿ ಶಾಸ್ತ್ರಿ ಆಸಕ್ತಿಯಿಂದ ಎಲ್ಲ ವಿಷಯಗಳನ್ನು ಕಲಿತವರಾಗಿದ್ದರು, ವೇದ ವಿಜ್ಞಾನಗಳನ್ನು ಸದಾ ಕಾಲ ಓದುವ ಮೂಲಕ ಪಾರಂಗತರಾಗಿ ಕಾಶಿಯಲ್ಲಿ ಅಧ್ಯಯನ ಮಾಡಿದರು, ವಿಶ್ವ ವಿದ್ಯಾಲಯ ಮಾಡುವ ಕೆಲಸ ತಾವೊಬ್ಬರೇ ಸಂಸ್ಕೃತ ಕ್ಷೇತ್ರದಲ್ಲಿ ಮಾಡಿದ್ದಾರೆ. ಹತ್ತು ಸಾವಿರ ಪುಸ್ತಕಗಳನ್ನು ಅವರು ಆಗಿನ ಕಾಲದಲ್ಲೆ ತಮ್ಮ ಮನೆಯಲ್ಲಿ ಸಂಗ್ರಹಿಸಿಟ್ಟಿದ್ದರು. ವಿವೇಕ ಚಿಂತಾಮಣಿ ಅವರ ಸಂಪಾದನೆ ಕೃತಿ ಚರ್ಚೆಗೆ ಒಳಪಟ್ಟ ನಾಡಿನ ಶ್ರೇಷ್ಠ ಪುಸ್ತಕ ಇದು ಅವರ ಪಾಂಡಿತ್ಯಕ್ಕೆ ಉದಾಹರಣೆ ಎಂದರು.

ಅಕ್ಕಮಹಾದೇವಿ, ಬಸವಣ್ಣನವರ ಹಿಂದಿ ಭಾಷೆಗೆ ಭಾಷಾಂತರಿಸಿದ್ದಾರೆ. ಹಸ್ತಪ್ರತಿ ಸೂಚಿ ಎಂಬ ನಾಲ್ಕು ಪುಸ್ತಕಗಳನ್ನು ಪ್ರಕಟಿಸಿ ಹಸ್ತ ಪ್ರತಿ ಮತ್ತು ತಾಡೋಳೆಗಳ ಸಂಗ್ರಹದಲ್ಲಿ ವಿಶೇಷ ಆಸಕ್ತಿ ಹೊಂದಿದ್ದರು, ಚನ್ನುಡಿ, ಹೆಮಕೂಟ ಪತ್ರಿಕೆಗಳನ್ನು ಹೊರಡಿಸಿ ಹಲವು ಲೇಖನ ಮತ್ತು ವಿಮರ್ಶಾ ಲೇಖನಗಳನ್ನು ಪ್ರಕಟಿಸುತ್ತದ್ದರು ಎಂದು ಹೇಳಿದರು.

ಟೀಕಿನಮಠದ ಮಲ್ಲಿಕಾರ್ಜುನ ಸ್ವಾಮಿಜಿ, ಅಶೋಕ ಎಂ ಸಜ್ಜನ ಬೇವೂರ, ಡಾ.ವಿಜಯಕುಮಾರ ಎಸ್.ಕಟಗಿಹಳ್ಳಿಮಠ, ಎಸ್.ಆರ್.ಮೂಗನೂರಮಠ, ಉಮಾಪತಿಶಾಸ್ತಿç ಅವರ ಪುತ್ರ ಜಿ.ಯು.ಸುಕುಮಾರಶಾಸ್ತಿç, ಎಸ್.ಜಿ.ಕೋಟಿ, ಡಾ.ಸುಭಾಸ ಪಾಟೀಲ ಇದ್ದರು. ಬಸವರಾಜ ಭಗವತಿ ಸ್ವಾಗತಿಸಿದರು. ಎಸ್.ವಿ.ಚೌಡಾಪುರ ಪರಿಚಯಿಸಿದರು, ಎಸ್.ಡಿ.ಕೆಂಗಲಗುತ್ತಿ ನಿರೂಪಿಸಿದರು. ಡಾ. ಕಲ್ಲಯ್ಯಾ ಹಿರೇಮಠ ವಂದಿಸಿದರು.