ಬರಿದಾಗಿದ್ದ ನದಿಗಳಿಗೆ ಹರಿದು ಬಂದ ಜೀವಜಲ !

ಬಾಗಲಕೋಟೆ: ಎಲ್ ನಿನೊ ಪರಿಣಾಮ ಸಕಾಲಕ್ಕೆ ಮಳೆ ಸುರಿಯದೇ ಬರದ ಆತಂಕದ ಜೊತೆಗೆ ಜಿಲ್ಲೆಯಲ್ಲಿ ಕುಡಿವ ನೀರಿಗೂ ಹಾಹಾಕಾರ ಉಂಟಾಗುವ ಲಕ್ಷಣಗಳು ಗೋಚರಿಸಿದ ಬೆನ್ನಲ್ಲೆ ಇದೀಗ ಮಹಾರಾಷ್ಟçದ ಪಶ್ಚಿಮಘಟ್ಟ ಹಾಗೂ ಬೆಳಗಾವಿ ಭಾಗದಲ್ಲಿ ಭಾರಿ ಮಳೆ ಸುರಿಯುತ್ತಿರುವ ಪರಿಣಾಮ ಜಿಲ್ಲೆಯ ಕೃಷ್ಣಾ ಮತ್ತು ಘಟಪ್ರಭಾ ನದಿಗಳಿಗೆ ನೀರು ಹರಿದು ಬರಲಾರಂಭಿಸಿದೆ.

ಕಳೆದ ವಾರವಷ್ಟೆ ಕೃಷ್ಣ ಮತ್ತು ಘಟಪ್ರಭಾ ನದಿಗಳು ಖಾಲಿಯಾಗಿ ಬಹುತೇಕ ಕಡೆ ನದಿ ಪಾತ್ರಗಳು ಆಟದ ಮೈದಾನದಂತಾಗಿದ್ದವು. ನೀರಿನ ಅಭಾವದಿಂದ ಜಮಖಂಡಿ ತಾಲೂಕಿನಲ್ಲಿ ಬಹುಗ್ರಾಮ ಕುಡಿವ ನೀರಿನ ಯೋಜನೆಗಳು ಬಂದ್ ಆಗಿದ್ದವು. ಹಿಪ್ಪರಗಿ ಜಲಾಶಯದಿಂದ ಡೆಡ್ ಸ್ಟೋರೇಜ್ ನೀರು ಕುಡಿಯಲು ಬಳಕೆ ಮಾಡಲು ಆರಂಭಿಸಿದ್ದರು. ಚಿಕ್ಕಪಡಸಲಗಿ, ಗಲಗಲಿ ಬ್ಯಾರೇಜ್‌ಗಳು ನೀರಿಲ್ಲದೇ ಒಣಗಿ ಭಣಗುಟ್ಟುತ್ತಿದ್ದವು.

ನದಿ ಅವಲಂಬಿತ ನಗರ, ಪಟ್ಟಣ ಮತ್ತು ಗ್ರಾಮಗಳಲ್ಲಿ ಕುಡಿವ ನೀರು ಜುಲೈ ೧೫ ರವರೆಗೆ ಮಾತ್ರ ಲಭ್ಯ ಇದ್ದು, ಬಳಿಕ ಕುಡಿವ ನೀರಿಗಾಗಿ ಸಾಕಷ್ಟು ಹಾಹಾಕಾರ ಉಂಟಾಗಲಿದೆ ಎಂದು ಜಿಲ್ಲಾಡಳಿತ ಪರ್ಯಾಯ ವ್ಯವಸ್ಥೆಗೆ ಸಿದ್ಧತೆ ನಡೆಸಿತ್ತು. ಇದಕ್ಕೆ ಪರಿಹಾರ ಎಂದರೆ ವರುಣ ಕೃಪೆ ಆಗಿತ್ತು. ಇದೀಗ ಸಂಕಷ್ಟದ ಸಮಯದಲ್ಲೆ ಮಹಾರಾಷ್ಟçದ ಪಶ್ಚಮ ಘಟ್ಟದಲ್ಲಿ ಮತ್ತು ಬೆಳಗಾವಿಯಲ್ಲಿ ವರುಣಾರ್ಭ ಮುಂದುವರೆದಿದ್ದು, ಜಿಲ್ಲೆಯಲ್ಲಿ ಆವರಿಸಿದ್ದ ಆತಂಕದ ಕಾರ್ಮೋಡ ಸರಿಯುವಂತಾಗಿದೆ.

ಮೂರು ದಿನಗಳಲ್ಲಿ ಬದಲಾದ ಸ್ಥಿತಿಗತಿ:

ಜುಲೈ ೩ ರಂದಷ್ಟೆ ಜಿಲ್ಲೆಯ ಹಿಪ್ಪರಗಿ ಬ್ಯಾರೇಜ್ ೦.೮೦ ಟಿಎಂಸಿ ಡೆಡ್ ಸ್ಟೋರೇಜ್‌ನಿಂದ ೦.೬೨ ಟಿಎಂಸಿಗೆ ಇಳಿಕೆಯಾಗಿತ್ತು. ಆದರೆ, ಅದೇ ದಿನ ಸಂಜೆಹೊತ್ತಿಗೆ ಸಿಹಿ ಸುದ್ದಿ ಎನ್ನುವಂತೆ ನದಿಗೆ ಹರಿದು ಬರುವ ನೀರಿನ ಪ್ರಮಾಣ ಹೆಚ್ಚಾಗಿ ಜು.೪ ರಿಂದ ಜು. ೬ ಸಂಜೆ ಹೊತ್ತಿಗೆ ಹಿಪ್ಪರಗಿ ಜಲಾಶಯದಲ್ಲಿ ನೀರಿನ ಮಟ್ಟ ೨.೪೬ ಟಿಎಂಸಿ ನೀರು ಸಂಗ್ರಹವಾಗಿದೆ. ೦.೮೦ ಟಿಎಂಸಿ ಡೆಡ್ ಸ್ಟೋರೇಜ್ ಬಿಟ್ಟು ೧.೬೬ ಟಿಎಂಸಿ ನೀರು ಸಂಗ್ರಹವಾಗಿದೆ. ೬ ಟಿಎಂಸಿ ನೀರು ಸಂಗ್ರಹ ಸಾಮರ್ಥ್ಯೆದ ಹಿಪ್ಪರಗಿ ಬ್ಯಾರೇಜ್‌ಗೆ ಸೋಮವಾರ ಸಂಜೆ ವೇಳೆ ೫೮,೨೦೦ ಕ್ಯೂಸೆಕ್ಸ್ ಒಳಹರಿವು ಇದ್ದು, ೫೪೬೦೦ ಕ್ಯೂಸೆಕ್ಸ್ನಷ್ಟು ಹೊರಬಿಡಲಾಗುತ್ತಿದೆ.

ಇದರಿಂದ ಕಳೆಭಾಗದಲ್ಲಿ ಬರಿದಾಗಿದ್ದ ಚಿಕ್ಕಪಡಸಲಗಿಯ ಶ್ರಮಬಿಂದು ಸಾಗರಕ್ಕೂ ಜೀವಜಲ ಮೈದುಂಬಿಕೊAಡು ಹರಿದು ಬಂದು ಆಲಮಟ್ಟಿ ಜಲಾಶಯದ ಕಡೆಗೆ ಹೊರಟಿದೆ. ಜೊತೆಗೆ ಮಹಾರಾಷ್ಟçದ ಕೃಷ್ಣಾ ನದಿಯ ಜಲಾಯನ ಪ್ರದೇಶದಲ್ಲೂ ಮಳೆ ಆರ್ಭಟ ಜೋರಾಗಿರುವುದರಿಂದ ಇನ್ನು ಹೆಚ್ಚಿನ ಪ್ರಮಾಣದಲ್ಲಿ ನೀರು ಹರಿದು ಬರುವ ಸಾಧ್ಯತೆ ನಿಶ್ಚಳವಾಗಿದ್ದು, ಜಿಲ್ಲೆಯ ಕೃಷ್ಣಾ ನದಿ ಅವಲಂಬಿತ ಪ್ರದೇಶದ ಕುಡಿವ ನೀರಿನ ಸಮಸ್ಯೆ ತಗ್ಗಿದಂತಾಗಿದೆ.

ಘಟಪ್ರಭಾಗೂ ಹರಿದು ಬಂದ ನೀರು :

ಹಾಗೆಯೇ ಘಟಪ್ರಭಾ ನದಿ ವ್ಯಾಪ್ತಿಯಲ್ಲೂ ಉತ್ತಮ ಮಳೆ ಆಗುತ್ತಿರುವುದರಿಂದ ಹಿಡಕಲ್ ಜಲಾಶಯಕ್ಕೆ ನೀರಿನ ಹರಿವು ಹೆಚ್ಚಿದ್ದು, ಜಿಲ್ಲೆಯಲ್ಲೂ ಸಹ ಘಟಪ್ರಭಾ ನದಿಗೆ ಹೆಚ್ಚಿನ ನೀರು ಬರತೊಡಗಿದೆ. ಮುಧೋಳದ ಸಿದ್ಧೇಶ್ವರ ಮಿನಿ ಬ್ಯಾರೇಜ್ ತುಂಬಿಕೊAಡು ಹರಿಯುತ್ತಿದೆ. ಅಲ್ಲಿಯೂ ಸಹ ಜು. ೧೫ ರ ವರೆಗೆ ಮಾತ್ರ ಕುಡಿವ ನೀರಿನ ವ್ಯವಸ್ಥೆ ಇದ್ದು, ಆತಂಕ ಮೂಡಿಸಿತ್ತು. ಈಗ ಅದು ಸಹ ಮೈದುಂಬಿಕೊಳ್ಳುತ್ತಿರುವುದರಿAದ ಘಟಪ್ರಭಾ ವ್ಯಾಪ್ತಿಯ ಜನಜಾನುವಾರುಗಳ ಕುಡಿವ ನೀರಿನ ಸಮಸ್ಯೆ ಸದ್ಯ ದೂರವಾದಂತೆ ಕಾಣಿಸುತ್ತಿದೆ.