ಮೆಟ್ರೋ ನಿಲ್ದಾಣಗಳಲ್ಲಿ ಪ್ರಯಾಣಿಕರಿಗೆ ಜಾಗೃತಿ; ಸರತಿ ಸಾಲು ಪಾಲಿಸಲು ಸೂಚನೆ

ಬೆಂಗಳೂರು: ನಮ್ಮ ಮೆಟ್ರೋ ಜಾಲ ವಿಸ್ತರಿಸುತ್ತಿದ್ದು, ದಿನದಿಂದ ದಿನಕ್ಕೆ ಪ್ರಯಾಣಿಕರ ಸಂಖ್ಯೆ ಏರುತ್ತಲೇ ಇದೆ. ಇದು ಸಂತಸದ ಸಂಗತಿಯಾದರೂ ನಿಲ್ದಾಣದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಭದ್ರತಾ ಸಿಬ್ಬಂದಿಗೆ ಸವಾಲಾಗಿ ಪರಿಣಮಿಸಿದೆ.

ಮೆಟ್ರೋ ನಿಲ್ದಾಣಗಳಲ್ಲಿ ಭದ್ರತಾ ನಿಯಮಗಳನ್ನು ಉಲ್ಲಂಘಿಸುತ್ತಿರುವವರ ಸಂಖ್ಯೆ ಇತ್ತೀಚೆಗೆ ಹೆಚ್ಚಿದೆ. ಪ್ರಯಾಣಿಕರ ವರ್ತನೆಗೆ ಕಡಿವಾಣ ಹಾಕುವ ನಿಟ್ಟಿನಲ್ಲಿ ಭದ್ರತಾ ಸಿಬ್ಬಂದಿ ಸಾಕಷ್ಟು ಶ್ರಮಿಸುತ್ತಿದ್ದಾರೆ. ಇವರೊಂದಿಗೆ ಗೃಹರಕ್ಷಕ ದಳ ಸಿಬ್ಬಂದಿಯೂ ಸಾಥ್​ ನೀಡಲಿದೆ.

ಇದನ್ನೂ ಓದಿ: ದಶಕಗಳ ಕಾಲ ಯುಪಿಎ ಸೃಷ್ಟಿಸಿದ್ದ ಪ್ರತಿ ಬಿಕ್ಕಟ್ಟು ಈಗ ಸುಧಾರಣೆ ಕಾಣುತ್ತಿದೆ: ನಿರ್ಮಲಾ ಸೀತಾರಾಮನ್​

ನಿಲ್ದಾಣಗಳಲ್ಲಿ ಮೊಬೈಲ್​ ನೋಡುತ್ತ ಜೋರಾಗಿ ಹಾಡು ಕೇಳುತ್ತ ಬೇರೆಯವರಿಗೆ ಕಿರಿಕಿರಿ ಉಂಟುಮಾಡುತ್ತಿರುವವರಿಗೆ ಜಾಗೃತಿ ಮೂಡಿಸಲು ಬಿಎಂಆರ್​ಸಿಎಲ್​ ಕಾರ್ಯಕ್ರಮ ಹಮ್ಮಿಕೊಂಡಿದೆ. ಪ್ರಯಾಣದ ವೇಳೆಯಲ್ಲೂ ಇಯರ್​ಫೋನ್​ ಬಳಸಿ ಎಂದು ಗೃಹರಕ್ಷಕ ಸಿಬ್ಬಂದಿಗಳು ಜನರಲ್ಲಿ ಅರಿವು ಮೂಡಿಸಿದ್ದಾರೆ.

ಸರತಿ ಸಾಲಿನಲ್ಲಿ ನಿಲ್ಲಿ

ಪ್ರಯಾಣಿಕರ ಸಂಖ್ಯೆ ಹೆಚ್ಚಳದಿಂದ ನಿಲ್ದಾಣಗಳಲ್ಲಿ ದಟ್ಟಣೆಯಾಗುತ್ತಿದೆ. ರೈಲು ಫ್ಲಾಟ್​ಫಾರ್ಮ್​ ಸನಿಹಕ್ಕೆ ಬರುತ್ತಿದ್ದಂತೆ, ಒಳಹೋಗುವ ಧಾವಂತಕ್ಕೆ ಪ್ರಯಾಣಿಕರು ಬಾಗಿಲಿನ ಬಳಿ ಗುಂಪುಗೂಡುತ್ತಾರೆ. ಈ ವೇಳೆ ಸರತಿ ಸಾಲು ಚೆಲ್ಲಾಪಿಲ್ಲಿಯಾಗಿಬಿಡುತ್ತದೆ. ಇಳಿಯುವವರಿಗೆ ಇದರಿಂದ ತೊಂದರೆ ಉಂಟಾಗುತ್ತದೆ. ಈ ಸಮಸ್ಯೆಯನ್ನು ಬಗೆಹರಿಸಲು ಸರಿಯಾದ ಸರತಿ ಸಾಲಿನ ವ್ಯವಸ್ಥೆ ಹಾಗೂ ಬೋರ್ಡಿಂಗ್​ ಪ್ರೋಟೋಕಾಲ್​ ಅನುಸರಿಸುವಂತೆ ಸೂಚನೆ ನೀಡಿದೆ.

ನಿತ್ಯ 6 ಲಕ್ಷ ಪ್ರಯಾಣಿಕರು

ಮೆಟ್ರೋ ಬಳಸುತ್ತಿರುವವರ ಸಂಖ್ಯೆಯಲ್ಲಿ ಏರಿಕೆಯಾಗುತ್ತಿದೆ. ಕಳೆದ ಜನವರಿಗೆ ಹೋಲಿಸಿದರೆ ಶೇ.16 ಪ್ರಯಾಣಿಕರ ಸಂಖ್ಯೆ ಹೆಚ್ಚಿದೆ. ಕಳೆದ ಜುಲೈನಲ್ಲಿ 17 ದಿನ ನಿರಂತರವಾಗಿ 6.1 ಲಕ್ಷ ಮಂದಿ ಪ್ರಯಾಣಿಸಿರುವುದು ಹೊಸ ದಾಖಲೆಯಾಗಿದೆ.

https://www.vijayavani.net/namma-metro-train-services-on-bengalurus-purple-line-to-be-interrupted