ಓಟಕ್ಕು ಸೈ, ಓದಲಿಕ್ಕು ಜೈ ಈ ಶಿವಾನಿ ರೈ

ತುಮಕೂರು: ಜಿಲ್ಲೆಯ ಅತ್ಯುತ್ತಮ ಅಥ್ಲೀಟ್​ ಎನಿಸಿರುವ ಶಿವಾನಿ ಎಸ್​ ರೈ ಈ ಬಾರಿಯ ದ್ವೀತಿಯ ಪಿಯು ಪರೀಕ್ಷೆ ಯಲ್ಲು ಶ್ರೇಷ್ಠ ಸಾಧನೆ ತೋರಿದ್ದಾರೆ. ವಿದ್ಯಾನಿಧಿ ಪಿಯು ಕಾಲೇಜಿನ ಶಿವಾನಿ ಓದಿನ ಜತೆಗೆ ಅಥ್ಲೆಟಿಕ್ಸ್​ನಲ್ಲಿ ಉತ್ತಮ ನಿರ್ವಹಣೆ ತೋರುತ್ತಾ ಬಂದಿರುವುದು ವಿಶೇಷವೆನಿಸಿದೆ.

ಜಿಲ್ಲಾಮಟ್ಟದ 100, 200 ಮೀ., ಓಟದಲ್ಲಿ ಪ್ರಾಥಮಿಕ, ಪ್ರೌಢಶಾಲೆಯಿಂದಲು ಪ್ರಥಮ ಸ್ಥಾನ ಗೆಲ್ಲುತ್ತಾ ಬಂದಿದ್ದು ಪಿಯು ರಾಜ್ಯಮಟ್ಟದ ಅಥ್ಲೆಟಿಕ್​ ಕ್ರೀಡಾಕೂಟದಲ್ಲು ಉತ್ತಮ ನಿರ್ವಹಣೆ ತೋರಿದ್ದರು. ಪ್ರತಿನಿತ್ಯ ಓದಿಗೆ ಪ್ರಾಮುಖ್ಯತೆ ಕೊಟ್ಟಂತೆ ಒಂದೆರಡು ಗಂಟೆ ಬೆಳಗ್ಗೆ, ಸಂಜೆ ಕ್ರೀಡಾಂಗಣದಲ್ಲಿ ಅಥ್ಲೆಟಿಕ್​ ಅಭ್ಯಾಸದಲ್ಲಿ ತೊಡಗುತ್ತಿದ್ದ ಶಿವಾನಿಗೆ ರಾಜ್ಯತಂಡ ಪ್ರತಿನಿಧಿಸುವ ಕನಸಿದೆ.

ಓದಿನಲ್ಲು ಎಂದೂ ಶಿವಾನಿ ಹಿಂದೆಬಿದ್ದಿಲ್ಲ. ಓಟದಂತೆ ಓದಿನಲ್ಲು ಸದಾ ಮುಂದೆ. ವಿಜ್ಞಾನ ವಿಭಾಗದಲ್ಲಿ ಜಿಲ್ಲೆಗೆ ದ್ವೀತಿಯ ಸ್ಥಾನ ಪಡೆದ ಶಿವಾನಿ ಪಿಸಿಎಂಬಿಯಲ್ಲಿ 398/400 ಅಂಕ ಪಡೆದಿರುವುದು ಗಮನಾರ್ಹ ಸಾಧನೆ ಎನಿಸಿದೆ. ಭೌತಶಾಸ್ತ್ರ-98, ರಸಾಯನಶಾಸ್ತ್ರ -100, ಗಣಿತ-100, ಜೀವಶಾಸ್ತ್ರ-100, ಕನ್ನಡ -98, ಇಂಗ್ಲೀಷ್​-97 ಅಂಕಗಳಿಸಿದ್ದು ಒಟ್ಟಾರೆ 593 ಅಂಕಗಳಿಸಿ ಜಿಲ್ಲೆಗೆ ದ್ವೀತಿಯ ಟಾಪರ್​ ಎನಿಸಿದ್ದಾರೆ.

ಕ್ರೀಡೆ ಜತೆಗೆ ಶೈಕ್ಷಣಿಕವಾಗಿಯು ಉತ್ತಮ ನಿರ್ವಹಣೆ ತೋರಬಹುದು. ಮಾನಸಿಕ, ದೈಹಿಕ ಸದೃಢತೆ ಜತೆಗೆ ಏಕಾಗ್ರತೆಗೆ ಕ್ರೀಡೆ ಸಹಕಾರಿ ಎನಿಸಿದೆ. ಈ ನಿಟ್ಟಿನಲ್ಲಿ ಶಿವಾನಿ ಸಾಧನೆ ಅದ್ವೀತಿಯ ಎನ್ನುತ್ತಾರೆ ವಿದ್ಯಾವಾಹಿನಿ ಸಮೂಹ ಸಂಸ್ಥೆ ಕಾರ್ಯದರ್ಶಿ ಎನ್​.ಬಿ.ಪ್ರದಿಪ್​ ಕುಮಾರ್​.