ಚಿಕ್ಕಬಳ್ಳಾಪುರ : ಜಗತ್ತಿನಲ್ಲಿ ಬಡ ಜನ ವಿರೋಧಿ ನೀತಿಯ ನಾಯಕರು, ಸರ್ಕಾರಗಳಿಗೆ ಉಳಿಗಾಲವಿಲ್ಲ ಎಂಬ ಸಂದೇಶಾತ್ಮಕ ಬೆಳವಣಿಗೆಗಳು ಸಂಭವಿಸುತ್ತಿವೆ ಎಂದು ಎಸ್ಎ್ಐ ರಾಷ್ಟ್ರೀಯ ಅಧ್ಯಕ್ಷ ವಿ.ಪಿ.ಸಾನು ಸಂತಸ ವ್ಯಕ್ತಪಡಿಸಿದರು.
ನಗರದ ಕೆಇಬಿ ವಸತಿ ಸಮುದಾಯ ಭವನದ ಎದುರು ಗುರುವಾರ ಹಮ್ಮಿಕೊಂಡಿದ್ದ ಸಂಘಟನೆಯ ರಾಜ್ಯಮಟ್ಟದ ಸಮ್ಮೇಳನ ಉದ್ದೇಶಿಸಿ ಮಾತನಾಡಿದರು.
ಹಿಂದಿನ ಸರ್ಕಾರಗಳ ದುರಾಡಳಿತ, ಅರಾಜಕತೆಗೆ ಶ್ರೀಲಂಕಾದಲ್ಲಿ ಎಡಪಂಥೀಯ, ಸಮಾಜವಾದಿ ನಾಯಕ ಅಧ್ಯಕ್ಷರಾಗಿದ್ದಾರೆ. ್ರಾನ್ಸ್ ಸೇರಿ ಹಲವು ದೇಶಗಳಲ್ಲಿ ಜನರು ಭ್ರಷ್ಟಾಚಾರ, ಬಡಜನ ವಿರೋಧಿ ನೀತಿಗಳ ನಾಯಕರನ್ನು ಅಧಿಕಾರದಿಂದ ಕೆಳಗಿಸುವ ಕೆಲಸ ಮಾಡುತ್ತಿದ್ದಾರೆ. ಹಾಗೆಯೇ ಭಾರತದಲ್ಲೂ ಕ್ರಾಂತಿಕಾರಿ ಬದಲಾವಣೆ ಸಂಭವಿಸಲಿದೆ ಎಂದು ಭವಿಷ್ಯ ನುಡಿದರು.
ಜಾನಪದ ಅಕಾಡೆಮಿ ಅಧ್ಯಕ್ಷ ಗೊಲ್ಲಹಳ್ಳಿ ಶಿವಪ್ರಸಾದ್ ಮಾತನಾಡಿ, ಭಾರತವು ನಾಜಿ ಬೀಜಗಳನ್ನು ಬಿತ್ತಿ ಬೆಳೆಯುವ ಮಣ್ಣು ಅಲ್ಲ. ನಿರಂತರವಾಗಿ ಧರ್ಮ ರಾಜಕಾರಣ ನಡೆಯುವುದಿಲ್ಲ. ಸುಳ್ಳುಗಳಲ್ಲಿ ಕಟ್ಟಿದ ಸೌಧಗಳು ನಿಜವಾದ ದಾಳಿಗೆ ಉಳಿಯುವುದಿಲ್ಲ. ಇಲ್ಲಿ ಸಾಧು ಸಂತರು, ಸಮಾಜ ಸುಧಾರಕರು ಸೇರಿ ಅನೇಕ ಮಹನೀಯರು ಏಕತೆ ಮತ್ತು ಮಾನವೀಯತೆಯ ಮೌಲ್ಯಾಧಾರಿತ ತತ್ವಗಳನ್ನು ಸಾರಿ ಹೋಗಿದ್ದಾರೆ ಎಂದರು.
ಶಿಕ್ಷಣ, ರಾಜಕಾರಣ ಹಣ ಇದ್ದವರಿಗೆ ಎಂಬ ವಾತಾವರಣವು ನಿರ್ಮಾಣವಾಗುತ್ತಿದೆ. ಕಳ್ಳರು, ಅತ್ಯಾಚಾರಿಗಳು, ಭ್ರಷ್ಟರು ಮತ್ತು ಪ್ರಭಾವಿಗಳು ಸಂಸತ್ ಪ್ರವೇಶಿಸುತ್ತಿದ್ದಾರೆ. ಧರ್ಮದ ಹೆಸರಿನಲ್ಲಿ ಜನರನ್ನು ವಿಭಜಿಸಲಾಗುತ್ತಿದೆ. ಬಡವರನ್ನು ಕಡೆಗಣಿಸಿ, ಶ್ರೀಮಂತರನ್ನು ಅಭಿವೃದ್ಧಿಪಡಿಸುವುದೇ ಆಡಳಿತ ನೀತಿಗಳಾಗಿವೆ. ಇವುಗಳನ್ನು ಪ್ರಶ್ನಿಸಿದಾಗ ದೇಶದ್ರೋಹಿ ಎಂಬಂತೆ ಬಿಂಬಿಸಲಾಗುತ್ತಿದೆ ಎಂದು ಬೇಸರಿಸಿದರು.
ಕೆಂಪು ಮತ್ತು ನೀಲಿ ಕ್ರಾಂತಿಯು ಒಂದಾಗಿ ಹೋರಾಟ ನಡೆಸಿದಾಗ ನಿಜವಾದ ಆದರ್ಶ ಸಮಾಜವನ್ನು ಕಾಣಬಹುದು. ಯುವ ಜನತೆ ಉನ್ನತ ಶಿಕ್ಷಣದ ಅಧ್ಯಯನದ ಮೂಲಕ ವಾಸ್ತವ ವಿವೇಕವನ್ನು ಬೆಳೆಸಿಕೊಳ್ಳಬೇಕು ಎಂದರು.
ಎಸ್ಎ್ಐನ ರಾಷ್ಟ್ರೀಯ ಉಪಾಧ್ಯಕ್ಷ ನಿತೀಶ್ ನಾರಾಯಣ್, ಜಂಟಿ ಕಾರ್ಯದರ್ಶಿ ಆದರ್ಶ್, ರಾಜ್ಯಾಧ್ಯಕ್ಷ ಅಂಬರೀಷ್ ಕಡಗದ್, ಕಾರ್ಯದರ್ಶಿ ಭೀಮನಗೌಡ, ಮಹಿಳಾ ಸಂಚಾಲಕ ಸುಜಾತ, ಜಿಲ್ಲಾಧ್ಯಕ್ಷ ಸೋಮಶೇಖರ್, ಸಮ್ಮೇಳನದ ಸ್ವಾಗತ ಸಮಿತಿ ಗೌರವಾಧ್ಯಕ್ಷ ಸರ್ದಾರ್ ಚಾಂದಾಪಾಷಾ, ಅಧ್ಯಕ್ಷ ಡಾ ಅನಿಲ್ ಕುಮಾರ್, ಕಾರ್ಯದರ್ಶಿ ಬಿ.ಎನ್.ಮುನಿಕೃಷ್ಣಪ್ಪ ಮತ್ತಿತರರು ಇದ್ದರು.
