ಹೈನೋದ್ಯಮದಿಂದ ಬದುಕು ವೈನು

*ಎಲ್ಲರಿಗೂ ಮಾದರಿಯಾದ ರಾಮನಹಳ್ಳಿಯ ರೈತ ಸುರೇಶ್​

* ನಿತ್ಯ 125 ಲೀಟರ್​ ಹಾಲು ಉತ್ಪಾದನೆ

*ವಾರ್ಷಿಕ 12 ಲಕ್ಷ ರೂ. ಆದಾಯ

ಚೇತನ್​ ಚಕ್ಕೆರೆ ಬಿಡದಿ

ರೈತನಿಗೆ ಕೃಷಿಯೊಂದಿಗೆ ಹೈನೋದ್ಯಮವೂ ವರದಾನವಾಗಿದ್ದು, ಹೈನುಗಾರಿಕೆಯನ್ನು ಪೂರ್ಣ ಪ್ರಮಾಣದಲ್ಲಿ ಮಾಡಿದರೆ ಕೈತುಂಬ ಹಣ ಗಳಿಸಬಹುದು. ಇದಕ್ಕೆ ನಿದರ್ಶನವಾಗಿದ್ದಾರೆ ರಾಮನಹಳ್ಳಿಯ ರೈತ ಸುರೇಶ್​.

ಹೌದು. ರಾಮನಹಳ್ಳಿಯ ರೈತ ಸುರೇಶ್​ ಅವರು ಹೈನುಗಾರಿಕೆಯಿಂದಲೇ ಬದುಕನ್ನು ಬಂಗಾರವಾಗಿಸಿಕೊಂಡಿದ್ದಾರೆ. ವೈಜ್ಣಾನಿಕವಾಗಿ ಹೈನುಗಾರಿಕೆ ಮಾಡಿ ಲಾಭ ಕಂಡುಕೊಂಡು, ಪ್ರತಿ ದಿನ ನೂರಾರು ಲೀಟರ್​ ಹಾಲು ಉತ್ಪಾದಿಸುತ್ತಿದ್ದಾರೆ.

ಕೃಷಿ ಕ್ಷೇತ್ರದಲ್ಲಿ ರೈತರು ದೀರ್ ಆದಾಯದ ಮೇಲೆ ಅವಲಂಬಿಸಿರುತ್ತಾರೆ. ಅಂತಹ ಹೈನುಗಾರಿಕೆಯನ್ನು ಸರಿಯಾದ ಉಪಕ್ರಮದ ಮೂಲಕ ಕೈಗೊಂಡರೆ ಪೂರ್ಣ ಪ್ರಮಾಣದ ಉದ್ಯೋಗವಾಗಿಸಿಕೊಂಡು ಸಾಕಷ್ಟು ಆದಾಯ ಪಡೆಯಬಹುದು ಎಂಬುದನ್ನು ಸುರೇಶ್​ ಸಾಧಿಸಿ ತೋರಿಸಿದ್ದಾರೆ.

10ಕ್ಕೂ ಹೆಚ್ಚು ತಳಿಗಳ ಹಸು:

ಸುರೇಶ್​ 8 ಎಕರೆ ಜಮೀನಿನಲ್ಲಿ ಕೃಷಿ ಮಾಡುತ್ತಿದ್ದಾರೆ. ಇದರ ಜತೆಗೆ ಹೈನುಗಾರಿಕೆಯನ್ನೂ ದೊಡ್ಡ ಮಟ್ಟದಲ್ಲಿ ಕೈಗೊಂಡಿರುವ ಅವರು, 10ಕ್ಕೂ ಹೆಚ್ಚು ವಿವಿಧ ತಳಿಗಳ ಹಸುಗಳನ್ನು ಸಾಕಿದ್ದು, ಪ್ರತಿ ದಿನಕ್ಕೆ ಎರಡು ಪಾಳಿಯಂತೆ 125 ಲೀಟರ್​ ಹಾಲು ಹಾಕುತ್ತಿದ್ದು, ವಾರ್ಷಿಕ 10-12 ಲಕ್ಷ ರೂ. ಆದಾಯ ಕಾಣುತ್ತಿದ್ದಾರೆ.

ವಿಶೇಷ ಎಂದರೆ, ಹೈನುಗಾರಿಕೆಯನ್ನು ವೈಜ್ಱಆಬು ನಿಕವಾಗಿ ಮಾಡುತ್ತಿದ್ದಾರೆ. ದೊಡ್ಡ ಶೆಡ್​ ನಿರ್ಮಾಣ ಮಾಡಿಕೊಂಡಿದ್ದು, ಹಸುಗಳಿಗೆ ನೆರವಾಗುವ ನಿಟ್ಟಿನಲ್ಲಿ ಮ್ಯಾಟ್​ ಹಾಕಿದ್ದಾರೆ. ಬೆಳಗ್ಗೆ, ಸಂಜೆ ಹಾಲು ಕರೆಯಲು ಮಿಷನ್​ ಬಳಸುತ್ತಿದ್ದಾರೆ. ಇದರಿಂದಾಗಿ ಕಾರ್ಮಿಕರ ಅವಲಂಬನೆ ಕಡಿಮೆ ಇದೆ.

ಕರು ಸಾಕಣೆಕೆಗೆ ಒತ್ತು:

ಹಸುಗಳ ಸಾಕಣೆ ಜತೆಗೆ ಉತ್ತಮ ತಳಿಗಳ ಕರುಗಳನ್ನೂ ಸಾಕಣೆ ಮಾಡುತ್ತಿದ್ದಾರೆ. ಬೇರೆ ಕಡೆಗಳಿಂದ ಉತ್ತಮ ತಳಿಗಳ ಕರುಗಳನ್ನು ತಂದು ಸಾಕುವ ಸುರೇಶ್​, ಉತ್ತಮ ಬೆಲೆಗೆ ಮಾರಾಟ ಮಾಡಿ, ಅದರಿಂದಲೂ ಲಾಭ ಕಾಣುತ್ತ್ತಿದ್ದಾರೆ. ಅಂತೆಯೇ, ಹಸು ಸಾಕಣೆಗೆ ಮೇವು ಅತಿ ಮುಖ್ಯ. ಹಾಗಾಗಿ ಸುರೇಶ್​, ಬೇಬಿ ಕಾರ್ನ್​ ಜೋಳವನ್ನು ಬೆಳೆಯುತ್ತಿದ್ದಾರೆ.

ಎಲ್ಲವೂ ಒಂದೇ ಕಡೆ

ಹೈನುಗಾರಿಕೆ ಜತೆಗೆ ಮೇಕೆ ಸಾಕಣೆ ಮಾಡುವುದನ್ನು ಸುರೇಶ್​ ಕರಗತ ಮಾಡಿಕೊಂಡಿದ್ದಾರೆ. ಮಾರುಕಟ್ಟೆಯಲ್ಲಿ ಮಾಂಸಕ್ಕೆ ಉತ್ತಮ ಬೇಡಿಕೆ ಇದೆ. ಇದನ್ನರಿತಿರುವ ರೈತ, 50ಕ್ಕೂ ಹೆಚ್ಚು ಮೇಕೆ ಸಾಕಣೆ ಮಾಡಿದ್ದು, ಮೇಕೆಗಳಿಗೂ ಬೇಬಿ ಕಾರ್ನ್​ ಜೋಳವನ್ನು ಬಳಸುತ್ತಿದ್ದಾರೆ. ಚಾಪರ್​ ಕಟರ್​ ಮೂಲಕ ಕಟ್​ ಮಾಡಿ ಮೇಕೆಗಳಿಗೆ ಹಾಕುತ್ತಾರೆ. ದಿನದ ಮೂರು ತಾಸು ಇವುಗಳನ್ನು ಜಮೀನಿಗೆ ಬಿಟ್ಟು ಮೇಯಿಸಿ ತದನಂತರ ಶೆಡ್​ನಲ್ಲಿ ಕೂಡಿ ಹಾಕುತ್ತಾರೆ. ಜತೆಜತೆಗೆ ಜಮೀನಿನಲ್ಲಿ ಭತ್ತ, ರಾಗಿಯನ್ನೂ ಬೆಳೆಯುತ್ತಿದ್ದಾರೆ. ಜಮೀನಿನ ಅಕ್ಕ ಪಕ್ಕದವರ ಜಮೀನುಗಳನ್ನೂ ಗುತ್ತಿಗೆಗೆ ಪಡೆದು ಆ ಜಮೀನಿನಲ್ಲಿ ಬೆಳೆಗಳನ್ನು ಬೆಳೆಯುತ್ತಿದ್ದಾರೆ. ಇತ್ತೀಚೆಗೆ ರಾಗಿ ಬೆಳೆ ಬೆಳೆದು ಕಟಾವು ಮಾಡಿದ್ದಾರೆ. ಈಗ ಸುಮಾರು ಎರಡು ಎಕರೆಯಲ್ಲಿ ಭತ್ತ ನಾಟಿ ಮಾಡಿದ್ದಾರೆ.