ಬಂಕಾಪುರದಲ್ಲಿ ಬೆಳಗದ ಬೀದಿ ದೀಪ

ಬಂಕಾಪುರ: ಪಟ್ಟಣದ ಪುರಸಭೆ ವ್ಯಾಪ್ತಿಯ ಬಹುತೇಕ ಬೀದಿಗಳಲ್ಲಿ ಅಳವಡಿಸಿರುವ ದೀಪಗಳು ಬೆಳಗುತ್ತಿಲ್ಲ. ಇದರಿಂದ ರಾತ್ರಿ ಸಮಯದಲ್ಲಿ ಪಾದಚಾರಿಗಳು, ವಾಹನ ಸವಾರರಿಗೆ ತೊಂದರೆಯುಂಟಾಗುತ್ತಿದೆ.

ಪಟ್ಟಣದ ಮುಂಡಗೋಡ ಕ್ರಾಸ್​ನಿಂದ ನೀಲಕಂಠೇಶ್ವರ ದೇವಸ್ಥಾನದವರೆಗೆ ದ್ವಿಪಥ ರಸ್ತೆಯ ಮಧ್ಯಭಾಗದಲ್ಲಿ ಅಳವಡಿಸಿರುವ ವಿದ್ಯುತ್ ದೀಪಗಳು, ರೇಣುಕಾ ಚಿತ್ರಮಂದಿರದ ಕ್ರಾಸ್​ನಿಂದ ಹಾವೇರಿ ಮುಖ್ಯರಸ್ತೆ, ಬಸ್ ನಿಲ್ದಾಣದಿಂದ ಪುರಸಭೆ, ಆಸಾರ್ ಸರ್ಕಲ್​ನಿಂದ ಕೊಟ್ಟಿಗೇರಿ, ಅಂಕದಖಣ, ರಜಪೂತ್ ಗಲ್ಲಿ, ಬ್ರಾಹ್ಮಣ ಗಲ್ಲಿ, ಸುಂಕದಕೇರಿ, ಮಂಡಲ್ ಮೊಹಲ್ಲಾಗಳಲ್ಲಿ ಅಳವಡಿಸಿರುವ ವಿದ್ಯುತ್ ದೀಪಗಳು ಕೆಟ್ಟು ಹೋಗಿ ನಾಲ್ಕೈದು ತಿಂಗಳು ಕಳೆದಿವೆ. ಪುರಸಭೆ ಅಧಿಕಾರಿಗಳ ನಿರ್ಲಕ್ಷ್ಯಂದ ಜನರು ಕತ್ತಲಲ್ಲಿ ಓಡಾಡುವ ಪರಿಸ್ಥಿತಿ ನಿರ್ವಣವಾಗಿದೆ.

ಕೆಲ ರಸ್ತೆ ಮಾರ್ಗಗಳು ಕಿರಿದಾಗಿದ್ದರಿಂದ ರಾತ್ರಿ ವೇಳೆ ಹಾಗೂ ಬೆಳಗ್ಗೆ ವಾಯುವಿಹಾರ ಮಾಡುವವರು ಹೆದರುತ್ತಲೇ ಸಂಚರಿಸುವಂತಾಗಿದೆ. ಬೀದಿ ನಾಯಿಗಳ ಹಾವಳಿಯಿಂದಾಗಿ ರಾತ್ರಿ ಹೊತ್ತು ಸಂಚರಿಸಲು ಭಯವಾಗುತ್ತಿದೆ ಎಂದು ಸಾರ್ವಜನಿಕರು ಅಳಲು ತೋಡಿಕೊಂಡಿದ್ದಾರೆ.

ಸಂಜೆ ಟ್ಯೂಷನ್​ಗೆ ಹೋಗುವ ವಿದ್ಯಾರ್ಥಿನಿಗಳು ಭಯದಲ್ಲಿಯೇ ಸಂಚರಿಸುವಂತಾಗಿದೆ. ಪರ ಊರಿನಿಂದ ಪಟ್ಟಣಕ್ಕೆ ಬಂದವರು ಬೀದಿ ನಾಯಿಗಳ ಹಾವಳಿಗೆ ರಾತ್ರಿ ಹೊತ್ತು ಮುಂದಕ್ಕೆ ಹೋಗಲಾರದೇ ಪರದಾಡುವಂತಾಗಿದೆ. ಹಲವರು ನಾಯಿ ದಾಳಿಯಿಂದ ಗಾಯಗೊಂಡು ಆಸ್ಪತ್ರೆ ಸೇರಿ ಚಿಕಿತ್ಸೆ ಪಡೆದುಕೊಂಡ ಘಟನೆಗಳೂ ನಡೆದಿವೆ. ಆದ್ದರಿಂದ ಪುರಸಭೆ ಅಧಿಕಾರಿಗಳು ಕೂಡಲೇ ವಿದ್ಯುತ್ ದೀಪ ಸರಿಪಡಿಸಿ ಸಂಚಾರಕ್ಕೆ ಅನುಕೂಲ ಕಲ್ಪಿಸಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.