ಡೆಲ್ಟಾ ಎಲೆಕ್ಟ್ರಾನಿಕ್ಸ್​-ಬಿಎಂಆರ್​ಸಿಎಲ್​ ನಡುವೆ ಒಪ್ಪಂದ

ಬೆಂಗಳೂರು: ಬೊಮ್ಮಸಂದ್ರ ಮೆಟ್ರೋ ನಿಲ್ದಾಣ ನಿರ್ಮಾಣ ಸಂಬಂಧಪಟ್ಟಂತೆ ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (ಬಿಎಂಆರ್​ಸಿಎಲ್​) ಹಾಗೂ ಡೆಲ್ಟಾ ಎಲೆಕ್ಟ್ರಾನಿಕ್ಸ್​ ಇಂಡಿಯಾ ಪ್ರೈ.ಲಿ. ಪರಸ್ಪರ ಒಪ್ಪಂದ ಮಾಡಿಕೊಂಡಿವೆ.

ಹಂತ-2ರ ಆರ್​.ವಿ. ರಸ್ತೆಯಿಂದ ಬೊಮ್ಮಸಂದ್ರದ ರೀಚ್​-5ರ ಹಳದಿ ಮಾರ್ಗವು ಹೊಸೂರು ರಸ್ತೆಯಲ್ಲಿನ ಸಂಚಾರ ಸಿಕ್ಕು ತಗ್ಗಿಸಲಿದೆ. ವಾಹನ ಮಾಲಿನ್ಯದಿಂದ ಪರಿಸರದ ಪರಿಣಾಮ ಕಡಿಮೆಯಾಗಲಿದೆ. ಇದು ಹಳದಿ ಮಾರ್ಗದಲ್ಲಿ 3ನೇ ಒಪ್ಪಂದವಾಗಿದೆ. ಇನ್​​ಪೋಸಿಸ್​​ ಫೌಂಡೇಷನ್​​​ ಜತೆ ಕೊನಪ್ಪನ ಅಗ್ರಹಾರ ಮೆಟ್ರೋ ನಿಲ್ದಾಣ ಹಾಗೂ ಬಯೋಕಾನ್​ ಫೌಂಡೇಷನ್​​​ ಜತೆ ಹೆಬ್ಬಗೋಡಿ ಮೆಟ್ರೋ ನಿಲ್ದಾಣಗಳ ನಿರ್ಮಾಣಕ್ಕೆ ಈಗಾಗಲೆ ಬಿಎಂಆರ್​ಸಿಎಲ್​ ಒಪ್ಪಂದ ಮಾಡಿಕೊಂಡಿದೆ.

ಹಣಕಾಸು ಕಾರ್ಯ ವಿಧಾನದ ಭಾಗವಾಗಿ ಮೆಟ್ರೋ ನಿಗಮಕ್ಕೆ, ಡೆಲ್ಟಾ ಎಲೆಕ್ಟ್ರಾನಿಕ್ಸ್​ ಇಂಡಿಯಾ ಪ್ರೈ.ಲಿ. 65 ಕೋಟಿ ರೂ. ಪಾವತಿಸಿದೆ. ಸರ್ಕಾರದ ಅನುಮೋದನೆ ಪಡೆದ ನಂತರ 30 ವರ್ಷಗಳ ಅವಧಿಗೆ ಬೊಮ್ಮಸಂದ್ರ ಮೆಟ್ರೋ ನಿಲ್ದಾಣದ ನಾಮಕಾರಣ ಹಕ್ಕು ನೀಡಲಿದೆ. ತೈವಾನೀಸ್​ ಎಲೆಕ್ಟ್ರಾನಿಕ್ಸ್​ ತಯಾರಿಕಾ ಸಂಸ್ಥೆಯ ಅಧೀನದ ಈ ಕಂಪನಿ, ಪರಿಸರ ಸ್ಥಿರತೆಗೆ ಬದ್ಧತೆ ಹೊಂದಿದೆ. ಕಂಪನಿ ಎಂಡಿ ನಿರಂಜನ್​ ನಾಯಕ್​ ಮತ್ತಿತರರಿದ್ದರು.

ಡೆಲ್ಟಾ ಎಲೆಕ್ಟ್ರಾನಿಕ್ಸ್​ ಇಂಡಿಯಾ ಪ್ರೈ.ಲಿ. ಸುಸ್ಥಿರ ನಗರಾಭಿವೃದ್ಧಿ ಮತ್ತು ನಗರ ಸಾರಿಗೆಗೆ ತಮ್ಮ ಬೆಂಬಲದೊಂದಿಗೆ ಮುಂದೆ ಬಂದಿರುವುದಕ್ಕೆ ಸಂತಸವಾಗಿದೆ. ಮೆಟ್ರೋ ಕಾರಿಡಾರ್​ಗಳ ಉದ್ದಕ್ಕೂ ನಗರದ ಮೆಟ್ರೋ ಮೂಲಸೌಕರ್ಯ ಅಭಿವೃದ್ಧಿಪಡಿಸಲು ಇತರ ಕಾಪೋರ್ರೇಟ್​ ಸಂಸ್ಥೆಗಳು ಕೈಜೋಡಿಸುವಂತಾಗಲಿ.

| ಎಂ.ಮಹೇಶ್ವರರಾವ್​, ಬಿಎಂಆರ್​ಸಿಎಲ್​ ವ್ಯವಸ್ಥಾಪಕ ನಿರ್ದೇಶಕ.

https://www.vijayavani.net/impact-of-atmospheric-pressure-drop-yellow-alert-in-10-districts-on-the-13th