ಆದಿಶಕ್ತಿ ದೇವಿಯ ತೆಪ್ಪೋತ್ಸವ

ಬೆಂಗಳೂರು: ಶ್ರೀ ಧರ್ಮರಾಯಸ್ವಾಮಿ ದೇವಾಲಯದ ವತಿಯಿಂದ ಬೆಂಗಳೂರಿನ ಸಂಪಂಗಿರಾಮನಗರ ಹಸಿ ಕರಗ ಮಂಟಪದ ಕಲ್ಯಾಣಿಯಲ್ಲಿ ಶನಿವಾರ (ಆ.31) ಸಂಜೆ 6 ಗಂಟೆಗೆ ಏಳು ಸುತ್ತಿನ ಕೋಟೆ ಶ್ರೀ ಆದಿಶಕ್ತಿ ದೇವಿ ಹಾಗೂ ಶ್ರೀ ಅರ್ಜುನ ದ್ರೌಪದಿ ಸ್ವಾಮಿ ಸಹಿತ ಶ್ರೀ ಮುತ್ಯಾಲಮ್ಮ ದೇವಿಯ ತೆಪ್ಪೋತ್ಸವ ಜರುಗಲಿದೆ.

ಅಂದು ಬೆಳಗ್ಗೆಯಿಂದಲೇ ಶ್ರೀ ಧರ್ಮರಾಯಸ್ವಾಮಿ ದೇಗುಲದಲ್ಲಿ ವಿಶೇಷ ಅಲಂಕಾರ ಹಾಗೂ ಪೂಜೆ ನಡೆಯಲಿದ್ದು, ಮಧ್ಯಾಹ್ನ 3 ಗಂಟೆಗೆ ದೇವಾಲಯದಿಂದ ಕಲ್ಯಾಣಿವರೆಗೂ ದೇವರುಗಳ ಮೆರವಣಿಗೆ ಸಾಗಲಿದೆ. ಸಂಜೆ ವಿಶೇಷ ಅಲಂಕಾರದೊಂದಿಗೆ ಎಲ್ಲ ದೇವರುಗಳ ತೆಪ್ಪೋತ್ಸವ ನಡೆಯಲಿದೆ. ಈ ವೇಳೆ ಪಾಲ್ಗೊಳ್ಳುವ ಎಲ್ಲ ಮಹಿಳೆಯರಿಗೆ ಸೀರೆ, ಅರಿಶಿನ ಕುಂಕುಮ ಸಹಿತ ಬಾಗಿನ ನೀಡಲಾಗುವುದು.

ಭಕ್ತರಿಗೆ ಅನ್ನದಾಸೋಹ ವ್ಯವಸ್ಥೆ ಸಹ ಏರ್ಪಡಿಸಲಾಗಿದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡು ತೆಪ್ಪೋತ್ಸವವನ್ನು ಯಶಸ್ವಿಗೊಳಿಸಿಕೊಡುವಂತೆ ಎಂದು ದೇವಾಲಯದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಕೆ. ಸತೀಶ್ ಕೋರಿದ್ದಾರೆ.