ರಾಷ್ಟ್ರೀಯ ಹೆದ್ದಾರಿ ಕಲ್ಲಾಪುವಿನಲ್ಲಿ ಈಗಾಗಲೇ ಸಾಕಷ್ಟು ಅಪಘಾತಗಳು ಸಂಭವಿಸಿದ್ದು, ಹಲವು ಮಂದಿ ಬಲಿಯಾಗಿದ್ದಾರೆ. ನಂತೂರಿನಿಂದ ತಲಪಾಡಿವರೆಗೆ ಹೆದ್ದಾರಿ ವಿಸ್ತರಣೆ ಸಂದರ್ಭ ಗುತ್ತಿಗೆ ಕಂಪನಿ ನವಯುಗ ಸರ್ವೀಸ್ ರಸ್ತೆಯನ್ನೇ ನಿರ್ಮಿಸಿಲ್ಲ. ಕೆಲವೊಂದು ಕಡೆಗಳಲ್ಲಿ ಸ್ಥಳೀಯರ ಹೋರಾಟದ ಫಲವಾಗಿ ನೂರಿನ್ನೂರು ಮೀಟರ್ ಸರ್ವೀಸ್ ರಸ್ತೆ ನಿರ್ಮಾಣವಾಗಿದೆ. ಕಲ್ಲಾಪು ಹೆದ್ದಾರಿ ದಿನವಿಡೀ ವಾಹನಗಳಿಂದ ಕೂಡಿದೆ. ಮತ್ತೊಂದೆಡೆ ಖಾಸಗಿ ಮಾರುಕಟ್ಟೆ ನಿರ್ಮಾಣವಾಗಿದೆ. ಇದರಿಂದಾಗಿ ಮುಂಜಾನೆಯೇ ದೂರದ ಜಿಲ್ಲೆಗಳಿಂದ ತರಕಾರಿ, ಹಣ್ಣುಗಳನ್ನು ಹೇರಿಕೊಂಡು ಲಾರಿ, ಟೆಂಪೋಗಳು ಬರುತ್ತಿದ್ದರೆ, ಕಾಸರಗೋಡು, ಮಂಗಳೂರು ಹಾಗೂ ಇತರ ಭಾಗಗಳಿಗೆ ತರಕಾರಿ, ಹಣ್ಣುಗಳನ್ನು ಸಾಗಿಸಲು ವಾಹನಗಳು ಬರುತ್ತಿವೆ. ಸಾಕಷ್ಟು ಕಾರ್ಮಿಕರು ವಾಹನಗಳಲ್ಲಿ ಬರುವುದರಿಂದ ಈ ರಸ್ತೆ ಮುಂಜಾನೆಯೇ ವಾಹನ ನಿಬಿಡವಾಗುತ್ತದೆ. ಇಲ್ಲೇ ರಸ್ತೆಬದಿ ಪೆಟ್ಟಿಗೆ ಅಂಗಡಿಗಳು, ಪೆಟ್ರೋಲ್ ಪಂಪ್, ದಿನಸಿ ಅಂಗಡಿ, ಸಭಾಂಗಣ ಇದ್ದು ವಿರುದ್ಧ ದಿಕ್ಕಿನಲ್ಲಿ ಬರುವ ವಾಹನಗಳಿಗೆ ಕಡಿವಾಣ ಹಾಕಲು ಸಾಧ್ಯವಾಗಿಲ್ಲ.
