ಮುಡಾದಲ್ಲಿ ನಿವೇಶನ ಹಂಚಿಕೆ ದಾಖಲೆ ನಾಪತ್ತೆ! 600 ನಿವೇಶನಕ್ಕೆ ಸಂಬಂಧಿಸಿದ 300 ಪುಟಗಳು ಕಾಣೆ

ಮೈಸೂರು: ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರ ಕಚೇರಿಯಲ್ಲಿ ನಿವೇಶನ ಹಂಚಿಕೆಗೆ ಸಂಬಂಧಿಸಿದ ಕಡತದ ಮಹತ್ವದ ಮಾಹಿತಿ ಇದ್ದ ಪುಟಗಳು ಕಾಣೆಯಾಗಿವೆ. ಈ ಹಿನ್ನೆಲೆಯಲ್ಲಿ ನಾಲ್ಕನೇ ಶನಿವಾರ ಸರ್ಕಾರಿ ರಜೆ ಇದ್ದರೂ ಮುಡಾ ಸಿಬ್ಬಂದಿ ರಜೆ ಪಡೆಯದೆ ನಾಪತ್ತೆಯಾಗಿರುವ ಪುಟಗಳ ಶೋಧದಲ್ಲಿ ತೊಡಗಿದ್ದರು.

ಮುಡಾ ಅಭಿವೃದ್ಧಿಪಡಿಸಿ ಹಂಚಿಕೆ ಮಾಡಿರುವ ವಿವಿಧ ಬಡಾವಣೆಗಳ 600 ನಿವೇಶನಗಳಿಗೆ ಸಂಬಂಧಿಸಿದ 300 ಪುಟಗಳು ಕಾಣೆಯಾಗಿವೆ. ಪ್ರತಿ ಪುಟದಲ್ಲಿ ಎರಡು ನಿವೇಶನಗಳ ದಾಖಲೆಗಳು ಮಾತ್ರ ಇವೆ. ಉಳಿದ ಈ ಪುಟಗಳು ಕಾಣೆಯಾಗಿದ್ದು ಹೇಗೆ? ಇದರಲ್ಲಿ ಸಿಬ್ಬಂದಿಯ ಕೈವಾಡವೇನಾದರು ಇದೆಯೇ ಎಂಬ ಅನುಮಾನಗಳು ಪ್ರಾರಂಭಗೊಂಡಿದೆ.

ಕಾಣೆಯಾಗಿರುವ ಪುಟಗಳ ಹುಡುಕಾಟದಲ್ಲಿ ಮುಡಾ ಆಯುಕ್ತ ಡಾ.ಡಿ.ಬಿ. ನಟೇಶ್​ ನಿರ್ದೇಶನದ ಮೇರೆಗೆ 40 ಸಿಬ್ಬಂದಿ ತೊಡಗಿದ್ದಾರೆ. ಮುಡಾ ಕಾರ್ಯದರ್ಶಿ ವೆಂಕಟರಾಜು ನೇತೃತ್ವದಲ್ಲಿ ವಲಯ ತಹಸೀಲ್ದಾರ್​, ಇಂಜಿನಿಯರ್​ಗಳು, ನಿವೇಶನ ವಿಭಾಗದ ಅಧಿಕಾರಿಗಳು ಶೋಧ ನಡೆಸುತ್ತಿದ್ದಾರೆ.

ಪ್ರಸ್ತುತ ಲಭ್ಯವಿರುವ ಮೂಲ ಕಡತದಲ್ಲಿ ನಿವೇಶ ಹಂಚಿಕೆಯಾಗಿರುವ ವ್ಯಕ್ತಿಗಳ ಹೆಸರು ಹಾಗೂ ಡಿಜಿಟಲ್​ ರೆಕಾರ್ಡ್​ನಲ್ಲಿ ಹೆಸರು ಒಂದೇ ಇದೆಯೇ ಅಥವಾ ಇಲ್ಲವೇ ಎಂಬುದನ್ನು ಪರಿಶೀಲಿಸಲಾಗುತ್ತಿದೆ. ಜತೆಗೆ, ಕಾಣೆಯಾಗಿರುವ ಪುಟಗಳಲ್ಲಿ ಇದ್ದ ಹೆಸರುಗಳನ್ನು ಪತ್ತೆ ಹಚ್ಚುವ ಕಾರ್ಯ ನಡೆಯುತ್ತಿದೆ. ವಿಜಯನಗರ ಪ್ರಥಮ, ದ್ವಿತೀಯ, ತೃತೀಯ ಹಾಗೂ 4ನೇ ಹಂತ ಹಾಗೂ ದೇವನೂರು ಪ್ರಥಮ ಮತ್ತು ದ್ವಿತೀಯ ಹಂತದ ಬಡಾವಣೆಗಳ ನಿವೇಶನಗಳಿಗೆ ಸಂಬಂಧಿಸಿದ ಹೆಚ್ಚಿನ ಪುಟಗಳು ಕಾಣೆಯಾಗಿರುವುದು ಗಮನಾರ್ಹ.

ನಿವೇಶನ ಹಂಚಿಕೆ ಪುಟಗಳು ಕಾಣೆಯಾಗಿರುವ ಬಡಾವಣೆಗಳಲ್ಲಿರುವ ನಿವೇಶನಗಳು ಕೋಟ್ಯಂತರ ರೂ. ಬೆಲೆ ಬಾಳುತ್ತವೆ. ಇಲ್ಲಿ ನಿವೇಶನ ಹಂಚಿಕೆ ವಿಚಾರದಲ್ಲಿ ಈ ಹಿಂದೆ ಅವ್ಯವಹಾರದ ಆರೋಪಗಳು ಕೇಳಿ ಬಂದಿತ್ತು. ಹಗರಣಗಳನ್ನು ಮುಚ್ಚಿ ಹಾಕಲು ಇಂಥದೊಂದು ಪ್ರಯತ್ನ ನಡೆಯಿತೆ ಎಂಬ ಅನುಮಾನ ಮೂಡುವಂತಾಗಿದೆ.

ಏಕೆಂದರೆ, ನಿವೇಶನ ಹಂಚಿಕೆ ಕಡತಗಳು ಎಲ್ಲರ ಕೈಗೂ ಸಿಗುವುದಿಲ್ಲ. ಅಧಿಕಾರಿಗಳ ಸುಪರ್ದಿಯಲ್ಲಿ ಅವುಗಳನ್ನು ಭದ್ರವಾದ ಸ್ಥಳದಲ್ಲಿ ಇರಿಸಲಾಗುತ್ತದೆ. ಹೀಗಿದ್ದರೂ ಇಷ್ಟೊಂದು ದೊಡ್ಡ ಪ್ರಮಾಣದಲ್ಲಿ ದಾಖಲೆ ಪುಟಗಳು ಕಾಣೆಯಾಗಿರುವುದು ಹೇಗೆ ಎಂಬ ಪ್ರಶ್ನೆ ಎಲ್ಲರನ್ನೂ ಕಾಡುತ್ತಿದೆ.

ನಿವೇಶನ ಹಂಚಿಕೆಗೆ ಸಂಬಂಧಿಸಿದ ಸಾಕಷ್ಟು ಪುಟಗಳು ಕಾಣೆಯಾಗಿದ್ದು, ಪತ್ತೆ ಹಚ್ಚಲು ಅಧಿಕಾರಿಗಳಿಗೆ ನಿರ್ದೇಶನ ನೀಡಲಾಗಿದೆ. ಪುಟಗಳು ಹೇಗೆ ಕಾಣೆಯಾಯಿತು ಎಂಬುದು ತಿಳಿದುಬಂದಿಲ್ಲ. ಅವುಗಳು ಸಹಜವಾಗಿ ಕಾಣೆಯಾಯಿತೇ ಅಥವಾ ಅದರ ಹಿಂದೆ ಯಾರದ್ದಾದರೂ ಕೈವಾಡ ಇದೆಯೇ ಎಂಬುದು ತಿಳಿದಿಲ್ಲ. ಈ ಕುರಿತು ಪರಿಶೀಲಿಸಿ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು. ಕಾಣೆಯಾದ ಪುಟಗಳು ಅಥವಾ ನೈಜ ಫಲಾನುಭವಿಯ ಹೆಸರನ್ನು ಪತ್ತೆ ಹಚ್ಚುವ ಕಾರ್ಯ ಮಾಡುತ್ತಿದ್ದೇವೆ. ಇನ್ನೂ ಪರಿಶೀಲನೆ ಹಂತದಲ್ಲಿ ಇರುವ ಹಿನ್ನೆಲೆಯಲ್ಲಿ ಕಾನೂನು ಮೊರೆ ಹೋಗುವ ಕುರಿತು ಚಿಂತನೆ ನಡೆಸಿಲ್ಲ.

| ಡಾ.ಡಿ.ಬಿ. ನಟೇಶ್​ ಮುಡಾ ಆಯುಕ್ತ

https://www.vijayavani.net/a-god-protection-sindegere-forest/

https://www.vijayavani.net/a-woman-writes-message-for-lover-on-rs-10-note-in-viral-pic/

https://www.vijayavani.net/a-monther-and-son-life-is-tragic-end/