ಮಿಸ್​ ಆಗಿದ್ದ ಬ್ಯಾಗಲ್ಲಿತ್ತು ಲಕ್ಷಾಂತರ ರೂ. ಮೌಲ್ಯದ ಚಿನ್ನ; 300 ಗ್ರಾಂ ಚಿನ್ನಾಭರಣ ಮರಳಿಸಿ ಪ್ರಾಮಾಣಿಕತೆ ಮೆರೆದ ಪ್ರಯಾಣಿಕ

ಗದಗ: ಚಿನ್ನ ಬಿಡಿ, ರಸ್ತೆಯಲ್ಲಿ ಒಂದು ನೋಟು ಸಿಕ್ಕರೂ ಅತ್ತಿತ್ತ ನೋಡಿ ಜೇಬಿಗಿಳಿಸಿಕೊಳ್ಳುವವರೂ ಇರುವಾಗ, ಇಲ್ಲೊಬ್ಬರು ಲಕ್ಷಾಂತರ ರೂಪಾಯಿ ಮೌಲ್ಯದ ಚಿನ್ನಾಭರಣವಿದ್ದ ಚೀಲವನ್ನೇ ಕಳೆದುಕೊಂಡವರಿಗೆ ತಲುಪಿಸಿ ಪ್ರಾಮಾಣಿಕತೆ ಮೆರೆದಿದ್ದಾರೆ.

ಗದಗ ನಿವಾಸಿ ಮೆಹಬೂಬ್​ ಕರ್ನಾಜಿ ಎಂಬುವವರು ಇಂಥದ್ದೊಂದು ಕೆಲಸ ಮಾಡಿ ಪ್ರಾಮಾಣಿಕತೆ ಮೆರೆದಿದ್ದಷ್ಟೇ ಅಲ್ಲ, ಈ ಮೂಲಕ ಬ್ಯಾಗ್ ಕಳೆದುಕೊಂಡಿದ್ದವರ ಹಾರೈಕೆಗೂ, ಜನರ ಮೆಚ್ಚುಗೆಗೂ ಪಾತ್ರರಾಗಿದ್ದಾರೆ. ವಿಜಯಪುರ ಜಿಲ್ಲೆಯ ಚನ್ನಬಸಪ್ಪ ಇಂಡಿ ಎನ್ನುವವರು ಗದಗ-ಮುಂಬೈ ರೈಲಿನಲ್ಲಿ ಪ್ರಯಾಣಿಸುವಾಗ ಬ್ಯಾಗ್ ಮಿಸ್​ ಮಾಡಿಕೊಂಡಿದ್ದರು. ಆದರೆ ಅದೇ ಬ್ಯಾಗ್​ ರೈಲು ಪ್ರಯಾಣಿಕ ಮೆಹಬೂಬ್ ಕರ್ನಾಜಿ ಅವರ ಕಣ್ಣಿಗೆ ಕಾಣಿಸಿದ್ದು, ಅವರು ಅದನ್ನು ಗದಗ ರೈಲ್ವೆ ಪೊಲೀಸರಿಗೆ ನೀಡಿದ್ದರು.

ಪೊಲೀಸರು ಬ್ಯಾಗ್​ ಪರಿಶೀಲನೆ ನಡೆಸಿದಾಗ ಅದರಲ್ಲಿ ಸುಮಾರು 15 ಲಕ್ಷ ರೂಪಾಯಿ ಮೌಲ್ಯದ 300 ಗ್ರಾಂ ತೂಕದ ಚಿನ್ನಾಭರಣ ಕಂಡುಬಂದಿದ್ದವು. ಕೂಡಲೇ ಗದಗ ರೈಲ್ವೆ ಸರ್ಕಲ್ ಪೊಲೀಸ್ ಇನ್​ಸ್ಪೆಕ್ಟರ್ ಡಿ.ಬಿ. ಪಾಟೀಲ್​ ನೇತೃತ್ವದ ರೈಲ್ವೆ ಪೊಲೀಸರ ತಂಡ, ಆ ಚಿನ್ನಾಭರಣದ ಮಾಲೀಕರ ಪತ್ತೆಗೆ ಕ್ಷಿಪ್ರ ಕಾರ್ಯಾಚರಣೆ ನಡೆಸಿತು. ಬಳಿಕ ಚನ್ನಬಸಪ್ಪ ಇಂಡಿ ಅವರನ್ನು ಪತ್ತೆ ಮಾಡಿ, ಅವರಿಗೆ ಚಿನ್ನಾಭರಣವನ್ನು ಪೊಲೀಸರು ತಲುಪಿಸಿದ್ದಾರೆ. ಪ್ರಾಮಾಣಿಕ ರೈಲ್ವೆ ಪ್ರಯಾಣಿಕ ಮೆಹಬೂಬ್​ ಹಾಗೂ ಗದಗ ಪೊಲೀಸರಿಗೆ ಚನ್ನಬಸಪ್ಪ ದಂಪತಿ ಧನ್ಯವಾದ ತಿಳಿಸಿದರು.

ಕ್ಷಣಕ್ಷಣದ ಮಾಹಿತಿಗಾಗಿ ವಿಜಯವಾಣಿ ಫೇಸ್​ಬುಕ್​ ಪೇಜ್​ ಲೈಕ್​ ಮಾಡಿ

https://www.vijayavani.net/big-chain-link-racket-is-busted-by-cyberabad-police/

https://www.vijayavani.net/wife-lost-life-because-of-her-drunken-husband/