ತುಂಬಾ ದಪ್ಪಗಿದ್ದೀನಿ, ಕ್ಷಮಿಸಿ ಪಪ್ಪಾ... ತಂದೆ ಮೊಬೈಲ್​ಗೆ ಸಂದೇಶ ರವಾನೆ: ಬೆಳಗಾಗುವಷ್ಟರಲ್ಲಿ ನಡೆದೇಹೋಯ್ತು ದುರಂತ

ಕೊಳ್ಳೇಗಾಲ: 'ಪಪ್ಪಾ ನಾನು ತುಂಬಾ ಫ್ಯಾಟ್​ ಇದ್ದೀನಿ... ಐ ಹ್ಯಾಮ್​ ಸಾರಿ ಪಪ್ಪಾ...' ಎಂದು ತಂದೆ ಮೊಬೈಲ್​ಗೆ ಮಧ್ಯರಾತ್ರಿ ಸಂದೇಶ ರವಾನಿಸಿದ ಮಗ, ಅಪಾರ್ಟ್​ಮೆಂಟ್​ನಿಂದ ಕೆಳಗೆ ಬಿದ್ದು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ.

ಪಟ್ಟಣದ ಭಾವನಾ ಹಾರ್ಡ್​ವೇರ್​ ಮಾಲೀಕ ಜೆ.ಎಸ್​.ರಾಮ್​ಮೋಹನ್​ ಹಾಗೂ ಆರ್​.ಆಶಾ ಮೋಹನ್​ ದಂಪತಿಯ ಏಕೈಕ ಪುತ್ರ ಜೆ.ಆರ್​.ಅಂಜನ್​(18) ಮೃತ ದುರ್ದೈವಿ. ಈತ ಬೆಂಗಳೂರಿನ ಜೈನ್​ ಕಾಲೇಜಿನಲ್ಲಿ ಪ್ರಥಮ ಪಿಯುಸಿ ವ್ಯಾಸಂಗ ಮಾಡುತ್ತಿದ್ದ. ಕನಕಪುರ ರಸ್ತೆಯ ಕೋಣನಕುಂಟೆಯಲ್ಲಿ ದೊಡ್ಡಪ್ಪ ಚೇತನ್​ ಅವರ ಅಪಾರ್ಟ್​ಮೆಂಟ್​ನಲ್ಲಿ ಒಬ್ಬನೇ ವಾಸವಿದ್ದ. ಸೋಮವಾರ ಮುಂಜಾನೆ 3.30ರ ಸಮಯದಲ್ಲಿ ತಂದೆ ಮೊಬೈಲ್​ಗೆ "ಪಪ್ಪಾ ನಾನು ತುಂಬಾ ಫ್ಯಾಟ್​.. ಐ ಹ್ಯಾಮ್​ ಸಾರಿ ಪಪ್ಪಾ'. ಎಂದು ಸಂದೇಶ ಹಾಗೂ ವಿಡಿಯೋವೊಂದನ್ನು ಕಳುಹಿಸಿದ್ದಾನೆ.

ಬೆಳಗ್ಗೆ ಎದ್ದು ಮೊಬೈಲ್​ ನೋಡಿದ ಪಾಲಕರಿಗೆ ಬರಸಿಡಿಲು ಬಡಿದಂತಾಗಿದೆ. ಕೂಡಲೇ ಅಂಜನ್​ಗೆ ಫೋನ್ ಮಾಡಿದರೂ​ ಕರೆ ಸ್ವೀಕರಿಸಿಲ್ಲ. ಇದೇ ವೇಳೆಗೆ ಅಪಾರ್ಟ್​ಮೆಂಟ್​ನಲ್ಲಿ ವಾಸವಿದ್ದ ಬೇರೆಯವರು ಯುವಕನ ತಂದೆ ರಾಮ್​ಮೋಹನ್​ಗೆ ಫೋನ್​ ಮಾಡಿ ನಡೆದಿರುವ ಘಟನೆ ತಿಳಿಸಿದ್ದಾರೆ.

ತಕ್ಷಣ ಪಾಲಕರು ಬೆಂಗಳೂರಿಗೆ ಹೋಗಿ ನೋಡಿದಾಗ ಮಹಡಿ ಮೇಲಿಂದ ಕೆಳಗೆ ಬಿದ್ದಿರುವ ಸ್ಥಿತಿಯಲ್ಲಿ ಅಂಜನ್​ ಮೃತದೇಹ ಸಿಕ್ಕಿದೆ. ಈ ಸಂಬಂಧ ಕೋಣನಕುಂಟೆ ಠಾಣೆಯಲ್ಲಿ ಪಾಲಕರು ದೂರು ದಾಖಲಿಸಿದ್ದಾರೆ. ಅಂಜನ್​ ಕೊನೆಯದಾಗಿ ಕಳುಹಿಸಿರುವ ವಿಡಿಯೋವನ್ನು ಪೊಲೀಸರಿಗೆ ತಂದೆ ನೀಡಿದ್ದಾರೆ.

ಆರು ಕಾಲು ಅಡಿ ಎತ್ತರ ಹಾಗೂ ಗಾತ್ರದಲ್ಲಿ ದಪ್ಪಗಿದ್ದ ಹಿನ್ನೆಲೆ ಅಂಜನ್​ ಅನ್ನು ಎಲ್ಲರೂ 'ನೀನು ತುಂಬಾ ದಪ್ಪ ಇದ್ದೀಯಾ' ಎಂದು ಚುಡಾಯಿಸುತ್ತಿದ್ದರು. ಕೆಲ ತಿಂಗಳ ಹಿಂದೆ ತನ್ನ ಪಾಲಕರ ಬಳಿ ಅಂಜನ್​ ನೋವು ತೋಡಿಕೊಂಡಿದ್ದ. ಇದಕ್ಕೆಲ್ಲಾ ನೊಂದುಕೊಳ್ಳಬಾರದು. ನಮ್ಮ ಕುಟುಂಬದಲ್ಲಿ ಎಲ್ಲರೂ ದಪ್ಪಗಿದ್ದಾರೆ. ನಿನ್ನ ಓದಿನ ಕಡೆ ಹೆಚ್ಚು ಗಮನಹರಿಸು ಎಂದು ಪಾಲಕರು ಸಮಾಧಾನ ಮಾಡಿದ್ದರು. ಆದರೆ ಅಂಜನ್​ ಸಾವಿನ ಮನೆಯ ಕದ ತಟ್ಟಿದ್ದು ದುರಂತ.

ಮರಣೋತ್ತರ ಪರೀಕ್ಷೆ ಬಳಿಕ ಕೊಳ್ಳೇಗಾಲದ ದಾಸನಪುರ ಗ್ರಾಮದ ಬಳಿಯ ಕಾವೇರಿ ನದಿ ತೀರದಲ್ಲಿ ಸೋಮವಾರ ಸಂಜೆ ಅಂತ್ಯಕ್ರಿಯೆ ನಡೆದಿದೆ. ಇದ್ದೊಬ್ಬ ಮಗನನ್ನು ಕಳೆದುಕೊಂಡ ಪಾಲಕರ ಆಕ್ರಂದನ ಮುಗಿಲು ಮುಟ್ಟಿದೆ.

https://www.vijayavani.net/a-belagavi-love-case-punish-farmer/

https://www.vijayavani.net/a-hubli-love-jihad-case/

https://www.vijayavani.net/a-udupi-govt-girls-pu-collage-student-pressmeet-about-hijab/